Nguo ya kauna
13
1 Mwathani ambîîra, “Îthi ûgûre nguo ya kauna, ûmîoge kauna gaaku, îndî ûtikaareke îringithia rûûyî.” 2 Kwoogu ndaagûra nguo ya kauna wa ta bûra Mwathani ambîîrîîte ndûthe, na ndamîoga kauna gaakwa.3 Rîru Mwathani ambîîra rîa maîrî, 4 “Thûkia nguo ya kauna îra ûragûrire na wogeete kauna gaaku, îndi ûûgû ûthi Yufîrîti ûmiithe mbacacîîni cia maiga.” 5 Kwoogu ndathi ndamiitha Yufîrîti, wa ta bûra Mwathani ambîîrîîte.
6 Nyuma ya îgiita rîîraaya Mwathani ambîîra, “Îthi îîndî mwanka Yufîrîti ûthûkie nguo ya kauna îra ndaakwîrire ûmiithe noogo.” 7 Kwoogu ndaathi Yufîrîti na rîra ndeenjire bantû ara ndaamiithîîte, ndamîthûkia îndî n'yarî îkûthûûka na îtigîtûmîrwa nwa aniini.
8 Rîru kiugo kîa Mwathani kîambûyîîra, 9 “Ûûgû i bu Mwathani akuuga, ‘Na njîra wa ta înu nkeenyaangia wîkumia bwa Njunda na Njerusaremu. 10 Antû baba bathûûku bara baregeete kûthikîîria mîgambo yakwa, bara bathiingataga ûûmo bwa nkoro ciao na bathiingataga ngai ciingî bagaitûmîkîra na bakaigonga, bagakara ta nguo îno ya kauna, îtaatûmîrwa nwa aniini! 11 N'ûntû wa ta bûra nguo ya kauna yoogagwa gûkomanîîria kauna ka muntû, nwa ta bu ndoogire nyomba yonthe ya Isiraeri na nyomba yonthe ya Njunda kîrî niû,’ i bu Mwathani akuuga, ‘beethîrwe barî antû ba riîtwa rîakwa, na ûkumio, na gîtîîyo. Îndî bataathikîîria.’
Ithiri bia ndibei
12 “Beere, ‘Ûûgû i bu Mwathani Ngai wa Isiraeri, akuuga: Ithiri bionthe i biûyûrue na ndibei.’ Na bakaaya gûkwîra, ‘Ga tûtaiyî ithiri bibatîîrue biûyûrua na ndibei?’ 13 Rîru ûbeere, ‘Ûûgû i bu Mwathani akuuga: I nthiîte gûtogoonia bonthe bara batwîre nthîgûrû îno, amwe na anene bara bakaraga gîtîîni kîa ûnene kîa Ndaundi, athînjîri ba Ngai, iroria na bara bonthe batûûraga Njerusaremu. 14 Rîru mbakanyanie nthî amwe ta ithiri, ûmwe kîrî ûra ûngî bonthe amwe akûrû na aana anyi. Na gûtirî kîao nkeegua nwa aniini kîndigîîria ntikaabathirie.’ ”
15 Antû ba Njunda,
thikîîriani n'ûntû Mwathani akwaria.
16 Nenkeraani Mwathani Ngai wenu ûkumio
mbere atirareeta mwindu magûrû meenu mabaratia, mbere rwiriiri rwa irîma rûgwa,
bwîrîgîîrîîte werû îndî akabûtuîkithia mwindu abûtuîkithie mwindu wa nthaatû.
17 Wegua bûtikwenda kûthikîîria,
nkaarîra ninka ndîîbithîîte
n'ûntû bwa gwîkumia kwenu;
meetho maakwa makaarîra mûno na meetûûre meethori maingî
n'ûntû antû ba Ngai bakeegua bathiîtwe nabo barî mîgwate.
18 Mwathani ambîîra, “Îra mûnene na gina baume ûneneeni bwao n'ûntû iraûni biao bîra bithongi ibigwîte kuuma biongo biao. 19 Mîîrîga ya taûni cia Negebu n'îmiinge, na gûtirî muntû wa kûmîrugûra; antû ba Njunda bonthe bagûtaîgwa.”
20 Ta raithîîria wone,
bara baayîîte kuuma bwa neegûrû.
Irî kû nyamû cia ndîîthia ira wanenkereetwe ûmenyeera,
ng'ondu ira weekumagîa nacio?
21 Kûrî rîo ûrabeetîgagia bagûteethia,
îndî îîndî ngaatûma bakwatha.
Ûriuga ata mantû mamu?
Ûtiigwatwa n'ûrûrû
ta mûka arî akubî kûgîa na mwana?
22 Nwa wîbûûrie, “I kî n'ûntû mantû mama mankarîkîrîte?”
N'ûntû bwa meeyia maaku maingî
i kîo gîtûmi nguo ciaku itembûrangîîtwe
na wagwatwa kîa inya.
23 Mûethiopiaa aûmba kûgarûra rangi ya nkonde yake,
kana ngo îgarûra marooro maayo?
Wana biû bûtiûmba kûrûtha ûntû bwega,
biû bûrutanîîtwe kûrûtha ûthûûku.
24 “Ngakûnyagaaria ta maûngû,
bûra manyagaaragua i ruuo rwa rwanda.
25 Rûrû i rûgai rwaku,
gîcuncî kîra nkûgairîîte,”
î bu Mwathani akuuga,
“n'ûntû n'ûriganîrîtue i niû
na wetîgania na ngai cia ûrongo.
26 Ngagûkûma nguo ncirute,
kaingo îgi rîaku rîonekana.
27 Ûthûngîîri na nkumba ciaku cia mwîrî,
na ûmaraaya bwaku bûtarî nthoni!
I mboneete ngûgî ciaku cia wagi nthoni bûthûûku
tûrîmaani na naagu bieniini.
Antû ba Njerusaremu,
bûkoona thîîna!
I mwanka rî bûgaakara bûtarî batheru?”