Njeremia aanung'unîra Mwathani
12
1 Rîonthe wîthagîrwa ûrî mûtheru, îî Mwathani,rîra ndeetaga înung'una rîakwa mbere yaku.
Îndî îîndî inkwenda kwaria naawe ûntû bwîgiî ûmma bwaku.
I kî n'ûntû njîra ya bara bathûûku îkaraga bwega?
I kî n'ûntû bara barutaga ngûgî itarî cia wîtîgio baûmbanaga mantûûni?
2 I bûra ûbaandîîte, na bauma mîri,
baakûra na baaciara matunda.
Amwe na ûgu, kinya rîra bagûkumagia,
tibu beegagua bakîrûtha.
3 Îndî woû, n'ûmbiyî, îî Mwathani,
ûmbonaga na ûkageria mathûgaania maakwa îgûrû rîaku.
Bakururie ta ng'ondu cia kûthînjwa!
Na ûbaige mwanya beeteere ntugû ya ûthînji!
4 I mwanka rî nthîgûrû îgaakara îrî mbûmo,
na kîmera kîonthe kîeniini kîbûûya?
N'ûntû bara batûûraga ku i baathûûku,
nyamû na nyoni ikûthira.
Nkûrûki ya ûgu, antû bariuga,
“Ngai ationa bûra bûgaatûkarîkîra.a”
Îcookio rîa Ngai
5 “Ûkeegua ûkuugania na antû bathiîte na magûrû,
na bagûtûma ûnoga cwe,
n'ata ûûmba gûcindana na mbaraathi?
Na ûkaaya kwîgua n'ûkûgwa nthî ûrî nthîgûrû îmbengûku,
n'ata ûkaarûtha rîra ûkaathûngîra biunguuni bia îkumbo rîa muuro wa Njorondani?
6 N'ûntû kinya aruanyûkwe, na antû ba mûciî wenu uungwa,
wana ibagûkunyanîrîîte,
ibaûkîîtie kîrîro kîînene kîînyume naawe.
Ûtikaabeetîgie, kinya bakwarîria mîgambo îmîega.”
Mwathani n'athûûri n'antû baake
7 Mwathani ariuga, “Ngaatiganîria nyomba yakwa,
ntiganîrie antû baakwa,
nkaaneenkanîra ûra mbendeete
njaraani cia anthû baake.
8 Antû baakwa i bantuikîrîte,
ta cimba mûthitûûni.
I bakûngondokera,
kwoogu i mbameneete.
9 Ga antû baakwa batankarîrîte
ta nyoni îra îrîîyaga nyama îrî marooro,
îra nyoni ira ingî irîîyaga nyama icîgagîîria na ikamiithûkîra?
Îthîraniani nyamû cia kîthaka cionthe,
cireteeni irîe.
10 Arîîthi baingî bakeenyaangia mûnda wakwa wa mîcabiibû
na bagaatûma kîeni gîakwa gîkinyangwa,
bakaagarûra kîgwanja gîakwa kîega
gîtuîke nthî îtaûmba gûtûmîrwa.
11 Bakamîtuîkithîa ta îng'aaria,
îkare ta îganjo mbere yakwa.
Nthîgûrû yonthe îgaatuîka rwanda,
n'ûntû gûtirî we akûmaka.
12 Gûntû kunthe gûûkîîru kûra nthaata naagu rwanda,
i noo eenyangia bakeethîrana.
N'ûntû rûûyiû rwa Mwathani rûkaathirania
kuuma mûthia ûmwe wa nthî kûthi ûra ûngî,
gûtirî we akeegua arî mayîîga.
13 Antû baakwa bakaanda ngano îndî bagaaketha mîîgua.
Bakaaruta ngûgî na inya mûno îndî gûtirî kîo bakoona.
N'ûntû bwa mûthûûro wa Mwathani ûmûnene
imera biao bitiuma gîntû.”
Mwathani akeegua mîgongo îra îîngî kîao
14 Mwathani ariuga, “Mantûûni ma atûûri baakwa bonthe baathûûku bara bûtuunyanaga rûgai rûra ndaanenkeere antû baakwa Isiraeri, nkabakûûra kuuma nthîgûrû yao na ngaakûûra nyomba ya Njunda kuuma gatîgatî kaao. 15 Îndî nyuma ya kûbakûûra Nkeegîîrua mîgongo înu kîao na ncookie wa ûmwe wao kîrî rûgai rwake na nthîgûrû yake yongwa. 16 Na bakaaya kûgwata njîra cia antû baakwa bwega, na bakathiîtia na riîtwa rîakwa bakiugaga, ‘Namma wa ta bûra Mwathani atûûraga mwoyo’ wa ta bûra îgiita rîmwe baarutanire antû baakwa kûthiîtia na Mbaari, rîru bakeerûngamia barikîîte gatîgatî ga antû baakwa. 17 Îndî antû bakarega kûthikîîria, nkabakûûra cwe na mbenyaangie,” i bu Mwathani akuuga.