Njunda n'aunîîte kîrîîkanîro kîa Ngai
11
1 Gîkî i kiugo kîra kîayire kîrî Njeremia kiumîîte kîrî Mwathani, 2 “Thikîîria mantû ma kîrîîkanîro gîkî, na wîre antû ba Njunda na atûûri ba Njerusaremu. 3 Na ûbeere ûûgû i bu Mwathani, Ngai wa Isiraeri akuuga, ‘N'ûmûrume muntû ûra ataathîkagîra mantû ma kîrîîkanîro gîkî, 4 kîra ndaarîîkanîîre na biûyûûyû bienu rîra ndaabarutire ûkombooni nthîgûrû ya Miisiri, mwankiini ûra ûtherûkagia cuuma. Ndabeera, “Athîkagîraani maathana maakwa na bûrûthage wa bûra nkûbwîra, rîru i rîo bûgaatuîka antû baakwa naani ntuîke Ngai wenu.” 5 Kaingo nkaûyûria mûthiîtio ûra ndaathiîtîîrie biûyûûyû bienu wa kûbaa nthîgûrû yûûyûrîîte îria na ûkî, wa ta bûra gûkari îîndî.’ ” Ndauga, “Kûrookara ûgu wauga Mwathani.” 6 Mwathani aacooka ambîîra, “Menyithania biugo bibi bionthe taûniini cia Njunda na barabaraani cionthe cia Njerusaremu. Ûbeere, ‘Thikîîriani biugo bia kîrîîkanîro gîkî na bûbithiingate. 7 N'ûntû i ndaakaaniirie biûyûûyû bienu nainya mûno kuuma rîra ndaabarutire Miisiri mwanka îmunthî, ndabakaania kaîrî na kaîrî nkîbeeraga, “Mbathîkîraani.” 8 Îndî bataathikîîria kana batindanîra nabu bonthe baathingatire ûûmo bwa nkoro ciao inthûûku. Kwoogu ndabaretera kîrumi gîa kîrîîkanîro kîra ndabaathîîte bathingate îndî bataarûtha bu.’ ”9 Rîru Mwathani ambîîra, “Antû ba Njunda na Njerusaremu barî na mûbango ûtarî mwega. 10 I bacookeete njîraani inthûûku cia biûyûûyû biao bira biaregire kwathîkîra biugo biakwa, na baacooka kûthingata na kûgonga ngai ciingî. Kwoogu antû ba Isiraeri na Njunda i baunîîte kîrîîkanîro kîra ndaarûthire na biûyûûyû biao.”
11 Mwathani ariuga, “Na mma nkabaretera kînyamaara na batiûmba gûgîkuthûka. Wana baandîrîra ntibathikîîria. 12 Antû ba taûni cia Njunda na akari ba Njerusaremu bakaathi barîrîre ngai cia mîbuanaano ira barutagîra igongwana, îndî itibateethia nwa aniini kînyamaara kîabaayîîra. 13 N'ûntû ngai inu cienu cia mîbuanaano iraingîire wata taûni cienu, îî Njunda. Ndeeni ya Njerusaremu i bwakîîte ithînjîro biingî bia îgi bia kûrutîra Mbaari igongwana na bigana wa ta bûra barabara igana.
14 “Naawe Njeremia, ûtikaarombere antû baba kana ûbeerekanîra kana ûnkayîra n'ûntû bwao, n'ûntû ntiithikîîria rîra bakaambîta îgiita rîa thîîna ciao.
15 I kî n'ûntû antû bara mbendeete barî nyomba yakwa,
baingî beenu i barûthîîte mantû maathûûku.
Igongwana bira bûûndutagîra
bitibûrigîîria bûgwatwa i kînyamaara,
kwoogu tigaani gûkeneera.”
16 Kûrî rîo Mwathani aagwîtire mûceituuni ûmûririmu mûno
ûrî na matunda maathongi.
Îndî na njîra ya gîtuma gîa kîbuubani kîînene mûno
agacubîîthia na mwanki,
na mpong'i ciau ikaunîkaanga.
17 Mwathani Mwene Inya ûra wakwandire, n'akûbaangîrîte kînyamaara n'ûntû bwa ûthûûku bûra bûrûthîîtwe i nyomba ya Isiraeri na ya Njunda. Bara banthûûrîîtie n'ûntû bwa kûrutîra Mbaari igongwana.
Njeremia aabangîrwa kûûragwa
18 Mwathani aangwûrîra mîbango yao ndamîmenya, aambonia bûra baarûthaga. 19 Ndaakari ta ng'ondu îthiîte kûthînjwa, na ntaamenya kana kûrî bu bambaangîrîîte, bakiugaga,
“Ga twînyangie mûtî amwe na maciaro maau,
ga tûmûgiite cwe kuuma nthîgûrû ya bara batûûraga mwoyo,
kaingo riîtwa rîake rîtaririkanwa kaîrî tene na tene.”
20 Ndaaromba ndauga,
“Mwathani Mwene Inya, woû ûgiitaga magamba na njîra ya ûtheru,
na n'ûgeragia nkoro na mathûgaania,
ka mbone ûkîndîîria bo,
n'ûntû i kîrî woû neenkanîrîîte mantû maakwa.
21 “Kwoogu ûûgû i bu Mwathani Mwene Inya akuuga îgûrû rîa mantû ma antû ba Anathothi bara bakwenda gûkûûraga bakiugaga, ‘Ûtikaarorie kaîrî riîtwaani rîa Mwathani kana tûkûûrage na njara cietû.’ 22 Kwoogu, ûûgû i bu Mwathani Mwene Inya akuuga, ‘Nkabakaanûkia. Aana baîthî bakaûragîrwa ndûani, nthaka na aarî nabo bakue i yûûra. 23 Na gûtirî nwa ûmwe wa antû ba Anathothi agaatigara n'ûntû nkabaretera kînyamaara rîra îgiita rîa îkaanûkia rîao rîgaakinya.’ ”