Ngai cia mîbuanaano na kûgonga kwa mma
10
1 Antû ba Isiraeri thikîîriani bûra Mwathani akûbwîra.2 Ariuga,
“Bûtikaathiingate nkuagaya cia mîgongo înu yîîngî,
bwona bionanîîria kûra îgûrû,
wana wegua mîgongo îkaamakania i bio.
3 Ndiini yao n'ya mana,
batemaga mûtî kuuma mûthitûûni na mûcai agacaa mûbuanaano.
4 Bakaugemia na fetha na thaabu,
bakauringîra mîcumaarî ûtikaagwe.
5 Mûbuanaano ûyu ûtirî mwanya na kîîngatia nthang'a mûndaani ûrî matanka,
n'ûntû gîtiaragia na nwa mwanka gîkamatwe
n'ûntû gîtiûmba kûthi.
Ûtigaacikuthûke,
itikûthûûkia kana ikûrûthîra wega nwa bûrîkû.”
6 Mwathani, gûtirî ûngî ta woû,
ûrî ûmûnene,
na riîtwa rîaku i rîînene na rîrî inya.
7 I woû mûnene wa mîgongo yonthe.
Antû bonthe babatîîrue bakûgonga.
Kîrî antû bonthe bara baûme ba mîgongo na mooneneeni maao,
gûtirî we akari ta woû.
8 Bonthe i baataku na i baariitu,
barutanîîtwe i mîbuanaano îtarî gîtûmi îrûthîîtwe na mîtî.
9 Fetha înture îkareetwa kuuma Tarisisi
na thaabu kuuma Ufasi.
Ngûgî ya mûcai na mûturi wa thaabu
îgeekîrwa nguo ya rangi ya mburuu na ya ûkûyû,
bionthe birûthîîtwe i mûbundi ûrî waara.
10 Îndî woû Mwathani nwa woû wenka Ngai wa mma,
ûra atûûraga mwoyo.
Ûgaatûûra wathanaga rîonthe.
Rîra ûthûûri, nthîgûrû niinainaga,
na mîgongo îtiûmîîria mûthûûro waku.
11 Beere ûûgû,
“Ngai ino, ira îtaûmba îgûrû kana nthîgûrû,
îkaathirua kûrû kuuma nthîgûrû.”
Rwîmbo rwa gûkumia Ngai
12 Ngai aûmbire nthîgûrû na inya yake wengwa,
na enjîra nthîgûrû na ûûme bwake wengwa,
na gûkûrûkîîra kwerewa gwake aatambûrûkia îgûrû.
13 Rîra agondokaga, rûûyî runthe rûra rûrî îgûrû rûkagondoka,
agatûma matu maûkîîra kuuma mîthia ya nthî.
Na agatûma rweni rwenia gûkiuraga,
agatûma ruuo kuuma kîandaani gîake.
14 Muntû wonthe n'ûmûriitu
na atirî na ûmenyo
aturi bonthe ba thaabu i bagîîte îgi
n'ûntû bwa mîbuanaano yao.
N'ûntû mîbuanaano yao n'ya ûrongo,
na îtirî mîruke ndeeni yaayo.
15 N'ya ûtheri, gîntû gîa kûmeneerua,
rîra kagiita ka îgamba gagaakinya, îkeenyangua.
16 Ûra we arî Ngai wa Njakubu atikari ta îno,
n'ûntû n'we mûûmbi wa into bionthe,
wana kinya Isiraeri, antû bara eetaga baake,
Mwathani Mwene Inya i rîo riîtwa rîake.
Kwinyangua kûra kûûyîîte
17 Îthîraniani into bienu buume nthîgûrû îno,
biû bûtûûraga bûrî bacîgîîrie.
18 N'ûntû ûûgû i bu Mwathani akuuga,
“Kagiitaani gaka nkabagera ta nkomango ya gîkûtha,
bara batûûraga nthîgûrû îno,
nkabareetera thîîna
kaingo baûmba kûgwatwa.”
19 Niû nkoona thîîna n'ûntû bwa kûgurarua wakwa!
Kîronda gîakwa gîtirî na kîoria!
Ndaathûgaania,
“Mbayua îno n'yakwa
na nwa mwanka mbûûmîîrie.”
20 Îrema rîakwa irîînyangîîtue,
na mîkanda yarîo yonthe yatuîkanga.
Aana baakwa bonthe i baandûkîrîîte na baathi,
gûtirî nwa ûmwe îîndî atigeere wa kûmbaambîra îrema rîakwa
kana wa gûûncuurîria gîtambaa kîra gîcuuragua mwîrîgaani.
21 N'ûntû arîîthi i baariitu,
na batiûragia mantû kîrî Mwathani,
I kîo gîtûmîîte baaga mawega
na ûrîîthi bwao bunthe bûnyagaara.
22 Thikîîriani, kûrî ntûmwa yaakinya.
Kûrî na gîtuma kîînene nthîgûrû ya bwa neegûrû!
Njûûrî yaayo ya ndûa igaatuîkithia taûni cia Njunda maganjo,
ituîke ûtûûro bwa mbwee.
Iromba rîa Njeremia
23 Mwathani, inkûmenya mûkarîre wa muntû t'wake na bwake,
muntû atirî na inya îgûrû rîa mûtûûrîre wake.
24 Mwathani, ncookanîîria, îndî bûra kûbatîîrue,
na ûtigaankaanûkie na mûthûûro,
ûûya kûnthiria kûrû.
25 Erekeria mûthûûro waku kîrî mîgongo
îra îtagwîtîgîîtie,
îra îteetaga riîtwa rîaku.
N'ûntû i baûragîîte antû baaku,
babathiria kûrû
na baatuîkithia ûtûûro bwao îganjo.