9
1 Ta ûkeegua kîongo gîakwa i kîthima kîa rûûyî,na meetho maakwa namo ûkeegua n'inyaka bia meethori!
Ngatua kûrîraga ûtugû na mûthenya
n'ûntû bwa antû baakwa bara baûrage.
2 Ûtakîîgua ndî na bantû rwanda,
bantû a kûraaragia ageni,
nkathaama antû baba baakwa,
na nkaumauma kîrî bo,
bonthe bakari ta athûûngîîri,
mûkondo wa antû batarî eetîgua.
3 “Ûrongo buumaga tûnyuani twa antû baakwa,
ta bûra mîgwî yuumaga ûtaani.
Batigîîte inya nthîgûrû îno na njîra ya ûmma,
barûthaga wîyia nyuma ya bûra bûngî na batimbiyî.”
I bu Mwathani akuuga.
4 “Îîmenyeereni kîrî acoore beenu,
na bûtigeetîgagie aruanyûkwe.
N'ûntû woora mûruanyûkwe i mûûrongo,
na woora mûcoore i mûûnguutû.
5 Bonthe i beenanagia
na gûtirî nwa ûmwe wao aaragia ûmma.
Barutanîîte ndîme ciao kwaragia ûrongo
barûthaga meeyia na bateende kwîrira.
6 Woû ûtûûraga gatîgatî ga antû bara beenanagia,
na ûrongooni bwao bakarega kûûmenya,” i bu Mwathani akuuga.
7 Kwoogu ûûgû i bu Mwathani Mwene Inya akuuga,
“Ta raithaani, nkabakeemba na mbathime.
Kana n'ata bûngî mbûûmba kûrûtha n'ûntû bwa meeyia ma antû baakwa?
8 Ndîme ciao i mîgwî îrî îbai,
ciaragia ûrongo.
Baaragia bwega na atûûri baao,
îndî nkorooni ciao bakabaigîra mîtego.
9 Ntibaa îkaanûkia n'ûntû bwa ûgu?”
I bu Mwathani akûûria.
“Ntiîrîîria ningwa,
mûgongooni ta ûyû?”
10 Nkaarîra na mminûke n'ûntû bwa irîma,
na mbine rwîmbo rwa kîeba n'ûntû bwa ndîîthia ya rwanda.
N'ûntû irîtuîkîîte îganjo na gûtirî we akûrûkagîîra ku,
mîanio ya ng'ombe îtiîguîkaga ku.
Nyoni iciabuurûkire ciathi, na nyamû iciathiire.
11 “Naani ngaatuîkithia Njerusaremu îganjo, ûkaro bwa mbwe.
Ntuîkithie taûni cia Njunda maganjo,
bûra gûtarî we agaatûûra ku.”
12 N'ûû ûrî na ûûme aûmba gûciûkîrwa i mantû mama? Na n'ûû Mwathani aarîîtie n'we, kaingo aûmba kûmenyithania gîtûmi? I kî n'ûntû nthîgûrû îno îînyangîîtue îgakara ta rwanda rûtagiitîka i muntû? 13 Mwathani aacookia auga, “I bûra batiganîîte na mawatho maakwa mara ndaabanenkeere na baarega kûûmbathîkîra kana bamathiingata. 14 Îndî baatua kûthingataga kûûma biongo kwao, baatua kûgongaga ngai cia Mbaari wa ta bûra beethe baabarutanire.” 15 Kwoogu ûûgû i bu Mwathani Mwene Inya Ngai wa Isiraeri akuuga, “Teene, ngaatûma antû baba barîa irio birî gana na banyua rûûyî rûrî na cûmû. 16 Nkabanyagaaria mîgongooni îîngî îra bongwa kana beethe batamiiyî, na ncooke mbîngane nabo na rûûyiû mwanka rîra nkaabathiria.”
17 Ûûgû i bu Mwathani Mwene Inya akuuga,
“Thûgaaniani bûra gûgûkarîka, îtaani eekûrû bara baiyî kûrîra baaye,
bwîte bara baûmbanaga na kûminûka.
18 I baaye na mpwî
batûrîrîre,
mwanka meetho meetû maûyûre meethori,
na miuro ya meethori yuume meethooni meetû.
19 Kayû ka mbu i bikwîguîka Sayuuni,
‘N'ata tûrî beenyangie bûgana!
N'ûntû nyomba cietû n'imbombokanu.’ ”
N'ata tûgîîte îgi rîgana!
Îîndî nwa mwanka tuume nthîgûrû yetû.
20 Îîndî eekûrû thikîîriani kiugo kîa Mwathani,
kunûraani matû meenu bwîgue bûra akuuga.
Rûtanaani aarî beenu kûrîra,
woora ûmwe arutane ûra ûngî rwîmbo rwa kîrîro.
21 N'ûntû gîkuû i kîrathûngîîre nyomba cietû gûkûrûkîîra ndîrîcaani,
na kîathûngîra wîbithooni bwetû ndeeni.
Kîathiria aana beetû bonthe tûyîraani
na kinya antû baîthî thokooni.
22 Ûûgû i bu Mwathani akuuga,
“Ntungu cia antû ikaanyagaara ta thaamu naagu bieniini,
ta irio biicengerie nthîgûrû n'akethi, gûtarî na muntû wa kûbiîthîrania.”
23 Mwathani ariuga,
“Muntû ûmûûme atigeekumîrie ûûme bwake,
kana ûra arî inya eekumîria inya yake
kana gîtonga gîîkumîria ûtonga bwakîo.
24 Ûra eekumagia neekumie na ûntû bwa ûûgu,
n'eekumie i kwîthîrwa n'ereagwa na n'ambiyî,
atî niû ndî Mwathani ûra oonagia antû bonthe wendo bûra bûtathiraga,
na arûthaga bûra bûrî bwa mma na bwagîrîîte aaga nthîgûrû,
n'ûntû mantû mamu i maankenagia.”
25 Mwathani ariuga ata rî, “Ntugû i ciiyîîte, rîra ngaakaanûkia bonthe bara bataane na bataiga kîrîîkanîro gîku gîa gûtaanwa. 26 Nkaanûkie antû ba Miisiri, Njunda, Endomu, Amoni, na ba Moabu bara bonthe beenjagwa ntundua cia nteere cia biongo na batûûraga rwanda. N'ûntû bo batitaanagwa na aana ba Isiraeri nabo bataataanwa nkoro.”