8
1 Mwathani ariuga ata rî, “Kagiitaani gaku, maîndî ma anene na atongoria ba Njunda, ma athînjîri ba Ngai na iroria na ma antû bonthe ba Njerusaremu makaarutwa nthikooni ciao. 2 Makaanîkwa bûûrîîni ruungu rwa riûa, mweri na nthata cionthe cia îgûrû, ira barendeete na kuirutîra ngûgî na ira bathingatîîte na bakairomba ûkûrû na kwigonga. Maîndî maao matiîthîranua kaîrî mathikwa îndî magaakara manyageere naagu nthîgûrû ta thaamu. 3 Na bara bagaatigara ba mûgongo ûyû wa ûthûûku, wa ara barî gûntû kunthe kûra nkaabaira, bakeendaga gûkua nkûrûki ya gûtûûra mwoyo,” i bu Mwathani Mwene Inya akuuga.4 “Beere, ‘Ûûgû i bu Mwathani akuuga:
Antû bakagwa î, batiûkagîîra kaîrî?
Muntû akathi na njîra înthûûku rî, aticookaga njîraani îra mbega?
5 I kî rîru n'ûntû antû baba bantiganîrîîtie?
I kî n'ûntû Njerusaremu îregeete kûûngarûkîra?
Bagwete ûrongo babuitia,
batikwenda kûûndûka.
6 I mbathikîîrîîtie mûno,
îndî batiaragia ûmma.
Gûtirî nwa ûmwe wîriraga ûthûûku bwake,
kana aûria, “N'ata ndaarûtha?”
Woora muntû athingataga njîra yake wenka,
ta mbaraathi yugîîtie ndûani.
7 Wana mboobwe n'iyî kagiita ga kûthaama,
îcea, nthûngûûrû na ntûnda rûkiingo iciiyî kagiita ga gûcooka,
îndî antû baakwa batiiyî
bûra Mwathani eendaga.
8 N'ata bûûmba kuuga, “Tûrî baûgî,
na tûrî na watho bwa Mwathani,”
na mma warîra aarimû beenu ba ûrongo
babugarûrîîte nainya mûno?
9 Bara baûgî bakaagîa îgi,
bagaakua nkoro na bagwe mûtegooni.
N'ûntû i baregeete kiugo kîa Mwathani
n'ûûme bûbi barî nabu?
10 N'ûntû bwa ûgu nkaanenkanîra eekûrû baao kîrî arûme bangî
na mînda yao mînenkanîre kîrî antû bangî.
Kuuma ûra mûniini mwanka ûra mûnene,
bonthe barî na îtanûka rîa kwenda kûgîta.
Athînjîri ba Ngai na iroria
bonthe i beenanagia.
11 Batiogaga antû baakwa bara barî na ironda bwega,
baboogaga taka barî bakûrûte.
Rîra mantû matarî meega,
bakaraga bakîbeeraga, “Mantû i meega, mantû i meega.”
12 I beegagua nthoni rîra barûthaga mantû mamu mathûûku ûgu?
Arî, batiîgagua îgi nwa aniini,
kinya batiîgagua nwa nthoni,
kwoogu bakaagwa kîrî bara bagwîte,
rîra nkaabakaanûkia ûyu nuu mûthia wao,’ i bu Mwathani augîîte.
13 ‘Nkabatuunya maketha maao,’ i bu Mwathani akuuga.
‘Mîcabiibû yao îtiîgua îrî na ncabiibû.
Mîkûyû îtiîgua îrî na nkûyû
na mathangû maayo makanyaara.
Bira mbanenkereete
i bagaatuunywa.’ ”
14 “I kî n'ûntû tûkari nthî aaga?
twîthîraneeni amwe!
Tûkuthûke tûthi bwa taûni ira mbirige
tûkathirîre noogo!
N'ûntû Mwathani Ngai wetû narabangire atûthirie,
na njîra ya gûtûkundia rûûyî rûrî na cûmû,
n'ûntû i tûmwîyîîtie.
15 Tûreerîgîîrîîte thîîrî
îndî gûtirî wega tûroona,
tûreerîgîîrîîte kagiita ga kworua
îndî twaûyûrwa i kîmako.
16 Anthû beetû bagûkinya taûni ya Ndani.
Mûrurumo wa mbaraathi ciao
ûrîtûma nthî yonthe îkainaina.
Anthû bakeenyangia Njerusaremu,
na nthîgûrû yetû yonthe,
na bonthe bara batwîre ku.”
17 “Raithaani bwone, nkabûtûmîra bo bakari ta njoka irî cûmû,
na itakîrigîîrîka,
na ibûrûmange,”
i bu Mwathani akuuga.
Njeremia aagwatwa i kîeba n'ûntû bwa antû baake
18 Kîeba gîa nkoro yakwa i kîînene mûno,
na gîtiûmba kûthirua,
inkuîte nkoro kûrû.
19 Thikîîria kîrîro gîa antû baakwa
kuuma nthî ya kûraaya.
“Ka Mwathani atarî Sayuuni?
Ka mûnene wa Sayuuni atarî noogo?”
“I kî n'ûntû banthûûrîîtie na ngai ino ciao i ngeni,
ngai ciao cia ûrongo itarî gîtûmi?”
20 “Maketha i marakûrûkire,
na thaano n'îrathirire
îndî tûtiroonokua.”
21 Nûntû antû baakwa i baagurarie
wana kinya nkoro yakwa n'îngurarie,
kwoogu i ngwetwe i kîmako na kîeba.
22 Ga gûtarî mûtheega wonara Ngiriandi?
Ga gûtarî mûgao ûrî noo?
Aabu, i kî n'ûntû antû baakwa batakworua ironda biao?