Njeremia aatûmîîria arî Nyomba ya Ngai
7
1 Gîkî i kîo kiugo kîra Mwathani aaneenkeere Njeremia, 2 “Rûngama mwîrîgaani wa Nyomba ya Mwathani wîre antû ûûgû: ‘Biû antû ba Njunda, bara bûkûrûkaga na mwîrîga ûyû bûthiîte kûgonga Mwathani, îguani kiugo gîake. 3 Ûûgû i bu Mwathani Mwene Inya, Ngai wa Isiraeri, akuuga: Garûraani njîra cienu ira nthûûku na mîtugo yenu îtuîke îmîega, naani ngaatûma bûtûûra bantû aaga. 4 Bûtigeetîgie ntheto cia ûrongo bûkiugaga, “Îno i Nyomba ya Mwathani, Nyomba ya Mwathani, Nyomba ya Mwathani!” 5 Ûkaaya kwîgua bûkaagarûra mîkarîre yenu na bûrûthanîre bwingwa bûra kûbatîîrue, 6 ûkeegua bûtiinyîîria ageni ba kuuma kûûngî, bara batarî na beethe kana ntigwa na bûkarega gûtûûra nthakame îtarî na mabîtia bantû aaga na bûkarega kûgonga ngai cia mîbuanaano bwîthûûkia bwingwa, 7 rîru naani nkaareka bûtûûre bantû aaga; nthîgûrû îra ndaanenkeere biûyûûyû bienu îtuîka yao tene na tene. 8 Îndî naabi bûrîîtîgia ntheto cia ûrongo itakîbwira nwa kû.’9 “Bûkaiya kana bûkaûragana, bûkathûngîîra kana bûkathiîtia bûkîrongoaga na kûrutîra Mbaari igongwana, na bûkathiingata ngai ira bûtatwîre bwiyî, 10 rîru bûkaaya kûrûngama mbere yakwa aaga nyomba îno yîîtanagîrua na riîtwa rîakwa, bûkiugaga, ‘Tûrî baakarie,’ bûrîthûgaania bûrî baakarie bûkîrûthaga mantû mama monthe mathûûkîîte ûûgû? 11 Bûraithîîte nyomba îno yîîtanagîrua na riîtwa rîakwa rî, ka îratuîkire îkurungu rîa aamba? Bûmenyage nwa ndaithîîte na inkwona! I bu Mwathani akuuga. 12 ‘Tathiini Siro bwone bûra ndaarûthire gîkaro kîra gîakîîtwe kîrî kîa mbere n'ûntû bwa riîtwa rîakwa, ndaakîînyangiirie n'ûntû bwa ûthûûku bwa antû ba Isiraeri. 13 Bûkîrûtha mantû mama monthe, i mbarîîtie naabi rîtarî rîmwe na bûtaanthikîîria, na ngwîtana gûtirî we aambîtîga. 14 Kwoogu wa bûra ndaarûthire Siro, nwabu nkaarûtha nyomba îno yîîtanîrîtue na riîtwa rîakwa, îra bwîtîgîîtie, bantû ara ndaabûnenkeere biû na biûyûûyû bienu. 15 Ncooke mbwîngatie buume mbere yakwa wa ta bûra ndeengatiirie aruanyûkwe bonthe, nciarwa cionthe cia Eburaimu.’a
16 “Kwoogu bûtikaarombere antû baba kana bûbeerekanîra na njîra nwa irî kû; bûtikaambereke, n'ûntû ntibûthikîîria. 17 Ka bûtakwona bûra bakûrûtha taûniini cia Njunda na barabaraani cia Njerusaremu? 18 Twana tuunaga nkû, beethe bakabua mwanki, bagina nabo bagakima mûtu kaingo barûthîra ngai îra beetaga mûnene wa mûka wa îgûrû mîgaate mûthemba wa keki. Kinya bagîîtûûragîra ngai ciingî igongwana bia biakûnyua kaingo banthûûria. 19 Wabu antû baba i niû bakûthûûria? I baiyî i ka bakwîthûûkia bongwa? Nwabo bakaagîa îgi, i bu Mwathani akuuga.
20 “Kwoogu ûûgû i bu Mwathani Ngai akuuga: Ngaatûûrîria bantû aaga mûthûûro wakwa ûmûnene mûno. Ngacutûûra kîrî antû na kinya kîrî nyamû, mîtî na imera. Ûkeegua ûrî mûthûûro ûmûnene mûno ûgwankana ta mwanki na gûtirî we aûmba gûcuoria.
21 “Ûûgû i bu Mwathani Mwene Inya, Ngai wa Isiraeri akuuga: Ringanîraani nyama cia igongwana bira bûûndutagîra bia kûbîîthia na biewa bira biingî bûrîe bionthe! 22 N'ûntû rîra ndaarutire biûyûûyû bienu nthîgûrû ya Miisiri, ti mawatho ma biewa bia kûbîîthua na ma igongwana bingî bionka ndaabanenkeere, 23 îndî indaabanenkeere kinya watho bûkuuga ata rî, ‘Bûmbathîkîre naani nkeegua ndî Ngai wenu naabi bwîgue bûrî antû baakwa. Bûthiiyage na njîra cionthe ira mbwathîîte na mantû meenu magaakara bwega.’ 24 Îndî nabo batanthikîîria kana baambathîkîra, baathingatire kûûma kîongo gwa nkoro ciao inthûûku. Baanjîîria gûcooka nyuma bantû akûthi mbere. 25 Kuuma kagiita kara biûyûûyû bienu biaumire Miisiri mwanka îmunthî, ntugû nyuma ya îra îîngî nwaka mbûtûmagîra aruti ngûgî baakwa, iroria. 26 Îndî amwe na ûgu bataanthikîîria, îndî i baûmiirie biongo biao nkûrûki na baarûtha mabîtia maanene nkûrûki ya ma biûyûûyû biao.
27 “Rîra ûkaabeera mantû mama monthe, gûtirî we agaakûthikîîria, wana kinya wetana gûtirî we agaagwîtîga. 28 Kwoogu ûbeere, ‘Ûyû i mûgongo ûra ûtaathîkîra Mwathani Ngai wao kana wathîka rîra agûcukaania. Ûmma i bwaurire kîrî bo wana kinya tûnyua twao tûtibûgwetaga. 29 Enjaani ntundu cienu na bûcite na bwine rwîmbo rwa kûrîra bûrî tûrîmaani tûtarî nwa mûtî n'ûntû Mwathani n'aregeete na aatiganîria rûrîîyo rûrû rûmûthûûrîtie.’ ”
30 Mwathani ariuga ata rî, “Antû ba Njunda i babîtîîtie mbere ya meetho maakwa, i baigîîte ngai cia mîbuanaano ira nthwîre nyomba înu îîtanîrîtue na riîtwa rîakwa na i bamîîkîrîte mûgiro. 31 I baakîîte ithîînjîro gûntû kûra gûkîîru wa Tofethi na kîbondeeni kîa mwana wa Inomu ara barutaga nthaka na aarî baao igongwana bia kûbîîthia, ûntû bûra ntaabaatha kana mbuthûgaania. 32 Kwoogu Mwathani ariuga, Îîmenyeereni mûno n'ûntû ntugû ciiyîîte, Tofethi na Kîbonde kîa mwana wa Inomu itiîtwa bu kaîrî, igaatua gwîtagwa Kîbonde kîa Ûûragani, n'ûntû bakaathika antû Tofethi baûyûre mwanka wîgue gûtirî kaanya gatigeere. 33 Biimba bia antû baba bigaatuîka biakûrîa bia nyoni cia îgûrû na nyamû cia kîthaka na gûtioneka muntû wa gûciîngatia. 34 Nkaathiria tûyû twa kûgwîrua na gûkena na tûyû twa nkena twa agûrani na agûrwa taûniini cia Njunda na barabaraani cia Njerusaremu. Nthîgûrû yonthe îgaakira îbooru ki.”