Njerusaremu yacîgîîrua n'anthû
6
1 “Îîthareeni antû ba Benjameni!Kuthûkaani buume Njerusaremu!
Ringaani rûgoci Tekoa!
Na bwîkîre kîonanîîria gîa kwonania kûrî na ûgwati Bethi-Akeremu!
N'ûntû kînyamaara kiumîîte bwa îgûrû,
na kwînyangia kûûnene.
2 Nkeenyangia mwarî wa Sayuuni
ûmûthongi na ûkwendwa.
3 Arîîthi na ûrîîthi bwao bakamwithûkîra,
baambe marema maao bamûthiûrûkîrîîte,
wa mûrîîthi arîîthie rûteere rwake.”
4 Bakauga, “Îîthuuranîreeni tûkarûe na Njerusaremu!
Ûkîîraani, tûkaithûke kûrî mûthenya gatî!”
Îndî bacooke bauge, “Kûrî akubî gûtuga,
wona irundu bikûraayîa ûûgû.
5 Kwoogu Ûkîîraani, tûkaithûke na ûtugû bwene
na twînyangie nyomba ciake ira mbirigîre na rûthingo.”
6 Ûûgû i bu Mwathani Mwene Inya augîîte:
“Temaani mîtî
bûûmbe ithûmba bia mûthetu bithiûrûkîrîte Njerusaremu.
Îno n'yo taûni îra îbatîîrue îneenkerwa îkaanûkia
n'ûntû yûûyûrîîte kwinyanîîria.
7 Wa ta bûra kîthima kîaigaga rûûyî rwakîo rûrî rûkeembu,
nwabu Njerusaremu aigaga mabîtia maake.
Bitina na kwînyangua i bikwîguîka ndeeni yake,
ndwari yake na ironda birî mbere yakwa rîonthe.
8 Ingûgûkaania, Njerusaremu,
kana warega nkûrûûkîre
na ntuîkithie nthîgûrû yaku îganjo
bûra gûtarî we ûûmba gûtûûra ku.”
9 Ûûgû i bu Mwathani Mwene Inya akuuga,
“Ûrûûraani matigari ma Isiraeri
bwega wa ta bûra mîcabiibû yûrûûragwa,
bûcooke bûbaare mpoong'iini kaîrî
ta muntû ûkwîthîrania ncabiibû.”
10 Rîru ndacookia,
“N'ûû nkwaria n'we mûkaanie?
N'ûû ûûmba kûnthikîîria?
Matû maao i maakunîke
kwoogu batiûmba kwîgua.
Namma kiugo kîa Mwathani i kîrumi kîrî bo,
na batikenaga i kîo.
11 N'ûntû bwa ûgu i mbûyûrîîtwe i mûthûûro wa Mwathani,
na ntimaûmîîria nkûrûki ya agu.”
Rîru Mwathani auga,
“Cuîtûûre kîrî aana baaniini bara barî njîraani
na kîrî antû baîthî rîra beethîreene amwe,
kinya akûrû na eekûrû bakaagwatwa nuu,
na kinya akûrû bara bakûrû na ntindiri ira nkûûrûkûrû.
12 Nyomba ciao ikaanenkanîrwa kîrî antû bangî,
amwe na mînda na eekûrû baao,
rîra ngaakaanûkia bara batûûraga nthîgûrû îno,”
i bu Mwathani akuuga.
13 “Kuuma ûra mûniini mwanka ûra mûnene,
bonthe barî na îtanûka rîa kwenda kûgîta;
kinya iroria na athînjîri ba Ngai bakari bûmwe,
bonthe nwaka beenanagia.
14 Batiogaga antû baakwa bara barî na ironda bwega,
baboogaga taka barî bakûrûte.
Rîra mantû matarî meega,
bakaraga bakîbeeraga, ‘Mantû i meega, mantû i meega.’
15 I beegagua nthoni rîra barûthaga mantû mamu mathûûku ûgu?
Arî, batiîgagua îgi nwa aniini,
kinya batiîgagua nwa nthoni,
kwoogu bakaagwa kîrî bara bagwîte,
rîra nkaabakaanûkia ûyu nuu mûthia wao,” i bu Mwathani akuuga.
16 Ûûgû i bu Mwathani akuuga,
“Rûngamaani makomanooni ma njîra bûraithe,
na bûûrithîrie tûyîra tûra tûkûrû,
bûûrithîrie ara kayîra kara keega karî bûthi nako, na i rîo bûkoona kûnogoka kwenu.
Îndî naabi bwaugire, ‘Tûtiithi na njîra înu.’
17 I ndaabwaigîîre akaria ba kûbûkaanagia na babwîra,
‘Thikîîriani kayû ka rûgoci!’
Îndî bwaregire bwauga, ‘Tiû tûtiithikîîria.’
18 Kwoogu îîndî thikîîriani, biû mîgongo,
naabi akûûyî, bûraithe,
ûntû bûra bûkaabagwata.
19 Thikîîria, woû nthîgûrû,
i ndeeteete kînyamaara kîrî antû baba,
maciaro ma mîbango yao îmîthûûku,
n'ûntû i baaregire kûthikîîria biugo biakwa na baarega kwathîkîra watho bwakwa.
20 Ga nkûmakua i mbi mantû ma macoco kuuma Seba,
kana mîtaa îkûnunka bwega kuuma nthîgûrû cia kûraaya?
Igongwana bienu bia kûbîîthua,
bitigwîtîgîîrîka.”
21 Kwoogu ûûgû i bu Mwathani akuuga:
“Nkaiga into bia gûkoorania mbere ya antû baba.
Na bigaakooria aana na beethe bûmwe,
atûûri na acoore bakaathirîra oogo.”
22 Ûûgû i bu Mwathani akuuga:
“Raithaani bwone njûûrî n'îyîîte
yumîîte bwa nthîgûrû ya bwa neegûrû,
mûgongo ûmûnene n'ûkwîngîîrwa
uumîte bwa mîthia ya nthî.
23 Beekundîkîîte mata na matumo,
i baathûûku mûno na batirî kîao.
Rîra bathiithîîtie mbaraathi ciao,
beeguîkaga ta îria rîkwaria.
Baayîîte bakari ta antû beebaangîîte n'ûntû bwa ndûa
gûkuithûkîra woû, mwarî wa Sayuuni.
24 Itwîgîîtue mantû maao,
na tûtiîteethia kîrî bo.
Kînyamaara gîgûtûgwata,
ûrûrû ta bwa mwekûrû arî akubî kûgîa na mwana.
25 Bûtikaumagarûke bûthi bieniini
kana bwanganga njîraani,
N'ûntû anthû beetû barî na mathaga ma ndûa,
na kûrî na ûguaya mbarî cionthe.
26 Itû antû baakwa, îkîraani nkunia,
na bwîgaragarie muuni,
bwîgue bûrî na kîeba na bûrîre na ûrûrû mûno,
ta muntû akûrîrîra kaana ga kîmoomwe,
n'ûntû mwînyangia akaaya na mpwî,
abuithûkîre.
27 Njeremia, ta geria antû baba baakwa
wa ta bûra ûkîgeria cuuma,
ûmenye bwega bûra bakari.
28 Bonthe i baûmo biongo na batiîgagua,
bakari ta rûthuku kana îthaga.
Bathiiyaga bakîguutanaga,
bonthe t'etîgua.
29 Mîîgua îkabuîrîîra mwanki ûkarîrîmbana,
ûkabîîthia cuuma itarî gîtûmi,
îndî gûkemba gûku i kwa mana,
n'ûntû bara bathûûku batikûrutîka kuuma kîrî bo.
30 Antû baba bageetagwa fetha îra ndege,
n'ûntû Mwathani n'abaregeete.”