Gûtirî we mwega
5
1 “Îtia bwa îgûrû na wîndame bwa iti barabaraani cia Njerusaremu,ûraithe bieniini biayo bionthe.
Wone wegua nwa wone muntû nwa ûmwe ûrûthaga mantû ma mma na ûceragia ûtheru,
naani nkaarekera taûni înu.
2 Wana wegua i bathiîtagia bakiugaga, ‘Wa ta bûra Mwathani atûûraga mwoyo,’
beegagua bakîaria ûrongo.”
3 Mwathani woû ûceragia ûtheru.
Waabaringire îndî bateegua ûrûrû;
waabathithirire îndî baarega gûkaanua.
Baûmia moothiû maao nkûrûki ya iiga
na baarega kwîrira.
4 Ndaathûgaania, “Ino i cio nkîa,
i baataku,
n'ûntû batikûmenya njîra ya Mwathani
kana bamenya bûra Ngai wao endaga.
5 Kwoogu ka nthi kîrî atongoria
mbarie nabo;
na mma i baiyî njîra ya Mwathani
na bûra Ngai wao endaga.”
Îndî bonthe i baregeete watho bwa Mwathani
i baregeete kûmwathîkîra.
6 N'ûntû bwa ûgu, cimba îkauma mûthitûûni îbaithûkîre,
ncûûgi ya rwanda îkabatembûraanga,
ngo îkabagiitîra mîîrîgaani ya taûni ciao
kaingo îtembûraanga wonthe ûra akauma,
n'ûntû bwa wingî bwa meeyia maao
na gûcooka nyuma kwao kwingî.
7 Mwathani aûria,
“N'ata mbûûmba kûbûrekera?
Aana baaku i baantiganîrîtie
na baathiîtia na ngai itarî ngai.
Ndaabarerire baabaa,
bakûbaa baatua kûthûngîîra
batua kwîthîranaga nyomba cia marwaya.
8 Bakari ta mbaraathi cia ncamba irîîthîîtue bwega ikabaa na irî na bata ya nka,
wa muntû akeendaga kûmaama na mûka wa itha.
9 Nwa ndege kûbakaanûkia n'ûntû bwa mantû mama?”
i bu Mwathani akûûria.
“Ntibatîîrue kwîrîîria ningwa
kîrî mûgongo ta ûyû?
10 Nkeera anthû baao,
‘Kûrûkîîraani mîndaani ya mîcabiibû bûmîînyangie,
îndî bûtikaamîînyangie cwe.
Ariani mpoong'i ciayo
n'ûntû antû babu ti ba Mwathani.’
11 Antû ba Isiraeri na ba Njunda
na mma beethîrîtwe batarî eetîgua kîrî niû cwe,”
i bu Mwathani akuuga.
12 I barongoereete Mwathani
bauga, “Gûtirî bu akaarûtha!
Gûtirî ûthûûku bûûmba gûtûgwata,
na tûtiona ndûa kana yûûra.
13 Iroria i bia ûtheri bikari ta ruuo.
Kiugo kîa Mwathani gîtirî ndeeni yao,
kwoogu kabarûthîrwe wa bûra baugaga.”
14 Kwoogu ûûgû i bu Mwathani Mwene Inya akuuga;
“N'ûntû antû baba baarîîtie bauga ûûgû,
ngaatuîkithia biugo biakwa bira birî kanyua gaaku mwanki,
na antû baba mbatuîkithie nkû ira mwanki ûyu ûkaabîîthagia.”
15 Mwathani ariuga ata rî, “Antû ba Isiraeri,
ndî akubî kûbûretera mûgongo wa kuuma nthîgûrû ya kûraaya.
Nthîgûrû îtûûraga oogo kuuma tene, na îrî inya,
antû bûtakîmenya rwaria rwao
kana bûciûkîrwa bûra bakuuga.
16 Thiaka ciao ikari ta nthiko îtarî nkunîke
bonthe i ncamba irî inya cia ndûa.
17 Bakaarîîyaga irio bienu bira bûgaaketha,
baûrage nthaka na aarî beenu,
barîe nyamû cienu cia ndîîthia,
barîe mîcabiibû na mîkûyû yenu.
Bakeenyangia na rûûyiû taûni cienu ira bwîtîgîîtie
n'ûntû irî na rûthiingo.”
18 Mwathani ariuga, “Kinya ntugûûni inu, ntibûthiria cwe. 19 Na rîra antû bakaûria, ‘I kî n'ûntû Mwathani Ngai wetû atûrûthîîte ûûgû?’ ûkaabacookeria ûbeere, ‘Wa ta bûra bwantiganîîrie bwatûmîkîra ngai cia mîbuanaano, nwabu bûgaatûmîkîra ageni nthîgûrû îtarî yenu.’
20 Ugîîria ûûgû kîrî rûrîîyo rwa Njakubu
na kinya ûmenyithie Njunda:
21 ‘Îguani ûûgû biû antû batarî na ûûme
bara bûrî na meetho na bûtionaga,
bûrî na matû na bûtiîgagua:
22 Bûtiûmba gûûnkuthûka?’ i bu Mwathani akûûria.
Bûtiûmba kwinaina mbere yakwa?
Ndaigire mûthanga ûrî mwanka wa îria,
mwanka wa tene na tene ûra îria rîtagîkûrûka.
Mîkumbîîrî nwa yûkîîre, îndî îtiûmbana;
nwa îringe gîtuma îndî îtitagaara mwanka ûyu.
23 Îndî antû baba barî na nkoro imbûmo na i baaremu
baraûndûkire na baathi bûngî.
24 Batiîbîîraga ata rî,
‘Tûtîîyeeni Mwathani Ngai wetû,
ûra atweyaga mbura ya mûratho na ya nthano kagiita gaakinya,
ûra atûreetagîra biumia bia maketha bithiingateene bwega.’
25 Mabîtia meenu imatûmîîte mantû mama marutarutwa oogo
meeyia meenu mabûtuunya mawega.
26 Kûrî antû baathûûku barî gatîgatî ga antû baakwa,
babategaga na mûtego ta antû bagûtega nyoni.
27 Wa ta bûra mûtegi wa nyoni aûyûragia îkerenge rîake nyoni,
n'wabu baûyûrîtie nyomba ciao na into booneete na njîra cia kwenanîîria,
i kîo n'ûntû batuîkîîte itonga na antû barî inya.
28 Baanora na mîîrî yao yatendera.
Ngûgî ciao ira nthûûku itirî mûthia;
batigiitaga magamba ma aana ba ntigwa bwega
kana batheteera nkîa.
29 Nwa ndege kûbakaanûkia n'ûntû bwa mantû mama?”
I bu Mwathani akûûria.
“Ntibatîîrue kwîrîîria ningwa
kîrî mûgongo ta ûyû?”
30 “Ûntû bûûthûûku na bwa kûmakania
bûgûtuîkîka nthîgûrû.
31 Iroria birîroria ûrongo,
athînjîri ba Ngai barîathana wa bûra iroria bibu bikûbeera,
antû baakwa nabo nwabu bakwenda mantû makara wa ûgu.
Îîndî mûthiani bûkaarûtha ata?”