Gwîtwa wa Isiraeri îcooka kîrî Mwathani
4
1 “Isiraeri, wegua ûgaacooka,cooka kîrî niû,” i bu Mwathani akuuga.
“Wegua ûkaarutaruta mîbuanaano îra nthwîre yumaume ûthiûni bwakwa
na ûtienyeenya kaîrî,
2 na wegua ûkaathiîtia uuge, ‘Wa ta bûra Mwathani atûûraga mwoyo,’
ûrî na ûmma, wagîru na ûtheru,
mîgongo îkaatharimwa
na îgwîrague ndeeni yake.”
3 Ûûgû i bu Mwathani akwîra antû ba Njunda na ba Njerusaremu,
“Rîmaani ngûûndû cienu
na bûtikaande mbeû cienu mîîguani.
4 Biû antû ba Njunda na ba Njerusaremu
îînenkanîreeni kîrî niû na bwaige kîrîîkanîro gîakwa.
Wegua t'ûgu mûthûûro wakwa wakane ta mwanki
n'ûntû bwa ûthûûku bûra ûrûthîîte
na gûtirî we agaacuoria.”
Kînyamaara kuuma bwa mbarî ya bwa neegûrû
5 “Tûmîîriani Njunda na buugîîrie Njerusaremu bûkiugaga,
‘Ringaani rûgoci nthîgûrû yonthe!’
Ugîîriani bûkiugaga:
‘Îthîranaani amwe,
tûkuthûke tûthi tûkeebithe taûni ira mbirigîre na nthingo.’
6 Îkîraani kîonanîîria gîa kwonanîîria njîra ya kûthi Sayuuni!
Îîthareeni na mpwî bwîtuunyûkie bûtagûkarakara!
N'ûntû i ndeeteete kînyamaara kuuma bwa neegûrû,
na kinya kwînyangua kûûnene mûno.
7 Mwînyangia wa mîgongo akuumîîra,
ta cimba yumîrîîte kîthakaani kîra yîîbithaga.
Akuuma ara akaraga
kaingo eenyangia nthîgûrû yenu.
Taûni cienu igaatigwa ciaraganua kûrû
ikare ta maganjo matarî antû.
8 Kwoogu îkîraani nkunia irî nguo,
bûgwatwe i kîeba na bûrîre.
N'ûntû mûthûûro ûmûnene wa Mwathani
ûtiragarûka ûtûtîîra.”
9 Mwathani ariuga, “Ntugû înu,
mûnene na atongoria baake bakaaguaya,
athînjîri ba Ngai bakaamaka,
na kinya iroria bikaarigara.”
10 Rîru ndauga, “Itû Mwathani Mwene Inya, n'ûreeneerie antû baba ba Njerusaremu cwe ûkîbeeraga, ‘Bûkeegua bûrî na ûkiri,’ warîra rûûyiû rûrî nkorooni ciao.” 11 Kagiita gaku antû baba amwe na Njerusaremu bakeerwa, “Ruuo rwa kûrûngûria ruumîîte tûrîmaani tûtarî nwa mûtî twa rwanda rûkaabuutana rwerekereete antû baakwa, ruuo rûru ti rwa kweera, 12 i ruuo rûrî na inya mûno rwa kûrûtha ûgu ruumîîte kîrî niû. Rîru i rîo nkaagiitîra antû îgamba.”
13 Ta cûûba, aayîîte akari ta matu
nkaarî ciake cia ndûa ciiyîîte ikari ta kîbuubani,
mbaraathi ciake irî mpwî nkûrûki ya nderi.
Ûi kîrî tiû, tûkûthirua.
14 Njerusaremu, Thamba ûthûûku bûra bûrî nkorooni yaku na wonoke.
I mwanka rî ûkaiga mathûgaania maathûûku nkorooni yaku.
15 Kayû i gakuugîîria naagu taûni ya Ndani
gakiugagîîria kuuma tûrîmaani twa Eburaimu
kînyamaara kîra kîîyîîte.
16 “Îra mîgongo ûûgû,
na uugîîria Njerusaremu:
‘Njûûrî ya kuuma nthîgûrû ya kûraaya n'iyîîte kûbûcîgîîria,
bagîkururaga bathiîte kûrûa na taûni cia Njunda.
17 Bagaacîgîîria Njerusaremu ta antû bakarîîtie mûnda
n'ûntû n'andemeete,’ ” i bu Mwathani akuuga.
18 “Mûkarîre waku na ngûgî ciaku ira ûrutaga
i cio ikûretereete thîîna îno.
Rîrî n'îkaanûkia rîaku,
n'ata rîrî na ûrûrû bûgana,
rîrîmuunta mwanka nkoro!”
19 Ndauga,
“Yîîyiaî, i ngwakanwa, yîîyiaî inkwîgua ûrûrû!
Ndî na ûrûrû bûûnene mûno.
Itû ndîankanwa mwanka nkoro!
Nkoro yakwa nîkûringa nainya mûno
ntiûmba gûkira.
N'ûntû nkwîgua kayû ka rûgoci
na ndeegua mbu ya ndûa.
20 Kînyamaara kîthingatanîîte na kîra kîngî
nthîgûrû yonthe yakara ta îganjo.
Nthûti îmwe îrema rîetû rîenyaangua,
nthûti îmwe iguîkîri bia marema meetû biatembûrangwa tûcuncî tûcuncî.
21 I mwanka rî ngaakara nkîonaga beendeera ya ndûa îrî mbûkîîrie,
na nkîîgagua kayû ka rûgoci?”
22 Mwathani aacookia,
“Antû baakwa i baariitu;
batiimbiyî.
N'aana baariitu;
batigûciûkîrwa.
Barî waara bwa kûrûtha mantû maathûûku,
îndî batiiyî kûrûtha mawega.”
23 Ndaaraithire nthîgûrû,
gûtirî bu yaakari, yarî întheri na îtaarî gîntû;
îgûrû narîo,
rîtaarî na werû.
24 Ndaaraitha irîma,
ndoona bikiinaina,
na tûrîma tunthe tûkîengeyaga.
25 Ndaaraitha, ndoona gûtirî antû,
nyoni cionthe i ciarî ikûbuurûûka ciatherekeria.
26 Ndaaraitha nthîgûrû îra noru n'yarî îgûtuîka rwanda,
taûni ciayo cionthe ciarî maganjo
n'ûntû bwa mûthûûro ûmûnene wa Mwathani.
27 Ûûgû i bu Mwathani akuuga:
“Nthîgûrû yonthe îkeenyangua,
wana wegua ntimîînyangia cwe.
28 Kwoogu nthîgûrû îkaagwatwa i kîeba,
na îgûrû rîrume mwindu ti,
n'ûntû I niû mbugîîte na ntiîrira,
i mbaangîîte ûgu na nticooka nyuma.”
29 N'ûntû bwa gîtuma kîa athiithia ba mbaraathi
na antû bara barî na mîgwî,
antû ba wa îra taûni bagaakuthûka na rwîro.
Bamwe bakîîbithaga ithakaani,
na bara bangî bagaatwa njaraani cia maiga.
Taûni cionthe ciarûûkîrwa
gwatigwa gûtarî we ûrî ku.
30 N'ata ûkaarûtha îîndî woû ûtarîrîtwe kwînyangua?
Ûrî na gîtûmi kîbi gîa gwîkîra nguo intuune
na gwîkîra mîkathî ya thaabu?
Ûrîgemia meetho maaku na rangi maambi?
Kwîthongamia waku i kwa mana.
Anyaanya baaku ibarakûmenire, ibagûkûrumanga
na barîcwa gûkûûraga.
31 Inkwîgua gûkaya ta kwa mwekûrû arî na ûrûrû bwa mwana,
kûrîra ta gwa nkarianya îkîgîa na kaana ka mbere
I kîrîro kîa mwarî wa Sayuuni ûgwîkayîra akîbeebaga mûno
arîtambûrûkia njara ciake akiugaga,
“Irû yîî niû!
Ûtûûro bwakwa bûkûnenkanîrwa njaraani cia aûragani.”