Kûrega gwîtîgîka gwa Isiraeri
3
1 “Muntû agacookia mûka wake,mûka ûyu akathi akagûrwa i muntû ûngî,
muntû mûrûme ûyu wa mbere amûcookera kaîrî?
Nthîgûrû înu tika îkeegua îrî na mûgiro cwe?
Îndî woû ûtwîre ûrûthaga ûmaraaya na anyaanya baingî,
ûgaancookera kaîrî?” i bu Mwathani akuuga.
2 “Ata rî, ta raithaani tûrîmaani tûra tûtarî nwa mûtî
bwone kana kûrî bantû bûtaamaamwa naabi.
Ingî nteere cia njîra noo bwakaraga nthîgûrû bweteerete anyaanya
ta Mûarabu akari nthî rwanda agiitîrîîte.
I bwîkîrîîte nthîgûrû mûgiro
n'ûntû bwa ûmaraaya na ûthûûku bwaku.
3 Kwoogu i kîo mbura ya mûratho îtaaringa nwa nthanta
na gûtirî mbura ya nthano îraura.
Amwe na ûgu ûrî na mwonekere wa ûmaraaya
na ûtikwîgua nthoni.
4 Anga kuuma îîndî ûtiindîrîra,
‘Baaba na mûcoore wa kuuma ndî ûmwîthî,
5 ga ûgakaraga ûthûûri rîonthe?
Ka mûthûûro waku ûgatûûra tene na tene?’
Ûûgû i bu ugîîte,
îndî ûkaarûtha ûthûûku bunthe bûra ûûmba.”
Mwîto wa kwîrira
6 Mwathani aaria naani rîra Njosia aarî mûnene ambûûria ata rî, “Ûkwona bûra Isiraeri ûra atarî mwîtîgua aarûtha? Eetia karîma konthe kara gaûkîîru na ruungu rwa mûtî unthe aarûthîra ûmaraaya oogo. 7 Ndaathûgaanagia nyuma ya aarûtha mantû mama monthe agaancookeera îndî ataancookeera, kinya Njunda mwaragina ûra mwaganu N'onire ûgu. 8 I ndaanenkeere Isiraeri ûra atarî mwîtîgua baarûa ya kûmûtiga na ndamûta n'ûntû bwa ûmaramari bwake. Amwe na ûgu ndoona atî mwaragina Njunda ûra ataarî mwîtîgua ataakuthûka; na kinya aumagarûkire aathi kûringa ûmaraaya. 9 N'ûntû bwa bûra Isiraeri atoonaga ûmaramari bwake bûrî thîîna îînene kîrî we, n'agwatithirie nthîgûrû yake mûgiro na njîra ya kûgonga ngai irûthîîtwe na mîtî na maiga. 10 Amwe na ûgu, mwaragina Njunda ûra ataarî mwîtîgua ataancookera na nkoro yake yonthe, îndî aayire eebuithîîtie,” i bu Mwathani akuuga.
11 Rîru Mwathani ambîîra, “Isiraeri ûra atarî mwîtîgua n'ûmwagîru nkûrûki ya Njunda ûra atarî mwîtîgua. 12 Îthi, ûkauge ntûmwa îno rûteere rwa bwa îgûrû:
‘Cooka woû Isiraeri ûra atarî mwîtîgua,’
i bu Mwathani akuuga.
‘Ntikûraitha na mûthûûro kaîrî,
n'ûntû ndî wa kîao,’ i bu Mwathani akuuga.
‘Ntitûûra nthûûri tene na tene.
13 Bunka îtîgîîria mabîtia maaku
atî n'ûmîrîtie Mwathani Ngai waku kîongo,
na bwamaramarania na ngai cia kûngî ruungu rwa mîtî yonthe îra mîririmu,
na bwarega kwathîkîra kayû gakwa,’ i bu Mwathani akuuga.
14 “Cookaani kîrî niû, biû aana batarî eetîgua,” i bu Mwathani akuuga, “n'ûntû i niû mwathi wenu nkaabûthûkia, ûmwe kuuma taûni na baîrî kuuma mwîrîgaani ûmwe, mbûreete Sayuuni. 15 Naani nkabwaa arîîthi ba kûbûrîîthagia bara bakari ta bûra nkoro yakwa yeendaga, bara bakaabûtongoragia na ûûme na ûmenyo. 16 Na gûgaakarîka ata rî, ntugûûni inu rîra bûkathagaya bwingîe nthîgûrû înu, i bu Mwathani akuuga, ‘Antû batiaria kaîrî mantû ma îthandûkû rîa kîrîîkanîro kîa Mwathani.’ Rîtiîgua rîrî mathûgaaniani maao kana rîririkanwa, kana beegua bakîrîaga kana rîngî rîrûthwa. 17 Îgiita rîru bageetaga Njerusaremu gîtî kîa ûnene kîa Mwathani, na mîgongo yonthe îkeethîrana Njerusaremu gûkumia riîtwa rîa Mwathani. Na gûtirî rîo kaîrî bakathingatana na kûûma kîongo gwa nkoro ciao inthûûku. 18 Ntugûûni inu antû ba Njunda bakagwatana na antû ba Isiraeri, na barî amwe bakauma bwa nthî ya n'egûrû bendame bwa nthî îra ndaanenkeere booyûûe îrî rûgai rwao.
19 Ningwa ndaathûgaanagia,
‘Bûra nkabûthûkia ta aana baakwa nkeneete,
mbûnenkere nthîgûrû înthongi
rûgai rûra rûthongi kîrî nthîgûrû yonthe.’
Ndaraugaga bûkaambîta ‘Baaba,’
na bûtiitiga kûnthiingata.
20 Îndî wa ta mwekûrû ûtarî mwîtîgua kîrî mwene,
n'wabu woû Isiraeri ûkarîte kîrî niû,” i bu Mwathani akuuga.
21 “Kîrîro i gîkwîguîka tûrîmaani tûtarî nwa mûtî,
kûrîra na kwerekana wa antû ba Isiraeri,
n'ûntû i batiganîîte na njîra ciao ira mbega
na baariganîrua i Mwathani Ngai wao.
22 Cookaani kîrî niû, biû antû batarî eetîgua,
na nkooria kwaga wîtîgio kwenu.”
Bûriuga,
“Yîî, tûgacooka kîrî woû,
n'ûntû i woû Mwathani Ngai wetû.
23 Na mma ûteethio bûra bwîrîgagîîrwa buuma kîrî ûgongi bwa gîtuma bûra bûkaraga tûrîmaani îgûrû i bwa mana,
na mma i kîrî Mwathani Ngai wetû wonokio bwa Isiraeri bûrî.
24 Kuuma kaumo geetû, ûgongi bûrî îgi bwa ngai cia ûrongo i bûrîîte îthithina rîa biûyûûyû bietû na
nyamû ciao cia ndîîthia,
nthaka na aarî baao.
25 Twîgaragarieni nthîgûrû n'ûntû bwa îgi rîra tûrî narîo,
na tûreke îgi rîetû rîtûkunîke
n'ûntû itwîyîîtie mbere ya Mwathani Ngai wetû,
tiû twingwa, na biûyûûyû bietû.
Kuuma kaumo geetû mwanka îmunthî tûrî,
tûtiathîkîrîte Mwathani Ngai wetû.”