Isiraeri yatiganîria Ngai
‘Nkûririkana bûra werutaga rîra warî ûmwîthî,
na kinya wendo bûra wambendeete nabu rîra ndaagûkeethagia.
Bûra wanthingataga tûkagiitanîîria rwanda,
gûkûrûkîîra nthîgûrû îtaarî îmbaande nwa mbi.
3 Isiraeri n'yarî întheru kîrî Mwathani,
yakari ta maciaro ma mbere ma maketha maake.
Na ûra wonthe aageriirie kûmwînyangia naatarirwe arî na mabîtia,
ûthûûku i bwabagwatagwatire,’ ” i bu Mwathani akuuga.
4 Îgua kiugo kîa Mwathani woû nyomba ya Njakubu,
mîîrîga yonthe ya Isiraeri.
5 Ûûgû i bu Mwathani akuuga,
“I mabîtia marîkû biûyûûyû bienu boonire ndî namo
kaingo bathi kûraaya naani?
Baathiingatire mîbuanaano îtarî gîtûmi,
nabo bongwa baatuîka gîntû gîtarî na gîtûmi.
6 Bataatindanîra na kûûria, ‘Arîkû Mwathani,
ûra watûrutire Miisiri.
Atûtongoreeria twakûrûkîîra ng'arûûni îtarî gîntû,
twakûrûkîîra rwanda na mîguuruuni.
Nthîgûrû ya mwathû na mwindu ûmûnene,
nthîgûrû îtakûrûkagîîrwa kana îtûûrwa n'antû?’
7 Ndaabûreetire nthîgûrû înoru,
bûrîîyaga maciaro na into bingî bira biega.
Îndî rîra bwathûngîîre ku, i bwekîrithiirie nthî yakwa mûgiro,
na bwatuîkithia rûgai rwakwa gîntû gîtarî kîtheru.
8 Athînjîri bataûria, ‘Mwathani arîkû?’
Athînjîri baakwa bongwa, bataammenya.
Aathani nabo i baandemire,
iroria biacookire kûroria riîtwani rîa Mbaari,
na kûgongaga ngai itarî gîtûmi.”
9 “Na n'ûntû bwa ûgu, nkabûgambithia kaîrî,” i bu Mwathani akuuga.
“Na kinya nkaagambithia aana ba aana beenu.
10 Ringanîriani tûcîgîîriani twa îria twa Kitimua na bûraithîîrie,
tûmaani antû bathi nthîgûrû ya Kendari baraithe bwega,
bwone wegua ûntû ta bûbû bwaroonekana kaîrî.
11 Gûtirî mûgongo ûngî waarogarûrania ngai ciao,
wana kinya ûkeegua i cia mîbuanaano.
Îndî antû baakwa i bangarûranîtie,
niû Ngai ûra ûbareterete ûkumio,
na ngai cia mîbuanaano itarî gîtûmi.
12 Îgûrû i rîrigare n'ûntû bûbû,
na rîcooke riinaine mûno n'ûntû bûbû,” i bu Mwathani akuuga.
13 “N'ûntû antû baakwa i barûthîîte meeyia maîrî:
I baantiganîrîtie niû kaumo ka rûûyî rûra rûrî mwoyo,
na beebînjîra ithima bingî biao bongwa,
birî na nkuû bitaûmba kwaiga rûûyî.
14 Ga Isiraeri arî mûruti ngûgî, kana acierwe arî nkombo?
I kî îndî n'ûntû atuîkîîte mûtae?
15 Cimba ikûruruma,
ga ikûmûrurumîra.
I kwînyangia nthîgûrû yaake,
taûni ciake i kûbîîthua na ciarûûkîrwa.
16 Wana antû ba Memufisib na Tapanesi
ibakwenjeete nthontia ya kîongo gîaku.
17 Îndî i bwingwa bwîretereete thîîna îno,
n'ûntû bwa gûtiganîria Mwathani Ngai wenu,
ûra aabûtongorereetie njîraani.
18 Îîndî i baita mbi bûkoona bwathi Miisiri,
bwanyua rûûyî rwa Siori?c
Kana i baita mbi bûkoona bwathi Asîîria
bwanyua rûûyî rwa Yufîrîti?
19 Ûthûûku bwaku bûgagûkaanûkia,
na kûgarûkanga gwaku kuuma kîrî Ngai gûkûgondokere.
Ta raitha wone bûra ûntû bûbû bûthûûkîîte na bûrî na ûrûrû kîrî biû,
rîra bwatiganîria Mwathani Mwene Inya, Ngai wenu
na ûtagûnkuthûka nkorooni yaku,” i bu Mwathani Mwene Inya akuuga.
20 “Tene mûno n'waunangire îcoki rîaku
na watwikaangia bira biakûthaîkîîte.
Wauga, ‘Ntigûtûmîkîra,’
na watûa kûrûthagîra ûmaraaya bantû onthe ara aûkîîru na mûtîîni uunthe ûra mûririmu.
21 Amwe na ûgu ndaakwandîte ta mbeû îra ntaare ya ncabiibû,
mbeû îra mbega na ya kwîrîgîîrwa.
N'ata îndî n'ûntû ûracookire kûngarûka,
wakara ta mûcabiibû ûmûthûûku wa kîthaka?
22 Wana kinya ûkathamba na îgati
kana ûkathamba na sabuni îmbiingî,
marooro ma wîyia bwaku marî mbere yakwa,”
i bu Mwathani Ngai akuuga.
23 “N'ata ûûmba kuuga ûtirî na mûgiro,
na ûtiragonga Mbaari?
Ta ririkana mîkarîre yaku naara kîguuruuni;
ûthûgaanie bûra warûthire.
Woû ûkari ta nkamîîra ya mûgoma
bûra îrî mpwî cia kuugia aaga na aara.
24 Ûkari ta îng'ooi rîa kîthaka rîra rîamenyeerie rwanda,
bûra rîûngaga mûthigi rîra rîrî na mûgwato.
Ncamba ira ciînganaga narîo na iteenogia,
n'ûntû ikarîgwatagwata rîra rîrî na mûgwato.
25 Ûtikaugie mwanka ûtigwa mbayo i ntheri,
na mûmero waku ûûmagara.
Îndî woû uugaga, ‘Bûbu bûtirî gîtûmi!
I mbendeete ngai cia kûûngî,
na nwa mwanka ncithingate.’
26 Wa ta bûra mwamba agîîyaga îgi aagwatwa,
nwa ta bu antû ba Isiraeri bakaagîa îgi,
amwe na anene na atongoria baao,
athînjîri baao ba Ngai na iroria biao.
27 Beeraga nduungu ya mûtî, ‘Woû ûrî baaba,’
na bakeera kîrebûrû kîa iiga, ‘I woû wanciarire.’
I baambuthatîrîîtie mîgongo
baarega kûûmbûndûkîria moothiû maao;
îndî rîra barî na thîîna beetanaga bakiugaga,
‘Ncû ûtûteethie!’
28 Irî kû ngai inu bwîrûthîrîte bwingwa?
Iciiye wegua n'wa ibwonokie rîra bûrî thîînaani!
N'ûntû woû Njunda ngai cia mîbuanaano ira ûrî nacio
ciingîîte wata taûni ciaku.
29 I kî n'ûntû bûkûûngambithia?
Bwinthe i bûmbûmîrîtie kîongo,” i bu Mwathani akuuga.
30 “N'ûtheri nkaanûkîîtie antû baaku,
n'ûntû bataangarûkîra kinya nkûbakanûkia.
Rûûyiû rwaku wengwa i ru rwaûragire iroria biaku,
wata cimba îrî ûrûme.
31 Naabi nthuke îno, thikîîriani kiugo kîa Mwathani.
I ka ndaratuîkire rwanda kîrî Isiraeri
kana nthî ya mwindu ûmûnene?
I kî n'ûntû antû baakwa bakuuga, ‘Tiû tûtikûrigîîrua kwanganga;
na tûtiiya kîrî woû kaîrî?’
32 Mwarî aûmba kûriganîrua i mûkathî gwake,
kana mwiki akariganîrua i nguo yake ya wiki?
Îndî antû baakwa i bariganîrîtue i niû,
ntugû itatarîka.
33 N'ata ûmenyagîîra mûkarîre waku ûgîceria wendo!
wana kinya aka bara bathûûku nwa bathoome kuumania na mûtugo waku.
34 Nguoni ciaku antû i boonaga nthakame ya nkoro cia nkîa itarî na mabîtia,
amwe na ûgu, ûtaaboona bakibunjia nyomba.
35 Îndî woû uugaga, ‘Gûtirî bu nthûûkîîtie nabu,
na atithûûri i niû.’
Ngakûgiitîra îgamba
n'ûntû woû uugaga, ‘Ntiîyîîtie.’
36 I mbi îtûmaga ûriunga na ûkîgarûragîra mûkarîre waku?
Ûkeeguithua naaî i Miisiri wa ta bûra warûthirwe n'Asîîria.
37 Ûkauma noogo wîkîrîte njara kîongo,
n'ûntû Mwathani n'aregeete bara gwîtîgîîtie,
batigûtethia.”