NJEREMIA
1
1 Bibi i biugo bia Njeremia mwana wa Irikia, ûmwe wa athînjîri ba Ngai bara baarî Anathothi nthîgûrû ya Benjameni. 2 Kiugo kîa Mwathani kîamûûyîîre mwankaani wa îkûmi na îthatû wa wathani bwa Njosia mwana wa Amoni mûnene wa Njunda. 3 Kinya i kîayire kagiitaani ka wathani bwa Njeoyakimu mwana wa Njosia mûnene wa Njunda, mweri wa îtaano wa mwanka wa îkûmi na ûmwe wa wathani bwa Sendekia mwana wa Njosia mûnene wa Njunda rîra antû ba Njerusaremu baatairwe.Gwîtwa kwa Njeremia
4 Kiugo kîa Mwathani kîambûyîîra gîkiugaga,
5 “Mbere ûtiraûmbîrwa nda ya nyûkwe i ndaakwiyî.a
Mbere ûtiraciarwa, ndakwathûra,
na ndagûtuîkithia kîroria kîa mîgongo.”
6 Rîru ndauga, “Itû Mwathani Mwene Inya, n'yû ntiiyî kwaria bwega n'ûntû bwa bûra ndî mwana mûnyi.” 7 Îndî Mwathani aancookeria ambîîra, “Ûtikauge atî, ‘Niû ndî mwana mûnyi,’ n'ûntû nwa mwanka ûthi gûntû kunthe kûra ngaagûtûma. Na uuge bûra nkwathîîte uuga. 8 Ûtikaabakuthûke, n'ûntû nkeegagua ndî amwe naawe na ngagûkaragia,” i bu Mwathani akuuga.
9 Rîru Mwathani aataambûrûkia njara yake na aatongithia kanyua gaakwa ambîîra, “Îîndî ngwîkîra biugo biakwa kanyua gaaku. 10 Ta raitha îmunthî ngûkûthuura îgûrû rîa mîgongo na moonene, ûgakûûre na womorange, wînyangie na ûkuûranie, gwake na wande.”
11 Kiugo kîa Mwathani kîambûyîîra, aambûûria, “Njeremia, i mbi ûkwona?” Ndacookia ndauga, “I koong'i ka mûtî wa arimondib nkwona.” 12 Mwathani ambîîra, “Ûkwona bwega, n'ûntû i ndaithîîte mbona kiugo gîakwa gîkîûyûra.”
13 Kiugo kîa Mwathani kîambûyîîra kaîrî aambûûria, “I mbi ûkwona?” Naani ndacookia ndauga, “Ndîona nyûngû îkûtherûka, na mûromo wayo ûrîkîîgama ûrûkîrîte n'egûrû.” 14 Rîru Mwathani ambîîra, “Kînyamaara gîkauma bwa n'egûrû kîîndamîîre bonthe bara batûûraga nthîgûrû îno. 15 N'ûntû ndî akubî gwîta antû bonthe ba moonene ma kuuma bwa rûteere rwa îgûrû. Anene baao bakaaya baige itî biao bia ûnene mîîrîgaani ya Njerusaremu na bathiûrûkîîre nthingo ciayo cionthe amwe na cia taûni ira iingî cionthe cia Njunda. 16 Naani nkaagambithia antû baakwa n'ûntû ibeeyîîtie baantiganîria, baatua kûrutagîra ngai cia mûbuanano igongwana na gûtua kûgongaga ngûgî cia njara ciao.
17 “Îîndî îîthuuranîre ûthi ûkaarie nabo mantû mamu ndakwaatha na ûtikaamake i bo mbûya gûkûmakîria agu mbere yao. 18 Îmunthî ngûgûtuîkithia taûni îmbirigîre na rûthiingo, gîtugî kîa îthaga na rûthiingo rwa rûthuku kîînyume na nthîgûrû yonthe, anene ba Njunda, atongoria baayo, athînjîri baayo ba Ngai na antû bonthe ba nthîgûrû. 19 Bakaarûa naawe îndî batikûûmba, n'ûntû nkeegagua ndî amwe naawe nkûrigagîîrie,” i bu Mwathani akuuga.