Rwong'i rwa Njesii
11
1 Gîtûûngû gîkaaririma kuuma gîtinkûûni kîa Njesii,rwong'i rûgaakûra mîriini yakîo.
2 Kîrundu wa Mwathani agaakaraga îgûrû rîake,
kîrundu wa ûûme na ûmenyo,
kîrundu wa ûgambi na inya,
kîrundu wa kîrîra na gûkuthûka Mwathani.
3 Nwe akaagwîragîîrua gûkuthûka Mwathani.
Atiigambithanagia n'ûntû bwa bûra akwona na meetho,
kana athikîîria nguutû akîgiita îgamba.
4 Îndî akaagambagîra nkîa bûra kûbatîîrue
na bara batarî na inya akabarûthîra bûra kûbatîîrue.
Agaacûnia nthîgûrû na mûthanju wa kanyua gaake,
nau mûruke wa kanyua gaake ûûrage bara bathûûku.
5 Ûtheru i bu ûkeegua bûrî mûcibi wake
na gwîtîgîka i ku akoogeera kauna gaake.
6 Kagiitaani gaka ncûûgi na ng'ondu igaatûûranîîra amwe,
ngo na mbûri nacio ikaamaamanîîra amwe,
kayaû ka ng'ombe na cimba ikaarîyanîra amwe,
na kaana kaniini i ko gakeegagua gacitongoreetie cionthe.
7 Ng'ombe na ndû ikaarîîyanîra amwe
na biana biacio bikaamamanîîra amwe,
na cimba îkaarîyaga nyaki ta ncamba ya ng'ombe.
8 Twana tûkaathekanagîria akubî na mûrinya wa njoka,
na kaana kaniini gakaira njara mûrinyaani wa mpuua.
9 Batiithûûkania kana beenyangania
kunthe kîrîmaani gîakwa kîra kîtheru.
Nûntû wa ta bûra rûûyî rûûyûraga na rûkaguîkîra îria,
nthîgûrû îkeegua yûûyûri antû bagûtîîya Ngai.
10 Kagiita gaku i ko kîthîgîro kîa mûri wa Njesii akaarûngama kîrî kîoneeria kîega kîrî antû na mîgongo yonthe îkeethîrana kîrî we na gîkaro gîake gîkaûyûra ûkumio. 11 Ntugû înu Mwathani agaatambûrûkia njara yake rîa maîrî akûûre matigari ma antû baake barî Asîîria, kuuma Miisiri, kuuma Pathirosi, kinya kuuma Kusi,a kuuma Eramu, kuuma Mbabironi, kuuma Amathi na kinya kuuma tûcîgîîriani twa îria.
12 Akaanenkanîra kîmenyithania kîrî mîgongo yonthe
na eethîranie antû ba Isiraeri bara baatairwe,
na eethîranie antû ba Njunda bara banyegeere
kuuma nteere cionthe irî inya cia nthîgûrû.
13 Rûriitho rwa Eburaimu rûkaathira
na anthû ba Njunda bakaathirua.
Eburaimu îtiîgîîrua Njunda rûriitho kaîrî,
kana Njunda îcereria Eburaimu ûgîti kaîrî.
14 Na mpwî mûno bakeendamîîra iguuruuni bia Afirisiti batarîîte rûteere rwa ûthwîro bwa riûa,
barî amwe batae antû bathi nabo bwa umîîro bwa riûa
bagwate Endomu yonthe na Moabu
na kinya Amoni batue kûbaathîkagîra.
15 Mwathani akaathiria rûrîme rwa îria rîa Miisiri,
na areete ruuo rûrî na mwanki rûbwethie muuro wa Yufîrîti
acuatûrange mîthîîra mûgwanja
bûra antû baûmba kûringa na magûrû.
16 Gûkeethîrwa kûrî na njîra îînene îtigîîtwe n'ûntû bwa matigari ma antû ba Ngai
îra îkeegua îtigîîtwe kuuma Asîîria,
wa ta bûra gwakari kîrî Isiraeri
rîra baumîîte Miisiri.