10
1 Bûkoona thîîna biû bûrûthaga mawatho matarî meega,na bûkeeyana mawatho ma kwinyanîîria.
2 Kaingo bûtûma magamba ma nkîa marega kûgiitagwa bwega,
na ûmma bûrega kûthingatwa kîrî antû baakwa bara bainyîîrîîtue,
bûkainyagîîria aka ba ntigwa
na gûtuunyaga nkîa ira itarî na beethe into.
3 Îîndî bûkaarûtha ata ntugû yenu ya gûkaanûkua,
îra kînyamaara gîkaabûûyîîra kuuma kûraaya?
Bûkaugîria ûû?
n'ûû bûgaatigîra ûtonga bwenu?
4 Na mma ntibûteethia,
nwaka bûgaakururua ta mîgwate
kana bûtaranîrue na bara bakuîte.
Îndî amwe nagûkara ûgu mûthûûro wa Mwathani ûtiigwa,
njara yake nwa yûkîîrîîte.
Kûgambithua gwa Asîîria
5 Bûkoona thîîna biû Asîîria
mûraagi wa mûthûûro gwakwa,
bara ncûgûma ya mûthûûro wakwa îrî njaraani ciao!
6 Ndîbatûma kwithûkîra mûgongo ûtaathîkaga,
mbarekeerie kîrî mûgongo ûra ûnthûûragia,
babagwate mîgwate na batae into biao
na babakinyange ta rûko tûbarabaraani.
7 Îndî ûûgû tibu abangîîte
na tibu bûrî mathûgaaniani,
mûbango wake i kwînyangia,
kûthiria cwe mîgongo îmiingî
8 Arîûria ata rî, “Anga atongoria baakwa bonthe tibo anene?
9 Anga Karino twa ta Karikemisi?
Anga Amathi twa ta Aripandi,
kana Samaria ta Ndamasiki?
10 Wa ta bûra njara yakwa îrenyangiirie moonene mara marombaga mîbuanaano,
moonene mara maraarî na ngai cia mîbuanaano irî îgweta nkûrûki ya cia Njerusaremu na cia Samaria,
11 nwabu nkaarûtha Njerusaremu na mîbuanaano yaayo
wa ta bûra ndaarûthire Samaria na mîbuanaano yaayo.”
12 Mwathani ariuga ata rî, “Rîra nkaarîîkia bûra nkûrûthîra kîrîma gîa Sayuuni na Njerusaremu, ngaakaanûkia mûnene wa Asîîria n'ûntû bwa wîkumia bwa nkoro yake n'ûntû bwa bûra eebonaga arî ûmûnene. 13 N'ûntû ariuga,
‘Ndûthîîte ûûgû na inya yakwa ningwa,
na ûûme bwakwa n'ûntû ndî na ûmenyo bwingî.
Ndaategategia mîanka ya mîgongo
na ndaataa ûtonga bwao
ta ncamba îrî na inya ndaûmbana kîrî ncamba ciao ira irî inya.
14 Wa ta muntû agîkuuyîîria ntara,
nwabu ndaatambûrûkiirie njara ciakwa,
ndaathûkia ûtonga bwa mîgongo.
Wa ta bûra muntû eethîranagia makome maarûûkîre
nwa ta bu ndeethîraniirie mîgongo,
na gûtirî uu woonyoonya,
kana ûtumûra kanyua aaria.’ ”
15 Kathoka rî, kaûmba gwîkumîria muntû ûra ûgûtema nako?
Kana mûcumeno ûgeekumîria muntû ûra ûgûcutûmîra?
Mûkwayû waûmba kûringa gîntû twa kana ûrî mûyiûrie na njara?
Kana ncûgûma yîîbûkîîria yongwa taka îtarî mûtî?
16 N'ûntû bwa ûgu Mwathani wa Njûûrî,
agaatûma bûgwatwa i mûrimo wa kûboobia acikaarî ba njûûrî yaku bara banoru,
na bantû a ûkumio bwaku, antû baaku bakaathira ta bakûbîa i mwanki.
17 Werû bwa Isiraeri bûgaatuîka mwanki,
ûra Mûtheru wao atuîke rûrîrîmbî,
ntugû îmwe akî akaabîîthia na athirie
ntongu na mîîgua mîene tabo antû ba Asîîria.
18 Ûthongi bwa mîthitû yake na mînda îra mînoru
bûthirue cwe
wa ta bûra muntû ûmwayie aboobaga agakua.
19 Matigari ma mîtî ya mûthitû wake makeegua marî makai
bûra kinya kaana kaûmba gûtara.
Matigari ma Isiraeri
20 Kagiitaani gaku matigari ma Isiraeri,
bara boonokeete ba nyomba ya Njakubu,
batiîrîgîîra Asîîria îbateethia
îndî bakeerîgagîîra Mwathani
Ûra Mûtheru wa Isiraeri.
21 Matigari magaacooka,
matigari ma Njakubu
magaacooka kîrî Mwathani Mwene Inya.
22 Isiraeri, wana kinya wegua antû baaku i baingî ta mûthanga wa îria
i baakai bagaatigara
Mwathani n'abangîîte kûbathiria,
kûbathiria kûûyûrîîte wagîru.
23 Kwoogu i Mwathani wa Njûûrî akaûyûria ûntû bûbû
bwa kwîthîrania nthîgûrû yonthe.
24 Kwoogu ûûgû i bu Mwathani wa Njûûrî akuuga,
“Antû baakwa bara batûûraga Sayuuni,
bûtikaamake n'ûntû bwa Asîîria,
bara babûturaga na mîthanju
kana ncûgûma ta bûra Miisiri yaarûthire.
25 N'ûntû gatigeere kagiita gaakai mûthûûro gwakwa kîrî biû ûthire
na marûrû maakwa meerekere kîrî bo mabathirie.”
26 Mwathani wa Njûûrî akabatura na mûthanju,
wa ta bûra aaturire Amindiani naara rwaraani rwa Orebu.
Na agaûkîîria mûraagi wake îgûrû rîa rûûyî,
wa ta bûra aarûthire Miisiri.
27 Înu n'yo ntugû mîrigo îra baabwaîkiirie ituro bienu îkaûrwa,
na îcoki rîra rîrî nkingo cienu rîrutwe
na riunangwe.
28 Raithaani bwone njûûrî îgûkinya Ayathi!
îgûkûrûka Migironi
na into biao baigîîte Mikimasi.
29 Bagûturûkîra mwanyaani wa irîma, bakiugaga,
“Ûtugû bûbû tûrîenda kwamba marema meetû Ngeba.”
Antû ba taûni ya Rama bakainaina n'ûguaya
na bara barî Ngibea taûni ya Saûrû bagaakuthûka.
30 Ugaani mbu biû antû ba Ngarimu!
naabi antû ba Raisa thikîîriani,
naabi biû bûrî Anathothi beetîgeeni!
31 Antû ba taûni ya Mandimena bagûkuthûka,
na ba Ngebimu nabo baaceria bantû a kwîbitha.
32 Îmunthî bakaarûngama Nobu
na bamakie antû ba Njerusaremu,
ta kîo kîrîma gîa Sayuuni.
33 Raithaani bwone Mwathani, Mwathani wa Njûûrî,
akaathîga mpoong'i arî na inya îînene mûno.
Mîtî îra mîraaya îgaatemwa
na îra mîûkîîru yîîndamue bwa nthî.
34 Agaatema mîtî ya mûthitû na kathoka.
Gîtuma kîayo rîra îkîgwa, nwa ta kîa mîtî îra mîraaya ya Rebanoni.