Mwonokia wa Isiraeri aaciarwa
9
1 Gûtiîgua kûrî na kîeba kaîrî kîrî bara baranyamaaraga. Ntugû ira ikûrûkîîte n'amenithiirie nthîgûrû ya Seburuni na nthî ya Nabutarî, îndî ntugû ciiyîîte agaatûma nthîgûrû ya rûteere rûra rûngî rwa Njorondani rûteere rwa îria na kinya Gariiri, naara mîgongo îtûûraga îkumua.2 Antû bara bathiiyagîra mwinduuni
i booneete werû bûûnene.
Na bara batûûraga nthîgûrû ya mwindu wa gîkuû
werû bûkûbathararîra.
3 N'ûthagayîîtie mûgongo ûyû wa Isiraeri,
na wongeera kûgwîrua kwau.
Bagwîragua barî mbere yaku,
ta bûra antû bagwîragua kagiita ka maketha,
kana ta bûra njûûrî igwîragua
îkîgaana bira bataîte.
4 N'ûntû Mwathani akaunanga îcoki
rîra rîthaîkîîte antû baake.
Na kinya mûthanju ûra ûbacûnagia ituro,
wa ta bûra aathiriirie njûûrî ya Amindiani,
na njûûrî înkai ya Ngindioni.
5 Kîraatû kîonthe kîra gîatûmîîrwe ndûani
na nguo yonthe îra yaagwatire nthakame,
nwa mwanka îbîîthue,
bibu bigaatuîka biakûrîa bia mwanki.
6 Nûntû i tûciarîrîîtwe kaana,
twegwa kaana ga kaîyî,
na wathani bûgaakaraga ituro biako.
Nwe ageetagwa mûgambi mûrigarania,
Mwathani Mwene Inya, baaba wa tene na tene,
Mwathani wa ûkiri.
7 Kwongeereka kwa ûnene bwake na ûkiri bitiikinya mûthia.
Akaathanaga akarîrîîte gîtî kîa ûnene kîa îthe Ndaundi
Akaarûngîka ûnene bwake
n'ûntû bwa kûgambîra antû bûra kûbatîîrue
kuuma îîndî mwanka tene na tene.
Ûntû bûbû bûkaûyûra n'ûntû bwa kwenda kwa Mwathani wa Njûûrî.
Mûthûûro wa Mwathani kîrî Isiraeri
8 Mwathani n'athitaangîîte Njakubu
na îgamba rîakinyîîra Isiraeri.
9 Antû bonthe bakaamenya,
bara batwîre Eburaimu na kinya bara bakaraga Samaria.
Bara beebonaga na
bakaaragia na wîkumia bwa nkoro ciao, bakiugaga.
10 “Nyomba cia matubaarî nirombokanire,
îndî tûgaaka cia maiga maacae.
Itugî bia mîkûyû nabio biaunîkanga,
îndî tûgeekîra bia mîthithinda.”
11 Nûntû bwa ûgu Mwathani n'aûkîîrîîtie anthû ba Resini îgûrû rîao
na engîîra anthû baake.
12 Asîîria kuuma bwa rûteere rwa umîîro bwa riûa
na Afirisiti kuuma bwa ûthwîro bwa riûa,
i baatîkîîtie kanyua kaao beenyangia Isiraeri.
Amwe na ûgu mûthûûro wake ti mûthiru,
njara yake nwa yûkîîrîîtue.
13 Amwe na kûnyamaara ûgu,
antû bataagarûkîra Ngai
kana baceria Mwathani wa Njûûrî.
14 N'ûntû bwa ûgu Mwathani akaagiita Isiraeri kîongo na mûtiro
na ateme mîrûgûyû na ndara ntugû îmwe.
15 Atongoria na antû bara barî îgweta i bo biongo,
Iroria bira biaragia ûrongo i bio mîtiro.
16 N'ûntû atongoria ba antû i babîtithîîtie antû njîra,
nabo bara batongoragua baabîtia njîra.
17 Kwoogu Mwathani atiikeneera nthaka ciao
kana egîîrua nkîa na ntigwa kîao.
N'ûntû woora ûmwe waciao atigûkuthûka Ngai
na tûnyua twao twaragia ûrongo.
Amwe na ûgu mûthûûro wake ti mûthiru,
njara yake nwa yûkîîrîîtue.
18 Na mma ûthûûku bwakanaga ta mwanki
bûbîîthagia ntongu na mîîgua mîene.
Bûkabîîthia ithaka na mîthitû
bûgeetithia karongorongo ga ntoogo bwa îgûrû.
19 Gûkûrûkîîra mûthûûro wa Mwathani wa Njûûrî
nthîgûrû îkaabîîthua.
Antû bagaatuîka biakûrîa bia mwanki,
gûtirî we agaatigaria kinya mûruagina.
20 Bagaatuunyanaga na njara ya ûrîo,
îndî bagakaraga babûûti.
Bakarîa na njara ya ûmotho
îndi batiibaa.
Wa muntû akarîa nyama cia mûtûûri wake.
21 Manase akaarîa Eburaimu, na Eburaimu n'we akaarîa Manase,
nabo barî baîrî bacooke bagarûkîre Njunda.
Îndî amwe nagûkara ûgu mûthûûro wa Mwathani ûtiigwa.
Njara yake nwa yûkîîrîîtue.