Rwano rwa kwithûkîrwa gwa Isiraeri
8
1 Rîru Mwathani aacooka ambîîra ata rî, “Thûkia îbuku rîînene wandîke na mwandîkîre ûra ûkûmenyeka bwega, wandîke ûûgû: Maeri-Sarari-Asi-Basi. 2 Na ngeeta mûthînjîri wa Ngai Uria na Sakaria mwana wa Njeberekia barî akûûyî ba mma kîrî n'yû.”3 Rîru naani ndaathi kîrî kîroria kîa mûka, nakîo kîagîa nda na gîaciara kaana ga kaîyî. Mwathani ambîîra, “Geete riîtwa rîako Maeri-Sarari-Asi-Basi. 4 Mbere kaana gaku gatiramenya gwîtana, ‘Baaba kana maama’, ûtonga bunthe bwa Ndamasiki na into bira Samaria yaataîte bikeegua bikûthiîgwa nabio i mûnene wa Asîîria.”
5 Mwathani aaria naani kaîrî ambîîra,
6 “N'ûntû antû baba i baregeete rûûyî rwa Siroa
rûra rûthiiyaga mpoora.
Baakeneera Resini
na mwana wa Remaria,
7 kwoogu Mwathani n'we akaabaretera
rûûyî rwa muuroa rûrî na inya na rûûyiû
ta we mûnene wa Asîîria na njûûrî yake yonthe.
Rûkaûyûra mîthîîra yaaru yonthe
na ruunûke makumbooni maayo monthe.
8 Na rûciate Njunda yonthe,
ûkûrûkîîre ku, na ûriku bwau bûgaakinya mwanka nkingo.
Mathabu mamu maayo îtambûrûkîîtie makaaguîkîra nthîgûrû wa bûra îgana,
woû Imanueri.”
9 Îîbangeeni bûkarûe biû mîgongo na bûkeenyangua!
Thikîîriani biû nthîgûrû cia kûraaya.
Îîbangeeni bûkarûe, na bûkeenyangua!
Îîbangeeni bûkarûe, na bûkeenyangua!
10 Bîndaani njûri yenu, îndî îkaaraganua,
erekeeriani mûbango wenu, îndî ûtiirûngama,
N'ûntû Ngai arî amwe naati.
Kuthûka Ngai
11 Mwathani aaria naani na njara yake ya inya agînkaanagia ntikaathingate njîra cia antû baba. Auga,
12 “Mîbango yonthe îra antû baba babangîîte,
bûtikauge i njûri babîîndîîte.
Bûtigaakuthûke imakania biao,
kana bûguaya.
13 I Mwathani wa Njûûrî wenka bûbatîîrue gûtua ûmûtheru,
n'we wenka bûbatîîrue gûkuthûka,
na n'we wenka ûbatîîrue kûbûguayia,
14 n'we akeegua arî bantû ara atheru,
îndî kîrî nyomba irî ciîrî cia Isiraeri,
akeegua arî iiga rîra rîtûmaga antû bataratara
na rwara rûra rûtûmaga antû bagwa.
Na kîrî antû ba Njerusaremu
akeegua arî mûtego.
15 Baingî baao bagaataratara,
bagwe na baunîkange,
bathûngîre mûtegooni bagwatwe.”
16 Kûnja îbuku rîa ûkûûyî
na ûrikithie watho kîrî arutwa baakwa.
17 Niû ngeeteera Mwathani
ûyu ûkwitha mûciî wa Njakubu ûthiû bwake,
na mbaige wîtîgio bwakwa bunthe kîrî we.
18 Ta ndaitha wone, niû na twana tûra Mwathani ampeete. Tiû tûrî bionanîîria kîrî Isiraeri kuuma kîrî Mwathani wa Njûûrî ûra ûtûûraga kîrîmaani gîa Sayuuni.
19 Rîra antû bakûbwîra bûthi bûkaûrie ûkûrû kîrî agao na aringia, bara baaragia na bioye rî, ga antû batabatîîrue kûûria mantû kuuma kîrî Ngai wao? Kûrî na gîtûmi kîbi kûthi kûûria mantû kuuma kîrî bara bakuû bantû a bara barî mwoyo? 20 Cookaani mawathooni na maathanaani ma Mwathani na wethîrwa batiaragia kûringana na bûra maugîîte, batirî na wîrîgîîro bwa gûkea kwao. 21 Bakaariûnga bakurukanie nthîgûrû barî na thîîna îmbîî na yûûra, n'ûntû bwa yûûra na mûthûûro bakaaraitha îgûrû barume mûnene wao na Ngai wao. 22 Rîru baaraitha nthîgûrû, bakoona kînyamaara na mwindu ûmûnene, gûtirî nwa gîntû gîa gûkeneera. Beengatue bathûngîre mwinduuni ûmûnene.