7
1 Îgiitaani rîru Aasi mwana wa Njothamu, mwana wa Usia, aarî mûnene wa Njunda, i rîo Resini mûnene wa Aramua na Peka mwana wa Remaria mûnene wa Isiraeri beetiirie baathi kwithûkîra Njerusaremu, îndî bataamîûmba.2 Rîra nyomba ya Ndaundi yegiirue atî Aramu n'îgwatanîîte na Eburaimu, nkoro ya Aasi amwe na antû baake ciainaina ta bûra mîtî yiinainagua i ruuo.
3 Rîru Mwathani eera Isaya, “Umagarûka woû na nthaka yaku Seari-Yasubu,b ûkomane na Aasi mûthiani wa mûberethi wa karia ka n'egûrû, njîraani ya kûthi bwa kîeni kîa mûbûûri wa nguo. 4 Ûmwîre, Îîmenyeere, ûtikaaguaye kana ûmaka. Ûtigaakue nkoro n'ûntû bwa itinkû bibi biîrî bigûtooga kana n'ûntû bwa mûthûûro ûmûnene wa Resini, Aramu na mwana wa Remaria. 5 Nûntû Aramu barî na Eburaimu na mwana wa Remaria ibakûbangîrîîte mantû matarî meega bakiugaga, 6 ‘Twithûkîreeni Njunda, tûmakie antû baayo batwathîkîre, na tûtuîkithie mwana wa Tabeeri mûnene amîathage.’ 7 Amwe na ûgu, ûûgû i bu Mwathani akuuga,
‘Ûgu bûtiûmbîka,
na bûtikarîka,
8 n'ûntû kîongo kîa Aramu i Ndamasiki,
na kîongo kîa Ndamasiki i Resini.
Gwa kagiita ka mîanka mîrongo îthanthatû na îtaano
Eburaimu îkeegua înyagaarîîte mîthemba îtaûmba gwîtwa antû.
9 Kîongo kîa Eburaimu i Samaria,
na kîongo gia Samaria i mwana wa Remaria.
Kwoogu bwarega kûrûngama bwega bwîtîgîîtie,
bûtiûmbana nwa aniini.’ ”
Rwano rwa Imanueri
10 Mwathani aaria na Aasi kaîrî amwîra, 11 “Romba Mwathani Ngai waku akwonie rwano, wegua i kuuma mborokerooni ira mborokeru kana i kuuma îgûrû mûno.”
12 Îndî Aasi auga, “Ntiiromba, na ntiigeria Mwathani.”
13 Nwe Isaya abeera ata rî, “Thikîîriani biû antû ba rûrîîyo rwa Ndaundi, anga bwonaga kûnogia antû ta ûntû bûûniini? Îîndî wana Ngai wakwa n'we n'wabu bûkaamûnogia? 14 Kwoogu Mwathani akabûringîra kîama: Mwarî ataamaama na muntû mûrûme akaagîa nda na aciare kaana ga kaîyî, ageete Imanueri.c 15 Nwe akaarîîyaga maguta ma îria na ûkî bwa makindi mwanka kagiita kara akaamenya kwathûrana mantû mara mathûûku akathuura mara meega. 16 Îndî mbere kaana gaku gatiramenya bwega kwathûrana mara meega na mara mathûûku gakathuura mara meega, nthîgûrû cia anene babu baîrî bûgûkuthûka ikeegua irî maganjo. 17 Mwathani agakûretera woû na antû baaku na antû ba rûrîîyo rwa abaagu kagiita bûtaaro bûkoona kaîrî kuuma Eburaimu îkwathûkana na Njunda, n'ûntû akabûretera mûnene wa Asîîria.”
18 Kagiita gaku gaakinya akaugîria kîthiene ngi kuuma miurooni îra îrî Miisiri naara kûraaya, na njûkî kuuma nthîgûrû ya Asîîria. 19 Cionthe ciiye na itûûre ibondeeni bira bitarî na antû, na makurunguuni ma maiga, na mîtîîni yonthe îra îrî mîîgua, na nthongooni cionthe cia rûûyî. 20 Ntugû înu Mwathani agaakombora rwembe kuuma rûgongo rwa muuro wa Yufîrîti taru mûnene wa Asîîria, rwa kûbwenja biongo, ireru na kinya ntundu cienu cia magûrû. 21 Ntugûûni inu gûgaakara ûûgû, muntû akaarîîthia moori îmwe na ng'ondud ciîrî. 22 Na n'ûntû nyamû inu ikaumaga îria riingî, akaarîyaga maguta ma îria na ûkî bwa makindi. 23 Ntugûûni inu bantû ara kûreethagîrwa kûrî na mîcabiibû îkîûmba kuuma ta fetha ngiri agaatuîka bantû a matî marî mîîgua. 24 Muntû ûra akaathiyaga ku akaathiyaga na mîgwî na ûta, n'ûntû nthîgûrû yonthe ûkeegua yûûyûri ndamata na mîîgua. 25 Na irîmaani kûra antû baarîmaga na mîro, bûtiikinya noo kaîrî n'ûntû bwa ndamata na mîîgua. Gûgaatuîka gûntû gwa kwangaga ng'ombe wa bûra ikeenda na kinya ng'ondu i ku ikaariûngaga.