Mwîto wa kîroria Isaya
6
1 Mwankaani ûra mûnene Usia aakuire,a i rîo ndoonire Mwathani akarîrîîte gîtî gîake kîa ûnene na rwambambio rwake rwaûyûra Nyomba ya Ngai. 2 Îgûrû rîake i kwarî na araîka bara beetagwa aserafi na wa kîra ûmwe aarî na mathabu mathanthatû, mathabu maîrî i mo baakunîkagîra namo moothiû maao, mara mangî maîrî namo bagakunîkîra namo magûrû maao, na mara mangî maîrî i mo baabuurûûkaga namo. 3 Na woora ûmwe n'etaga ûra ûngî akiugaga,“Mûtheru, mûtheru, mûtheru i Mwathani wa Njûûrî,
nthîgûrû yonthe yûûyûri ûkumio bwake.”
4 N'ûntû bwa gîtuma kîao, itugî bia mwîrîga na bira birûngîkîîte Nyomba ya Ngai biainaina na nyomba yonthe yaûyûra ntoogo.
5 Naani ndeekaîra nkiugaga, “Irû yîî nkûûra, n'ûntû niû ndî muntû ûrî mîromo îrî rûko, na ntûûranagîra na antû barî mîromo îrî rûko, na meetho maakwa makwona mûnene, Mwathani wa Njûûrî.”
6 Rîru ûmwe wa aserafi babu aaya kîrî niû abuurûkîîte arî na îkara njaraani ciake arîgwete na mîgwati kuuma kîthînjîrooni. 7 Andingithia narîo kanyua gaakwa auga, “Cûûba wone rîrî i rîo rîaringithia mîromo yaku. Mabîtia maaku makûthirua na wîyia bwaku bwatherua.”
8 Rîru ndeegua kayû ka Mwathani gakîûria, “N'ûû ngûtûma? Na n'ûû ûkaathi n'ûntû bwetû?”
Ndacookia ndauga, “Ndî aaga ntûma!”
9 Ambîîra, “Îthi wîre antû babu ûûgû,
‘Îgaguani mma îndî bûtiiciûra.
Bûcûûbage îndî bûtiona kûnûû.’
10 Tûma biongo bia antû baba birege gûciûkîrwa,
ûcooke ûtûme matû maao matige kwîgua,
na meetho maao matige kwona,
kaingo bateegua na matû,
kana boona na meetho
kana baciûra mantû na mathûgaania maao,
baaya kûgarûka boorua.”
11 Rîru ndaûria ata rî, “I mwanka rî itû Mwathani?”
Ancookeria ambîîra,
“Mwanka rîra taûni cionthe îgaatuîka maganjo
gûtarî muntû wa gûtûûra ku,
na nyomba wîgue itarî na antû,
na nthîgûrû îkire îbooru.
12 Mwanka rîra Mwathani akaabathaamia abaire nthî cia kûraaya
nthîgûrû îtigwe îrî îganjo.
13 Na kinya gîcuncî gîa îkûmi gîkaaya kwîgua gîtigeere,
nthîgûrû îkeenyangua kaîrî.
Îndî wa ta bûra mûtî ta mûterebinithi na mûpuru
ûtemagwa ûgatiga gîtinkû,
Nwabu mbeû îno ntheru îgaatiga gîtinkû nthîgûrû îno.”