Njuno ya mûnda wa ncabiibû ûra ûtaaciara maciaro meega
5
1 Ka mbinîre mwendwa wakwa rwîmbo,naru i rwîmbo rwa mûnda wake wa mîcabiibû.
Mwendwa wakwa n'aarî na mûnda wake wa mîcabiibû
warî karîmaani kanoru mûno.
2 Aacimbire mûnda na eethîrania maiga,
na aanda mbeû ira nthongi cia ncabiibû.
Acooka aaka kîbayo
na kinya athondeka bantû a gwitîîra ncabiibû.
Rîru eeteera mîcabiibû yake îciara ncabiibû imbega,
n'yo yaciara ncabiibû cia kîthaka.
3 “Îîndî biû antû ba Njerusaremu na kinya biû antû ba Njunda,
ngiitîraani îgamba gatîgatî gaakwa na mûnda ûyû wa mîcabiibû.
4 N'ata bûngî nkîrûtha mûnda ûyû wakwa wa mîcabiibû
nkûrûki ya ûgu ncurûthîîte?
N'ûntû mbeteereete ncabiibû imbega,
ûraciarire ncabiibû cia kîthaka.
5 Îîndî ûûgû i bu nkaarûtha
mûnda ûyû wakwa wa mîcabiibû.
Nkaatharia rwinci runthe
nau wînyangue.
Mbaraganie rûthingo rûra rûcuthiûrûkîîte
kaingo ûkinyangwa.
6 Ncutuîkithie kîgûndû gîtarî gîtûmi
gîtarîmagwa kana mîcabiibû yarua mpoong'i,
nwa mîtî îrî mîîgua îkaumaga ku.
Ncooke mbathe matu
matikaume mbura.”
7 Antû ba Isiraeri,
i bo mûnda wa mîcabiibû wa Mwathani wa Njûûrî.
Na antû arûme ba Njunda,
i bo mîcabiibû îra aandîîte.
Eendaga kwona gûtuîrwa kwa magamba kwa mma,
îndî kîra oonaga i gûtûûrwa kwa nthakame,
akeenda kwona ûtheru, îndî akeegua irîro n'ûntû bwa kwinyanîîria.
Moothûûku mara antû barûthaga
8 Bûkoona thîîna biû bara bwongagîîra nyomba bûkiigwatithanagia na ira iingî bûrî nacio,
na mînda bûkîgwatithanagia na îra îîngî bûrî n'yo,
mwanka gûgatuîka gûtirî kaanya gatigeere,
bwengeerie gûtigwa bûtwîre nthîgûrû îno bwinka.
9 Mwathani wa Njûûrî augîîte ûûgû nkîîgagua na matû maakwa,
“Na mma nyomba inu nene igaatuîka îganjo,
nyomba inu nene inthongi igaatigwa itarî muntû wa gûkara ku.
10 Mûnda wa mîcabiibû wa îka îkûmi, ûkauma ta rita mîrongo îîrî na ciîrî cia ndibei,
ndebe îmwe ya mbeû ya kwanda îgaaciara maciaro ma mûkebe ûmwe.”
11 Bakoona thîîna bara baraûkaga rûkîîrî
gûceria ncoobi banyua,
bara bakaraga mwanka ûtugû mainda mara manene
mwanka bagatogoona cwe.
12 Biathooni bibu biao beegagua barî na wandîndî cia ndigi inyingî na inanda bia mîthemba,
tamburini, mbeebe na ncoobi.
Batithûgaanagîria Mwathani,
kana batîîya ngûgî cia njara ciake.
13 N'ûntû bwa ûgu antû baakwa bakaagwatwa mîgwate bairwe nthî cia kûûngî
n'ûntû bwa kwaga ûmenyo.
Atongoria baao bagaakua i yûûra,
antû bara bangî nabo bakue i bûûta.
14 Kwoogu îcamaarîro irîgîîte guuru înene mûno
na rîatîkia kanyua nkûrûki ya kîthimi,
kaingo rîûmba kûmeria atongoria amwe na kîrîndî,
na bonthe kîrî bo bara beekenagia bathûngagîra ku.
15 Kwoogu muntû akeendamua
na muntû anyiithue,
meetho ma mwîkumia manyiithue.
16 Îndî Mwathani wa Njûûrî agaakumithua n'ûntû bwa ûmma bwake,
na Ngai ûra mûtheru akoonania ûtheru bwake n'ûntû bwa wagîru bwake.
17 Rîru i rîo ng'ondu ikaarîyaga ta irî rûriîni rwacio ciongwa,
ntûrûme na tûgondu ikaarîîyaga maganjooni ma itonga.a
18 Bûkoona thîîna biû bûkuuyagia meeyia na mîkanda ya ûrongo,
na ûthûûku ta mîkanda ya nkaarî cia ng'ombe.
19 Kîrî bara baugaga, “Mwathani n'arûthange bwa mpwî,
n'arîîkie ngûgî yake tûmîone.
Mûbango wa Ûra Mûtheru wa Isiraeri n'ûûyûre,
kaingo tûcumenya.”
20 Bûkoona thîîna biû bwîtaga ûthûûku wega,
na bûgeeta wega ûthûûku,
biû bwîtaga mwindu werû,
na werû bûkabuîta mwindu,
bûgeeta mûrîo gana
na gana bûkamîîta mûrîo.
21 Bakoona thîîna bara beebonaga bongwa barî na ûmenyo
na bakeebona barî baûgî.
22 Bûkoona thîîna biû ncamba cia kûnyua ncoobi
na aûmbani mantûûni ma kuungania biakûnyua bira bitogoonagia,
23 bara batuuyagîîra muntû ûra arî na mabîtia bakauga atirî namo n'ûntû bwa ngukumo,
na bûkarega gûtuîra ûra atarî na mabîtia bwega bûkauga arî na mabîtia.
24 N'ûntû bwa ûgu, wa ta bûra mwanki ûbîîthagia rûûa
kana wa ta bûra nyaki îmbûmo yûûkaga rûrîrîmbî,
nwabu mîîrî yao îkoora
na marao maao mabuurûkue i ruuo ta tîîri,
n'ûntû i bareganîîte na watho bwa Mwathani wa Njûûrî
na baamena kiugo kîa Ûra Mûtheru wa Isiraeri.
25 Kwoogu Mwathani n'athûûri n'antû baake
na aûkîîria njara yake abaringa,
irîma biainaina
biimba biao bianyagaara ta rûko naagu tûbarabaraani.
Îndî amwe na ûgu mûthûûro wake ti mûthiru,
nwa aûkîîrîîtie njara yake.
26 Ageeta nthîgûrû cia kûraaya,
na augîrie kîthiene bara barî mîthia ya nthîgûrû.
Nabo baaye na mpwî mûno baugîîtie!
27 Gûtarî we ûkûnoga kana ataratara,
gûtarî we ûkûng'onta kana amaama,
gûtarî we aregereetie mûcibi kauna gaake,
kana kîraatû gîake gîtuîka mûkanda.
28 Batumîîte nta ciao
na mîgwî yao banooreete.
Ncûûga cia mbaraathi ciao ciûmîîte ta maiga,
na magûrû ma mbaraathi ciao marî rwîro ta kîbuubani.
29 Mûrurumo wao ûkari ta wa cimba
barurumaga ta biunga bia cimba
rîra biînganîîte na nyamû biûraga,
biaûraga bigakamata na gûtirî we ûbituunya.
30 Ntugû înu yaakinya bakaagondokera Isiraeri,
wa ta bûra îria rîgondokaga.
Mwanka muntû araitha nthîgûrû ûgu,
akoonaga mwindu n'ûntû bwa kînyamaara
n'ûntû werû bûkaithwa i matu mara ûkeegua marî îgûrû.