14
1 Mwekûrû ûmûûme n'aakaga mûciî wake,îndî ûra kîaa atharagia na njara ciake wengwa.
2 Ûra mwega mîtugo yake n'yonanagia n'atîîyaga Mwathani,
îndî ûra arî mîtugo îmîthûûku n'yonanagia atitîîyaga Mwathani.
3 Kanyua ga kîaa kamûreetagîra mûthanju mûgongo,
îndî mîromo ya muntû ûmûûme n'îmûrigagîîria.
4 Ûtarî na ng'ombe cia kûrîma ûtiketha gîntû,
îndî ûrî nacio makûmbî maaku makaûyûra irio.
5 Mûnkûûyî wa mma atiaragia ûrongo,
îndî mûkûûyî mûûrongo aaragia ûrongo bûtheri.
6 Muntû arî na kabûthia na agaceria ûûme atibuona,
îndî muntû arî na gûciûkîrwa n'agîtaga ûmenyo na mpwî.
7 Ûtigaakaranie na biaa,
n'ûntû gûtirî ûûme ûkoona.
8 Antû bara barî na ûûme i baiyî njîra ciao bwega,
îndî biaa i kûûra biûraga.
9 Biaa i bikenagîîra meeyia,
îndî antû bara beega i barombaga ûrekeri.
10 Gûtirî muntû ûngî aûmba kûmenya
bûra nkoro yaku îthûûri kana îkeneete bûgana.
11 Îrema rîa muntû ûmwega i rîtûûraga
nkûrûki ya nyomba ya muntû ûmûthûûku.
12 Kûrî njîra yoonekanaga îrî mbega meethooni ma muntû,
îndî mûthia wayo i gîkuû.
13 Kîeba gîa nkoro nwa kîîbithe nthekooni,
kana kûgwîrua gûkarîîkîîria na kîeba.
14 Muntû ûra mûthûûku akaarîua mîtugo yake îmîthûûku,
muntû ûmwega naganagîrwa nkorooni yake wengwa.
15 Kîaa i gîîtîgagia ntheto cionthe ira kîîgagua,
îndî muntû ûmûûgî namenyagîîra mûno njîra ciake ira athiyaga nacio.
16 Muntû arî na ûûme n'akuthûkaga na akeebana na ûthûûku,
îndî kîaa kîûyûrîîtwe n'ûgîti na kwîbîtîgia.
17 Muntû ûra athûûrangaga na mpwî n'arûthaga mantû ma ûtaku,
na bara barûthaga mîbango îmîthûûku i bathwîrwe.
18 Rûgai rwa biaa n'ûriitu,
îndî bara baûme i beekagîrwa nthûmbî ya ûmenyo.
19 Antû bara bathûûku baturagia maru mbere ya bara beega,
nabo bara beeyagia baturie maru mîîrîgaani ya antû ba Ngai.
20 Nkîa nîthwîrwe kinya i mûtûûri wayo,
îndî gîtonga kîrî acoore baingî mûno.
21 Muntû ûra amenagîîria mûtûûri wake i wîyia arûthaga,
îndî ûra eegagîîrua nkîa kîao n'onaga kûgwîrua.
22 I meeyia kûbanga mîbango îmîthûûku,
îndî bara babaangaga mîbango îmîega i boonaga mawega na kîao.
23 Ngûgî cionthe cia inya irî baita,
îndî rwaria rwa mûromo akî rûtirî gîntû.
24 Antû baûme i beeyagwa kîegwa gîa ûtonga. Ûmenyo nwa bûtûme ûgatuîka gîtonga kîînene,
îndî waa bûtûmaga muntû ariita nkûrûki.
25 Mûnkûûyî wa mma n'onokagia mîoyo ya antû,
îndî mûnkûûyî wa ûrongo i kwenania enanagia.
26 Muntû ûra akuthûkaga Mwathani arî na wîrîgîîro bûûriku,
kinya aana baake bakoona bantû a kûnogoka.
27 Gûkuthûka Mwathani i kîthima kîa mwoyo,
i kîgarûraga muntû kuuma mîtegooni ya gîkuû.
28 Ûkumio bwa mûnene bûringanaga na wingî bwa antû bara akwatha,
kwoogu kûnyiia gwa antû i ku kwaga inya gwake.
29 Ûra atathûûrangaga na mpwî arî na gûciûkîrwa,
îndî muntû wa nkoro ya kûthûûra n'onanagia bûra atakîîte bûgana.
30 Nkoro îrî na ûkiri mwîrî n'wîgagua ûrî mwega,
îndî rûriitho i ta woru bûrî maîndîîni.
31 Ûra ainyagîîria bara barî na ûbatu,
i kûruma arumaga ûra wabaûmbire;
Îndî ûra abeegagîîrua kîao,
i kûmûtîîya amûtîîyaga.
32 Antû bara bathûûku bagwîthagua i moothûûku maao mara barûthîîte,
îndî antû bara baagîru barî na wîrîgîîro kinya gîkuûni kîao.
33 Ûûme akaraga nkorooni ya muntû ûra arî na kîrîra,
îndî ti mathûgaaniani ma kîaa.
34 Wagîru i bûtûmaga mûgongo ûtîîywa,
îndî wîyia i bûtûmaga mûgongo unthe ûgîa îgi.
35 Mûnene n'endagîîra aruti ngûgî bara barutaga ngûgî na ûûme,
îndî mûthûûro wake n'ûgwataga bara barutaga ngûgî cia îgi.