13
1 Mwana ûmûûgî n'athikagîîria mataaro ma îthe,îndî ûra mûûmo kîongo atithikagîîria agîkaanua.
2 Muntû akoonaga wega kuumania na rwaria rwa kanyua gaake,
îndî muntû ûmûthûûku i kînyamaara akoonaga.
3 Muntû ûra amenyagîîra kanyua gaake,
n'we wengwa amenyagîîra ûtûûro bwake.
Îndî muntû ûra aaragia wa ûgu,
i kînyamaara agwataga.
4 Nkoro ya mûthao îtûûraga kwîrirîria gîntû na îtikîonaga,
îndî nkoro ya muntû arî na wîru n'înoraga.
5 Muntû ûmwega n'amenaga kwaria ûrongo,
îndî muntû ûmûthûûku arûthaga mantû mathûûku na akagîa îgi.
6 Ûmma i bûkaragia muntû ûra athiiyaga na mîthiîre îmîega,
îndî ûthûûku i bûgwîthagia muntû wa meeyia.
7 Kûrî muntû eebonaga ta arî gîtonga îndî gûtirî kîo arî,
na kûrî muntû etuîkithagia nkîa na i gîtonga kîînene mûno.
8 Itonga birîaga mbia kaingo biîkûûra bitûûra mwoyo,
îndî nkîa gûtirî we ûmîmakagia n'ûntû gûtirî kîo îrî gîa gwîkûûra nakîo.
9 Werû bwa antû bara baagîru i bûthararaga mûno,
îndî taa ya antû bara bathûûku îkoora.
10 Wîkumia nwa matheta bûreetaga,
îndî ûûme bwonekanaga kîrî bara bathingataga mataaro.
11 Mbia ira cionekeete na njîra inthûûku ikaûra mpoora mpoora,
12 Wîrîgîîro bûra bwetagîîrwa mûno i bûtûmaga nkoro yaayua,
îndî wîrîgîîro bûra bûûyûraga i ta mûtî wa mwoyo.
13 Ûra ûmenagîîria moorutani i kînyamaara eereetagîîra wengwa,
îndî ûra amenyagîîra watho akoona kîewa.
14 Ûrutani bwa bara baûme i kîthima kîa mwoyo,
i kîgarûraga muntû kuuma mîtegooni ya gîkuû.
15 Gûciûkîrwa i gûtûmaga muntû atîîywa,
îndî bara batarî eetîgua i njîra ya mûûro bagwete.
16 Muntû arî na kîrîra arûthaga mantû na ûmenyo,
îndî muntû ûmûriitu aaragia ûtaku bûtheri.
17 Mûtûmwa ûmûthûûku n'athûngagîra ûthûûkuuni,
îndî mûtûmwa mwîtîgua areetaga ûkiri.
18 Muntû ûra aregaga gûkaanûkua akaagwatwa n'ûkîa na îgi,
îndî ûra eetîgagîîria gûkaanûkua n'atîîyagwa.
19 Wîrîgîîro bûûyûrie i bûtûmaga nkoro yîîgua bwega,
îndî kîaa ikîthwîre kuuma ûthûûkuuni.
20 Thiyanagia na acoore barî na ûûme naawe ûkaagîa na ûmenyo,
N'ûntû mûcoore wa biaa akeenyangua.
21 Kînyamaara i kîthingatanaga na mwîyia,
îndî muntû ûra arûthaga bwega akoonaga mawega.
22 Antû bara beega i bagîîyaga na into bia gûtigîra kinya booyûûe,
îndî into bia bara bathûûku bithiiyagwa nabio i bara beega.
23 Wana kinya mûnda wa nkîa ûkauma i rîo biingî,
i beenagîîrua bagatuunywa bio.
24 Ûkeegua wendete aana baaku ûkabakaanûkagia,
îndî ûkeegua ûtibendete ûtiitindanîra na kûbakaanûkia.
25 Muntû ûmwagîru arîîyaga mwanka akabaa,
îndî ûmûûî ationa gantû ga kûrûma.