12
1 Muntû ûra endaga gûkaanua n'endeete ûmenyo,îndî ûra athûûraga gûkaanûkua n'ûmûriitu.
2 Mwathani n'endeete muntû ûra atûûraga mûtûûrîre ûmwega,
Îndî nakaanûkagia muntû ûra abaangaga mîbango îmîthûûku.
3 Muntû ûra eyagia atiirûngama erikîîtie,
îndî antû bara batheru bagaatûûra beerikîîtie
ta mûtî ûrî na mîri îmîraaya.
4 Mwekûrû ûmwega i ta nthûmbî kîrî mwene,
îndî ûra airaga mwene îgi akari ta kanca maîndîîni ma mwene.
5 Mathûgaania ma antû beega i ma mma,
îndî ûtigeetîgie mathûgania ma muntû ûmûthûûku.
6 Mataaro mathûûku i ta mûtego ûmûthûûku
îndî mataaro meega i moonokagia.
7 Antû bara bathûûku bathiraga
bakaûra cwe,
Îndî mîciî ya bara batheru
îgaatûûra tene na tene.
8 Muntû ûmûûgî nakumagua,
îndî kîaa i kîmenagwa.
9 Na kaaba gûtûûra ta muntû atarî gîntû îndî ûrî na mûruti ngûgî,
nkûrûki ya gwîtuîkithia gîtonga îndî ûtarî na biakûrîa.
10 Muntû ûmwega N'eegagîîrua nyamû ciake kîao,
îndî muntû ûmûthûûku atiûranagia nacio.
11 Ûra arutaga ngûgî mûndaani n'agîtaga irio biingî,
îndî ûra eenganaga na mantû matarî gîtûmi i kîaa.
12 Antû bara bathûûku
beendaga kûrûthaga mantû mara mathûûku,
Îndî bara beega
bakari ta mîtî îra îrî na mîri îmîriku.
13 Muntû ûmûthûûku agwatagwa i mûtego wa rwaria rwake rwa wîyia,
îndî muntû ûmwagîru noonokaga thîîna.
14 Tweyagwa biewa kana tûgakaanûkua
n'ûntû bwa bûra twaragia kana bûra tûrûthaga.
15 Njîra ya kîaa yoonekaga taka îrî mbega meethooni maakîo,
îndî muntû ûra mûûme n'athikagîîria mataaro.
16 Muntû ûmûriitu akathûûra n'onanagia mûthûûro na mpwî,
îndî muntû ûmûûgî n'aithaga kinya îgi.
17 Muntû ûra aaragia mantû matarî ma ûrongo n'atûmaga ûmma bûmenyeka,
îndî mûûrongo natûmaga ûmma bûûra.
18 Rwaria rwa mpwî mpwî rûmuntaga ta rûûyiû,
îndî rûrîme rwa muntû ûmûûgî rûreetaga kworua.
19 Kanyua kara kaaragia ûmma,
gatûûraga tene na tene,
Îndî rûrîme rûra rwaragia ûrongo
i rwa kagiita gaakai.
20 Mathûgaania maathûûku
i meenanagia,
Îndî mathûgaania meega
mareetaga kûgwîrua.
21 Antû bara beega bationaga thîîna,
îndî bara bathûûku barî na thîîna inyingî mûno.
22 Mwathani n'athwîre mûûrongo wonthe,
îndî i mûcore wa bara eetîgua.
23 Muntû ûmûûgî akiraga na ûmenyo bwake,
îndî biaa bionanagia waa bwa nkoro ciao bantû onthe.
24 Ruta ngûgî na inya mûno naawe ûgaatuîka mûtongoria,
îndî wegua ûrî mûthao ûgaatuîka nkombo.
25 Mînoga ya nkoro n'inyagîîria muntû,
îndî kanyua keega i kamîgwîragia.
26 Muntû ûmûtheru n'emenyagîîra kîrî acoore baake,
îndî mîtugo ya antû bara bathûûku n'îbabîtithagia njîra.
27 Mûthao atiûmbaga kinya kûruga bira ooneete wathiini bwake,
îndî muntû ûra arî nkena n'amenyagîîra ûtonga bwake.
28 Kûrî na mwoyo njîraani cia wagîru,
na kûra ikûrûkagîîra gûtirî gîkuû.