Menyeera biugo biaku
11
1 Mwathani nathwîre muntû wonthe ûra atûmagîra kîthimi kîa ûrongo.Îndî nakenaga i muntû wonthe ûra mwîtîgua.
2 Wîkumia bûûnene i bûtûmaga ûgîa îgi,
îndî kwînyiia i kûreetaga ûûme.
3 Kwagîra kwa antû bara beega gûkabatongoria,
îndî ûthûûku bwa antû bara barî bitina bûkabeenyangia.
4 Gûtirî bu ûtonga bûgaagûtethia ntugû ya gûkua,
îndî ûmma nwa bwonokie mwoyo waku.
5 Gwîtîgîka i gûtûmaga njîra cia muntû ciîthîrwa irî mbega,
îndî bara bathûûku bageecwîra kûgwa kwao bongwa.
6 Ûtheru i bûtuunyûkagia muntû ûra mwîtîgua,
îndî bara batarî eetîgua bakaagwatwa i mûtego wa îtanûka rîao bongwa.
7 Rîra muntû ûra mûthûûku akuuyaga,
wîgwatio bwake i bûthiraga.
Na kinya wîrîgîîro bwake
i bûthiraga.
8 Muntû ûra mwega noonokagua akauma thîînaani,
ûra mûthûûku agaacooka ku bantû aake.
9 Muntû ûra ataiyî Ngai eenyangagia mûtûûri wake na kanyua gaake,
Îndî bara beega bagateetheka n'ûmenyo.
10 Rîra antû bara beega bagîîyaga na ûtonga, taûni nîkenaga,
na rîra bara bathûûku bakûthira, antû i bakenaga.
11 Taûni îgîîyaga inya n'ûntû bwa ithaarimo bia antû bara batheru,
îndî nîînyangagua i biugo bia antû bara bathûûku.
12 I waa kwaria mantû maathûûku
ma mûtûûri waku.
Îndî ûkeegua ûrî muntû arî na gûciûkîrwa,
nûkira.
13 Muntû wa nguutû naumbûraga mantû ma witho
îndî muntû mwîtîgua,
naigaga ciri.
14 Taûni îtarî na atongoria baûme,
îkaarigia na kwînyangua,
îndî taûni îrî na atongoria baûme,
îgaatûûra bwega.
15 Ûra eerutaga kûrûgamîîra îrandû rîkoobetwe i mûgeni,
atirega kûnyamaara. Îndî ûra aregaga kûrûngamîîra îrandû atirî na thîîna.
16 Mûka ûmwega natîîyagwa,
îndî antû arûme bara barî inya i batongaga.
17 Muntû ûra wîganagîîrua kîao
nwe wengwa eeteethagia,
îndî muntû ûtarî kîao
nwe wengwa eegagua akîîthûûkia.
18 Ûthûûku bûtiteethagia muntû,
îndî wega i bûrîagwa.
19 Rîonthe rûthaga mantû mara meega,
naawe ûgaatûûra mwoyo.
Wakara ûkîrûthaga mantû maathûûku,
n'ûgaakua.
20 Mwathani n'athwîre antû bara barî nkoro inthûûku,
îndî nagwîragua i bara barûthaga mantû mara meega.
21 Na mma wana kinya gwakara ata,
antû bara bathûûku nwa mwanka bagaakaanûkua.
Îndî rûciaro rwa bara beega,
rûkoonokua.
22 Mwekûrû ûmûthongi atarî na ûûme,
akari ta mbete ya thaabu
yîîkîrîîtwe nyiûrû ya ngûrwe.
23 Wendi bwa muntû ûmwega i bûreetaga ûkiri,
îndî muntû ûmûthûûku areetaga bitina.
24 Antû bamwe baneenkanagîra mûno îndî bagatonga nkûrûki,
bangî bagakûûna îndî bagatuîka nkîa.
25 Muntû ûra aneenkanagîra into biake agaakara bwega.
Wateethia bara bangî naawe ûgaateethua.
26 Muntû ûra aithaga irio
akaaya kuumbûra ûgûri bwetia
n'akaarumwa n'antû,
Endia irio na ûgûri bwega
naawe ûkaathaarimwa.
27 Ûra enyamaaragia agîceria wega,
natîîyagwa,
Îndî wathi ûgîceragia thîîna,
ûkoona kînyamaara.
28 Muntû ûra egwatagia ûtonga
akaûrûrûka ta mathangû.
Îndî muntû ûra mûtheru
akaaririma ta mathangû.
29 Antû bara bareetaga thîîna mîciî yao
mûthiani gûtirî kîo bakoona.
Antû bara bariitu
bagaatuîka nkombo cia bara baûgî.
30 Watûûra bwega
ûkaarîa matunda ma mûtî wa mwoyo,
îndî warûtha ûthûûku,
n'ûgaakua.
31 Wegua muntû ûra mwega akoona îrîi aaga nthîgûrû rî,
î muntû ûra mûthûûku na mwîyia ti nkûrûki?