Njuno iingî cia Soromoni
10
1 Ino i cio njuno cia Soromoni: Mwana ûmûûme natûmaga îthe akumua,îndî mwana ûra kîaa areetagîra gina kîrîro.
2 Ûtonga bûra wîgwatagîra na njîra îtarî mbega bûtigûteethia,
îndî ûmma nwa bûgûteethie.
3 Wathîkîra Mwathani ûtiaga gantû ga kûrîa.
Wegua ûrî muntû ûmûthûûku,
Ngai atiireka ûgîta kîra ûkwenda.
4 Ûthao bûtûmaga muntû atuîka nkîa,
îndî kûruta ngûgî gûgaatûma muntû atonga.
5 Mwana ûra wîrutanagîria kagiita ka maketha n'ûmûûme,
îndî ûra amaamaga kagiita ka maketha n'îgi agîîyaga.
6 Ithaarimo birî kîongo kîa muntû ûra mûûme,
îndî kanyua ga kîaa kaûyûri irumi.
7 Mûririkana wa antû beega wîgagua ûrî kîthaarimo,
îndî antû baathûûku
bariganagîria warîru.
8 Ûra arî na ûûme bwa nkoro,
n'aathîkagîra mawatho,
îndî ûra mûtaku
i kwaria aaragia mûno
na akeenyangua.
9 Muntû ûra arî mîkarîre îmîega
nataragîîria bwega njîra ciake,
îndî ûra agarûraga mîkarîre yake akaamenyerwa.
10 Ûra eenanagia na njîra ya kuunanîra meetho areetaga kîeba,
na kîaa kîra kîaragia mûno i gîkeenyangua.
11 Kanyua ka muntû arî na ûûme i kîthima kîa mwoyo,
îndî kanyua ka muntû ûmûthûûku kaûyûri biugo biîî.
12 Kûmenana i ku kûreetaga matheta,
îndî wendo i bûkunîkagîra mabîtia monthe.
13 Ûûme i bwonaraga kanyuani ka muntû ûmûûgî,
îndî muntû ûmûriitu eendaga mûthanju.
14 Antû bara baûgî i baigaga ûmenyo bunthe bûra beendaga,
îndî kanyua ka muntû ûmûriitu kaumaga wînyangia bwa mpwî.
15 Ûtonga bwa gîtonga i taûni yake îra mbirigîre,
na kînyamaara gîa nkîa n'ûkîa bwakîo.
16 Ngûgî ya muntû ûra mwega yeerekereete Mwoyooni,
îndî maciaro ma bara bathûûku i wîyia.
17 Muntû ûra eetîgagîîria îkaanûkia arî njîraani ya mwoyo,
îndî ûra ateetîgagîîria gûkaanûkua nabîtithagia bara bangî njîra.
18 Muntû ûra aithaga ûthû i mûûrongo,
na ûra atambagia nguutû i kîaa.
19 Ûkaaria mantû maingî, mamwe matiîgua marî meega. Kwoogu menyeera rîra ûkwaria, ûkaaragia na ûûme.
20 Biugo bia muntû arî na ûûme bikari ta fetha înkembe,
îndî mathûgaania ma muntû ûmûthûûku matirî gîtûmi.
21 Biugo bia muntû arî na ûûme nwa biteethie antû baingî mûno,
îndî biaa bikuuyaga i waa bwa bio biongwa.
22 I kîthaarimo kîa Mwathani gîtûmaga muntû atonga,
Mwathani ationgagîîra kînyamaara ûtongaani bwaku.
23 Biaa bikenagîîra kûrûtha ûthûûku,
îndî muntû ûrî na gûciûkîrwa
akenagîîra kûrûtha mantû na ûûme.
24 Ûntû bûra muntû ûra mûthûûku
athwîre mûno
i bu bûkaamûgwata.
Îndî antû bara beega
boonaga bira beendaga mûno.
25 Ibuubani biiyaga bikathiria bara bathûûku,
îndî Ngai narigagîîria bara bamwathîkagîra.
26 Kwîgua ûrî na muntû wa ûthao ngûgîîni,
nwa ta ncoobi îrî kanyua
kana ntoogo îrî meetho.
27 Watua gûkuthûka Mwathani
ûgaatûûra îgiita rîîraaya.
Îndî ûgatûûra ûkîîyagia,
ûtûûro bwaku bûgaakubîithua.
28 Watua kwathîkagîra Mwathani ûgaatûûraga ûkeneete,
îndî bara beeyagia batirî na wîrîgîîro.
29 Njîra ya Mwathani i wîbitho kîrî bara baagîru
îndî i kaûrîro kîrî muntû wonthe ûra ûrûthaga ûthûûku.
30 Antû bara beega bakaarûngama beerikîîtie,
îndî bara bathûûku bagaatuunywa nthîgûrû yao.
31 Kanyua ka muntû ûra mwagîru kaaragia mantû ma ûûme,
îndî rûrîme rûra rwaragia ûrongo rûgaakirua.
32 Mîromo ya antû bara batheru nîmenyaga mantû mara maûmba gwîtîgîîrîka,
îndî tûnyua twa antû bara batarî batheru twaragia mantû ma ûrongo.