Ûûme na waa
9
1 Ûûme neebakîrîîte nyombana itugî biake mûgwanja.
2 N'athînjîîte nyama na kinya aathondeka ndibei. Kîatho gîake i kîîthuuranîre.
3 Natûmîîte aruti ngûgî baake ba aka,
baugîîria barî irîmaani bira biraaya mûno
gwîta antû baaya.
4 Ariuga, “Antû bonthe bara bathûûku,
kana baataku
na kinya bara bataûkîrîîtwe i mathûgaania
i baaye!
5 Ncûûni bwinthe,
bûrîe biakûrîa
na bûnyue ndibei îra nthondekeete.”
6 Wegua i bûkwenda gûtûûra,
tiganaani na mîtugo yenu inu mîthûûku
na bwîtîgîîrie gûciûkîrwa kwathe makinya meenu.
7 Ûra akaanagia muntû wa kabûthia
i nthoni eebîkagîra;
ûra agondokagîra muntû ûmûthûûku
n'îgi ebiraga.
8 Ûtikaagondokere muntû wa kabûthia
n'ûntû nagakûmena,
Gondokera muntû arî na ûûme
nwe agakwenda.
9 Rutana muntû arî na ûûme,
nwe akaagîta ûûme nkûrûki.
Rutana muntû wa ûmma
nwe akaagîta ûmenyo.
10 “Gûkuthûka Mwathani nuu
mwanjîîrio wa ûûme,
na kûmenya Ûra Mûtheru
i ku kûgîa na gûciûkîrwa.
11 I niû ûmenyo,
ûkanthingata,
ngatûma ntugû cia ûtûûro bwaku
gûkû nthîgûrû ciingîa.
12 Wegua ûrî na ûûme,
ûûme bûbu,
i bwa gûgûteethia woû wengwa.”
13 Waa i ta mûka ûmûtaku
ûra aringaga gîtuma
atarî nthoni kana ûmenyo.
14 Akaraga mwîrîgaani wa nyomba yake,
na agakarîra gîtî bantû ara aûkîîru a taûni.
15 Kaingo ageeta bara bakûrûkaga na njîra,
bara bathiiyaga na njîra ciao imbega,
akîbeeraga ata rî,
16 “Wonthe ûra mûtaku
n'athûngîre aaga ndeeni.”
Na akeera bara bataku ata rî,
17 “Rûûyî rwa kwiya rûrî mûrîo,
na irio bira birîîyagîrwa withooni
birî mûrîo mûno.”
18 Bara bamûthikagîîria batiiyî kana bara bathiiyaga kîrî we nwa ta baakuû.