Ûûme n'agwîtana
8
1 Ûûme n'agwîtana,na gûciûkîrwa nwe naûkîîrîîtie kayû gaake.
2 Arûûngi bantû agu aûkîîru,
agu makomanooni ma njîra.
3 Aakubî na mwîrîga wa taûni ara antû bathûûngagîîra,
noo akuugîîria arî.
4 Akiugaga ata rî, “Ndîbwîta bwinthe, ndîîta antû bonthe ba nthîgûrû,
5 biû antû baariitu,
îgîani na gûciûkîrwa,
naabi biû bataku bûgîe wîîru bwa gûciûkîrwa.
6 Nthikîîriani n'ûntû nkabwîra mantû meega,
naani ndaatumûra kanyua gaakwa nkabwîra mantû ma mma.
7 N'ûntû rîonthe mbaragia ûmma,
na inthwîre ûrongo.
8 Biugo bionthe bira biumaga kanyua gaakwa i bia gwîtîgîka
na gûtirî nwa kîmwe gîa gûta muntû kana kûmwenia.
9 Ûkeegua ûgîciûkagîrwa,
ûkoona biugo bibi biakwa
i bio biongwa bira ûkwenda.
10 Thuura ûrutani bwakwa kinya nkûrûki ya kûthuura fetha
na ûthuure ûmenyo bantû a thaabu îra nkeembe.
11 Ûûme bûrî gîtûmi mûno kinya nkûrûki ya twiga twa goro
kana gîntû kîonthe kîra wendekia.
12 I niû ûûme na gûciûkîrwa i mûcoore waakwa,
ndî na ûmenyo na kûrûthaga bûra kûbatîîrue.
13 Gûkuthûka Mwathani
i kûthûûra ûthûûku.
Inthwîre wîkumia na kwîbûkîîria,
kwaga nthoni,
njîra inthûûku
na kinya kanyua kara kaaragia mantû maathûûku
i nkathwîre.
14 I niû mwene ûgambi
na ûûme bûra bwega,
i niû gûciûkîrwa na ndî na inya.
15 I niû nteethagia anene kwathana,
na ngateethia aathani kûrûtha mawatho meega.
16 I mbendeete bonthe bara bambeendaga,
na imbonekanaga kîrî bonthe bara banceragia na ûmma.
17 I mbendeete bara bambendaga,
na bonthe bara baanceragia bakambona.
18 Ûtonga na gîtîîyo i biakwa,
îî, ûtonga bwa gûtûûra na kinya ûmma.
19 Kîra ûkoona kuuma kîrî niû
kîrî goro nkûrûki ya thaabu îra nkeembe,
kana fetha îra nthongi mûno.
20 Rîonthe nthiyagîra njîraani ya wagîru,
na nthingataga mantû ma mma.
21 Nnenkagîra bara bambendeete ûtonga bwingî,
nkaûyûria nyomba ciao into biega.
22 Kwanjîîria mwanjîîrioni ungwa Mwathani n'aarî naani,
i ndaarî oogo mbere anjîîria.
23 Ndaûmbirwe rîa mbere buru,
mbere kinya nthîgûrû îîgua îrî oogo.
24 Ndaaciarirwe mbere ya maria,
kana ithima bia rûûyî.
25 Ndaaciarirwe mbere ya irîma,
mbere ya tûrîma tûûmbwa.
26 Ûûgû bwakarîkire mbere Ngai aûmba nthîgûrû,
kana kîthaka
kana nkundi nwa îmwe ya mûthetu.
27 I ndaarî oogo Mwathani akîûmba îgûrû na nthîgûrû,
na agîtambûrûkia îgûrû, îgûrû rîa rûûyî.
28 Na itwarî nwe akîaigîîra matu îgûrû,
na akîûmba ithima bira biûyûrîîtie îria.
29 Rîra aigîîre îria mîanka yarîo,
na arîatha rîathîkagîre watho bwake.
Na kinya rîra eekîîre mîcingi
îra îrikîîtie nthîgûrû.
30 Ndeegagua ndî akubî na Mwathani
ta muntû arî waara,
nkîmûgwîragia ntugû cionthe,
naani i ndaakenaga ndî akubî nwe,
31 ngîkenagîîra nthîgûrû
na kinya antû baayo.
32 Aana baakwa thikîîriani
na bûthingate ûrutani bwakwa,
naabi bûgaatûûra bûkeneete.
33 Thikîîriani bwega bûra nkûbûrutana
na bûkaagîa na ûûme.
34 Bara bakaraga mwîrîgaani wakwa rîonthe,
bagakaraga beeteereete mûthûngîîrooni wa mûciî wakwa,
bara bathikagîîria ûrutani bwakwa
bagaakaraga bagwîrîîtue.
35 N'ûntû ûra aanceragia na akaambona n'onaga ûtûûro,
na Mwathani nwe n'akenaga nwe.
36 Îndî ûra aambagaga,
nwe wengwa eethûkagia,
na ûra anthwîre n'endaga gîkuû.”