Mûka mûmaraaya
7
1 Mwan'wakwa, gwata biugo biakwa,na ûtikaariganîrue i maathana maakwa.
2 Ûmaathîkîre naawe ûgaatûûra mwoyo,
na mawatho maakwa ûmamenyeere
ta bûra ûmenyagîîra kaana ka riitho.
3 Ûmaige mîthiani ya biara biaku,
na ûmaandîke nkorooni yaku.
4 Thûkia ûûme ta mwaranyûkwe,
na gûciûkîrwa kûrî mûcoore waku wa akubî.
5 Na bio bigakûrigîîria
kuumania na mûka mûmaraaya
ûra eerekanaga na kanyua karî mûrîo.
6 N'ûntû i ndaacûûbîîrie na mwanya
wa ndîrîca ya nyomba yakwa ndoona,
7 mûthaka ûmwe ûmûriitu,
muntû ûmwîthî atarî na ûûme,
ndamûmenya arî gatîgatî ka nthaka ira iingî.
8 Aathiîte na barabara kîthiorooni
bantû mûka mûna aakaraga.
Aatarîîte bwa nyomba yake.
9 Kwarî ûgoro na ruiriiri.
10 Mwekûrû eekîrîîte nguo cia ûmaraaya
na aûyûrîîtwe n'ûbereera nkoro amwona.
11 N'ûmwe wa eekûrû bara baûmo kîongo,
bara baringaga gîtuma mûno
na bataakiragîîria mûciî.
12 Nthûti arî njîraani,
agu angî arî bieniini
kana kûrûûngamaga tûkoonaani twa njîra.
13 Amûgwata, amûcunca,
na amwîra atakwîgua nwa nthoni,
14 “I nkûrutaga igongwana îmunthî,
kwoogu gwakwa kûrî na nyama cia kûgana.
15 I kîo n'ûntû ndaumagarûka nkûthagaana,
ngûgûceria mûno naani ngûkwona.
16 I ntandîkîîte ûrîrî bwakwa
nguo inthongi cia kuuma Miisiri.
17 Ndakîbuîrîîra mîtaa na manemane,
aroi na mîtaa îra înuunkaga bwega.
18 Ncû tûkeneere wendo
na tûkenie nkoro cietû mwanka rûkîîrî.
19 N'ûntû mûkûrû wakwa atirî mûciî,
narathiire rûgendo rûûraaya.
20 Athiire na mbia imbiingî mûno na agaacooka gatîgatî ka mweri.”
21 Kwoogu n'ûntû bwa rwaria rwake rwa ûcege rûkari ta rwega,
amweneeria na rwaria rwake rwega.
22 Kwoogu aathiiyania nwe mpoora
ta ng'ombe îthiîte kûthînjwa,
kana ta nthia îkîthûngîra mûtegooni,
23 mwanka mûguî ûkaratha nkoro,
ta kanyoni gakîthûngîra mûtegooni,
atakûmenya kana ûtûûro bwake bûrî thîînaani.
24 Îîndî biû aana baakwa, tathikîîriani,
na bûgwate bûra nkûbwîra.
25 Nkoro yaku îtikaathûgaanîrie mantû ma mûka ta ûyu,
kana ûreka muntû ta we akûbîtithia njîra.
26 N'ûntû mûka ta ûyu natûmîîte antû arûme baingî bagwa
na naûragîîte njûûrî îînene.
27 Nyomba ya mûka ûyû i njîra ya kûthi nthikooni, n'ûntû yîîndamaga mwanka îgakinya gwa akuû.