Mataaro mangî meega
6
1 Mwan'wakwa, i ka wîtîgîîrîîtie kûrûngamîîra kûrea îrandû rîa muntû ûngî? 2 Ka ûgwetwe i biugo biaku, wathaîkwa i wîrane bwaku wengwa?3 Wegua n'ûûgu, îîndî ûrî wathooni
bwa muntû ûngî.
Ûûgû i bu ûbatîîrue ûrûtha,
îthi ûmwereke bûthirie kîrîîkanîro gîku.
4 Ûrûthe ûgu mbere ûtiramaama,
kana wanjîîria kûng'onta.
5 Wîbonokie ta bûra nthia îmonyokaga njaraani cia mwathi,
kana nyoni njaraani cia mûtegi wa mîtego.
6 Woû mûthao,
îîrutane kuumania na mûthwa.
7 Mûthwa ûtirî mûtongoria,
mûnene kana mûrûngamîîri,
8 amwe na ûgu,
kagiita ka maketha,
n'wîbîthîranagîria irio na ûkaiga.
9 Mûthao i mwanka rî
ûkaanoga i kûmaama?
Irî ûkaindûkîra
kuuma torooni?
10 Gatoro kaniini,
kana kûng'onta bûûkai,
gûkûnja njara bûûkai ûnogoka,
11 ûkîa bûgakûûyîîra ta mwamba,
na kwaga naku ta ncamba yîîbogeete mathaga ma ndûa.
12 Muntû wa mana, na ûmûthûûku, athiûrûûkaga njîraani akîaragia ûrongo.
13 Akîaragia na bîonanîîria
bia njara na magûrû
kaingo eeneeria bara bangî.
14 Rîonthe babaangaga ûthûûku nkorooni,
na kwîngîîra antû bagaceria thîîna.
15 Kînyamaara gîkabagwata na mpwî
na batigwe batarî na wîrîgîîro.
16 Kûrî na mantû mathanthatû mara Mwathani ameneete,
yîî kûrî mantû mûgwanja mara athwîre mûno.
17 Mwonekere wa wîkumia,
rûrîme rûra rwaragia ûrongo,
njara ira ciîtûûraga nthakame îtarî na mabîtia,
18 nkoro îra îthûgaanagia mathûgaania maathûûku,
19 mûnkûûyî ûra arutaga ûkûûyî bwa ûrongo,
kana muntû ûra aandaga mbeû îtarî mbega gatîgatî ga antû,
agatûma batuma ûthû.
Ûthûûngîîri bwakaananua
20 Thingataga bûra abaagu agûkwîra,
na wathîkagîre mawatho ma nyûkwe.
21 Ûkarage rîonthe ûmaigîîte nkorooni yaku,
na ûmacuurie nkingooni yaku.
22 Moorutani maao magagûtongoragia rîra ûthiîte,
magûkaragie rîra ûmaami,
na maaragie naawe rîra waûkîîra.
23 Moorutani mamu i taa,
na watho bûbu i werû,
îkaanûkia narîo i rîa gûgûtongoria
njîraani ya mwoyo.
24 Magakûrigîîria kuumania na aka bara bathûûku,
na makwonokie kuumania na tûnyua twega twa aka baitha bara beerekanaga.
25 Ûtikeerirîîrie ûthongi bwake nkorooni yaku,
kana ûreka ûgwatwa n'ûthongi bwa meetho maake.
26 N'ûntû îrwaya nwa ûrîgûre na ûgûri bwa kîrebûrû kîa mûgaate,
îndî kûmaama na mûka wa itha îrîi i mwoyo waku.
27 Ata rî, muntû aûmba gûkamata mwanki kîbaraani gîake,
na nguo ciake itabîe?
28 A rîo î, n'ata muntû aûmba gûkinyanga makara,
na mbayo ciake itabîe?
29 Nwa ta bu kîrî muntû ûra amaamaga na mûka wa itha;
gûtirî we ûmûringithagia arega gûkaanûkua.
30 Antû batimenaga mwamba
wegua ariiya n'ûntû bwa yûûra,
31 îndî akaaya kûgwatwa,
akaarîa maita mûgwanja,
wana wegua n'ûtonga bwa mûciî wake bunthe.
32 Muntû ûra amaamaga na mûka wa itha
atirî ûûme nwa aniini,
n'ûntû arûthaga ûntû bwa kwîthûûkia wengwa.
33 Akaagurarua na agîe nthoni,
na îgi rîra akaagîa rîtiithambîka.
34 Rûriitho irûtûmaga mûrûme athûûra mûno,
na atirî kîao akîîrîîria.
35 Atiîtîgîîria îrîi nwa rîrîkû,
kana eetîgîîria ngukumo wana wegua îgana ata.