Îgua ûrî mwîtîgua kîrî mwekûrû waku
5
1 Mwan'wakwa,thikîîria ûûme bwakwa bwega na ûthikîîrie biugo biakwa bia kîrîra,
2 i rîo ûgaakara bwega,
na biugo bia kanyua gaaku
bikoonanagia ûrî na ûmenyo.
3 Mîromo ya mûka mûmaraaya,
îrî mûrîo ta ûkî,
na rwaria rwake rûnyoorokeete ta maguta.
4 Îndî nyuma ya kûmaama nwe arî gana ta ndûrio,
i kînyamaara na ûrûrû bûûnene.
5 Magûrû maake meendamîîte gîkuûni,
makinya maake meerekereete nthikooni.
6 We atithingataga njîra îra îthiiyaga mwoyooni,
na kinya atimiiyî.
7 Mwan'wakwa,
nthikîîria na ûrûthe bunthe bûra ngûkwîra.
8 Îîmenyeere kîrî mûka ûra mûthûûku,
ûtigaakinye akubî na mwîrîga wa nyomba yake.
9 Ûkaaga gîtîîyo gîaku,
na ûriganie na gûtuîka mwîrandû,
wa muntû ûmûthûûku
ûtûûrooni bwaku bunthe.
10 Ageni baaya kûthûkia mbia ciaku
na into biingî bionthe bira ûrutîrîîte ngûgî.
11 Mûthiani wa ûtûûro bwaku ûgaakaya,
rîra mwîrî waku unthe ûkaathira inya.
12 Rîru i rîo ûkaugaga,
“I kî n'ûntû ndaaregire kwîgua?
I kî n'ûntû nkoro yakwa yaathwîre gûkaanûkua?
13 Ntaathîkîra kayû ka aarimû baakwa,
kana ngwata ûrutani bwao,
14 n'ûntû îîndî i ngîîte îgi
mbere ya antû bonthe.
15 Nyua rûûyî rwa kathima gaaku wengwa,
ûnyue rûûyî rûra rûkuuma kathimaani kara wînjîîte wengwa.
16 Ûtikaanyagaarie ithima biaku gûntû kunthe,
kana ûtûra miuro ya rûûyî rwaku thokooni ira nene.
17 Ithima bibu i biîgue birî biaku wenka,
na ti bia ageni bara ûrî nabo.
18 Gwîragua i mwekûrû waku,
ûra wagûrire rîra warî ûmwîthî.
19 Wa ta bûra nkûrûûngû îkenagîîra nka yayo,
nyonto ciake nigûkenagie rîonthe
na ûbûûtûgague i wendo bwake.
20 Mwan'wakwa, i kî n'ûntû ûgûkeneera mûka îrwaya?
I mbi îtûmîkia ûkumbatîria kîbara kîa mûka wa muntû ûngî?
21 Mwathani n'onaga monthe mara ûrûthaga
na rîonthe akaraga akûraithîîrîîtie.
22 Mwîyia akaagwatwa i wîyia bwake wengwa
na athaîkwe i mîkanda ya wîyia bwake.
23 We agaakua n'ûntû bwa kwaga mîtugo îmîega,
na aûre n'ûntû bwa ûtaku bwake bûûnene.”