Ûûme i bûkûrûkîîte mantû monthe
4
1 Aana baakwa,thikîîriani bwega moorutani maakwa
bûthikîîrie bûgîe na gûciûkîrwa.
2 Na n'ûntû ndîkûrutana ûrutani bwega,
ûtigaatigane nabu.
3 N'ûntû i ndaarî Mwana kwa baaba,
kaana kamwe gwa taata kara eendeete mûno,
4 baaba aandutanire ambîîra,
“Ûkaaya kûgwata moorutani maakwa
na ûkamaiga nkorooni,
ûgaatûûra mwoyo.
5 Ûtikaariganîrue i moorutani maakwa,
ûrûthage bûra ngûkwatha,
naawe ûkaagîta ûûme na gûciûkîrwa.
6 Ûkarega kûmena ûûme,
ûkamwenda,
agagûkaragia.
7 Ûûme n'ûmwega nkûrûki ya into bionthe, kwoogu ceria ûûme.
Wana wegua n'ûkaarea na bionthe bira ûrî nabio nakaaba ûgaceria gûciûkîrwa.
8 Ûkeegua wonaga ûûme arî na gîtûmi,
na ûkamûkumbata bwega,
ûkeegua ûrî na gîtîîyo kîînene mûno.
9 Agagwîkîra nkoobia înthongi kîongo gîaku,
na akwe nthûmbî ya ûkumio.”
Njîra îra mbega na îra îtarî mbega
10 Mwan'wakwa,
ûkathikîîria na ûkaathîkîra moorutani maakwa
ûgaatûûra îgiita rîîraaya.
11 I nkûrutanîîte njîra cia ûûme,
ira irî kîrîra
na ndagûtongoreeria njîraani ira mbega.
12 Rîra ûthiîte mbayo ciaku itiibaratia,
na ûkaaya kuugia magûrû maaku matiitaratara.
13 Gwata mantû mara nkûrutanîîte ûmarikie,
na matikaariganîrie,
n'ûntû magaatûma ûtûûra bwega.
14 Ûtikaathingate ngerekano inthûûku
kana ûthingata njîra cia antû bara bathûûku.
15 Tigana na njîra inu,
na ûtikaathi akubî nacio,
irûkîre na ûthi.
16 N'ûntû batimaamaga kana banogoka
batarûthîrîte muntû atarî na thîîna ûthûûku.
17 Biakûrîa na biakûnyua biao
n'ûgîti na bitina.
18 Njîra cia antû bara baagîru ikari ta riûa rîkiuma
wa bûra rîthiyaga rîkîthararagia wa bûra gûgûkea.
19 Njîra ya antû bara bathûûku,
îkari ta mwindu ûmûrumanu,
na batiimenya kîra gîtûmaga bataratara.
20 Mwan'wakwa,
thikîîria bwega,
ûntû bunthe bûra ngûkwîra.
21 Ûtikaariganîrue i kiugo nwa kîmwe,
îndî ûbithûgaanîrie bionthe.
22 Ûkagwata mantû mama,
ûgaatûûra bwega,
na ûgîe na ûgima bwa mwîrî.
23 Îgûrû ya mantû monthe, menyeera nkoro yaku,
n'ûntû n'yo kîthima kîa mûtûûrîre waku.
24 Ûtikaarongoe kana wenania,
rwariani rwaku runthe.
25 Meetho maaku maraithe mbere,
na ûtikaagarûke rûteere nwa rûrîkû.
26 Banga bwega mantû mara ûkûrûtha
na bûra ûkûrûtha bunthe bûkaabua.
27 Ûtikaabîtie gûûya kûgarûka
rûteere rwa ûrîo kana rwa ûmotho.