Gwîtîgia Ngai
3
1 Mwan'wakwa,ûtikaariganîrue i moorutani maakwa,
îndî waige mawatho maakwa nkorooni yaku.
2 Magaatûma ûtûûre ûtûûro bûûraaya,
na bwega.
3 Ka wendo na wathîki,
bikare ta mûkathî nkingo yaku,
na ûbiandîke nkorooni yaku.
4 I rîo ûkeendwa i Ngai
na kinya antû,
Na bakwonage ûrî muntû ûûmbanîîte.
5 Îtîgia Mwathani na nkoro yaku yonthe
na ûtikeerîgîîre kwerewa gwaku wengwa.
6 Mantûûni maaku monthe ûtikaariganîrue îtîgîîria Mwathani,
na akaarûngaria njîra ciaku ira ûgaakûrûkagîîra.
7 Ûtikeebone ûrî mûûgî,
kuthûka Mwathani na ûtigane na wîyia.
8 Bûbû bûgaatûma mwîrî waku wîgua ûrî na thîîria îmbega
na mîîndî yaku yîîgua îrî na inya.
9 Tîîya Mwathani na into biaku,
na njîra ya kûmûrutîra maciaro ma mbere ma mûnda waku.
10 Rîru i rîo makûmbî maaku makaûyûra irio
na ithiri biaku biûyûre ndibei.
11 Mwan'wakwa,
ûtikaamene îkaanûkia rîa Mwathani,
kana ûthûûra rîra Mwathani agûkûgondokera.
12 Mwathani akaanûkagia muntû wonthe ûra endeete,
wa ta bûra mûciari akaanûkagia mwana wake ûra endeete.
Wega bwa ûûme
13 Kîthaarimo i kîrî muntû ûra oonaga ûûme,
muntû ûra agîîyaga na gûciûkîrwa.
14 N'ûntû baita ya ûûme i nene nkûrûki ya fetha,
kana ya thaabu îra mbega mûno.
15 Ûûme arî gîtûmi nkûrûki ya twiga twa goro,
gûtirî gîntû wendaga kîûmba kûbuanaanua na ûûme.
16 Agwete ûtûûro bûûraaya na njara yake ya ûrîo,
Na njaraani yake ya ûmotho,
agwete ûtonga na gîtîîyo.
17 Ûûme i bûtûmaga ûtûûro bwîgua bûrî bwega,
na bûgatûtongoria na ûkiri.
18 Ûûme n'we mûtî wa mwoyo,
na kaumo ga kûgwîrua,
kîrî bonthe bara barî nwe.
19 Gûkûrûkîîra ûûme bwake Mwathani neekîîre mîcingi ya nthîgûrû,
na gûkûrûkîîra kwerewa gwake n'aûmbire îgûrû.
20 Gûkûrûkîîra ûmenyo bwake
n'atûmire îria rîtuîkana,
na aatûma matu mauma mbura.
21 Mwan'wakwa,
tûmagîra ûûme na ûmenyo bwega
na rîonthe ûkabiaigaga mathûgaaniani.
22 Bigaatûma ûtûûra ûtûûro bwega
na bûûraaya.
23 Ûkaathiyagîra njîraani ciaku ûtarî na thîîna,
kana ûtûgûûga.
24 Ûkaanogokaga ûtakûmaka
na ûkaamaamaga toro îmbega.
25 Kwoogu ûtikaamake n'inyamaara bia kiumbuthûkû
bira biiyagîîra antû bara bathûûku.
26 Na n'ûntû Mwathani n'we wîrîgîîro bwaku,
akaarigîîria kûgûrû gwaku gûtikaagwatwe.
Mataaro ma ûtûûro bwega
27 Geria bûra ûûmba,
ûteethagie bara barî na ûbatu bwa gûteethua
rîra ûkûûmba kûbateethia.
28 Ûtikeere mûtûûri waku,
“Îthi ûûye rûû,” wegua nwa ûmûteethie îmunthî.
29 Ûtikaathûgaanie kûrûthîra mûtûûri waku ûthûûku,
n'ûntû athûgaanagia arî akubî naawe ationa thîîna.
30 Ûtikaathete na muntû mana,
wegua atikûthûûkîîtie na njîra nwa îrîkû.
31 Ûtikeegue antû ba bitina rûriitho
kana ûkoobia njîra yao nwa îmwe.
32 Mwathani n'ameneete antû bonthe bara batarî eetîgua,
îndî n'aumbûragîra bara beega witho bwake.
33 Kîrumi kîa Mwathani
kîrî îgûrû rîa mîciî ya bara bathûûku,
îndî nathaarimaga ûtûûro bwa bara beega.
34 Mwathani namenaga bara bamenanaga,
îndî neegagîîrua kîao bonthe bara beenyiiagia.
35 Bara barî na ûûme rûgai rwao ûkeegua rûrî mwago,
îndî bara beekumagia bakaagîa îgi.