Mawega ma gûceria ûûme
2
1 Mwan'wakwa, ûgeetîgîîria biugo biakwa,na ûkathûkia mataaro maakwa marî na gîtûmi,
2 thikagîîria mantû ma ûûme,
na ûthûgaanagie bûra bûkuuga,
na nkoro yaku îgaaciûkîrwa,
3 romba ûpeewe kîrîra,
na gwîtie gûciûkîrwa.
4 Ceria ûûme,
wa ta bûra ûgîceria fetha
kana gîntû kîa goro kîra kiithe.
5 Rîru i rîo ûkaamenya gîtûmi
gîa gûkuthûka Mwathani na ûgîe na ûmenyo bwa Ngai.
6 Ûûme bunthe buumaga kîrî Mwathani,
kinya ûmenyo na gûciûkîrwa.
7 Ngai n'eyaga bara bonthe bamûtîîyaga ûûme bwa kûgana,
na akamenyeera bonthe bara batûûraga mûtûûrîre ûmwega.
8 Ngai n'atûmaga ûmma bûrûthîka
na agakaria njîra cia bonthe bara batheru.
9 Ûrî na ûûme,
ûkaamenya ûntû bûra bwega,
ûmma na bûra bûbatîîrue.
10 Ûûme bwathûngîra nkorooni yaku,
ûgaakena n'ûntû ûkaagîa na ûmenyo.
11 Ûûgî bûgagûkaria,
na gûciûkîrwa gûkûrigîîrie.
12 Ûûme bûgakwonokagia ûtikaagwe, mîtegooni îra mîthûûku,
na kuuma kîrî arongo
13 bara baatigire kûrûtha mantû mara meega
baacooka gûtûûraga mwinduuni.
14 Bo bakenagîîra kûrûtha ûthûûku
na kwaria ûrongo.
15 Antû bara barî na mîthiîre îmîthûûku
na njîra ciao iteetîgîkaga.
16 Ûûme bûgagûtuunyûkia
kûûma kîrî ndwaria cia kûgongoorana
cia mûka mûmaraaya,
17 ûra aunaga kîrîîkanîro kîra aigire mbere ya Ngai,
agatiga mûrûmûûe
ûra aamûgûrire rîra aarî ûmwîthî.
18 Njîra îra îthiîte bwa nyomba yake,
îthiîte kûra kûrî mwindu mûno, gîkuûni.
19 Gûtirî we ûthiiyaga kîrî we
acookaga gûtûûra mwoyo kaîrî.
20 Thingata ngerekano ya antû bara beega
na ûtûûre ûtûûro bwa gwîtîgîka.
21 Ûkaaya gûtuîka mwîtîgua
na ûtarî îgi,
ûgaatûûra nthîgûrû.
22 Îndî bara bathûûku
bakaathirua baume nthîgûrû îno,
eenyangia nabo
bakûûrwe na marindo meene.