NJUNO
Gîtûmi kîa njuno
1
1 Ino i njuno cia Soromoni mwana wa Ndaundi, mûnene wa Isiraeri.2 Njuno ino ineenkagîra antû ûûme na mîtugo îmîega,
igatûma bamenya biugo bia kîrîra;
3 Itûmaga beegua barî na mîtugo îmîega na ûûgî,
kûgea na wagîru, kûrûthaga bûra kûbatîîrue na kûrûtha mantû gûtarî na kwendanîîra.
4 Ineenkagîra biaa ûûme
na aana baîthî ûmenyo na kwîmenyeera.
5 Ûra mûûgî nathikîîrie oongeere kîthoomo gîake,
n'we ûra mûûme oone gîa kûmûtongoreeria.
6 Muntû aciûkîrwe i njuno na ngerekano,
biugo bia bara baarî na ûûme na mawitho maacio.
7 Gûkuthûka Mwathani i mwanjîîrio wa ûmenyo,
îndî biaa i bibûthagîîria ûûme na mîtugo îmîega.
Mataaro kîrî aana baîthî
8 Mwan'wakwa, athîkîra moorutani ma abaagu,
na ûtikaamene ûrutani bwa nyûkwe
9 N'ûntû makeegua marî nkoobia ya mwago kiongo gîaku
kana ta mûkathî ûmûthongi ûrî nkingo yaku.
10 Ûtikaareke weneerua n'eeyia,
kana ûbathikîîria.
11 Rîra bagaakwîra,
“Tûgwataneeni tûûrage muntû atarî na mabîtia twîkenie!
12 Rîra tûkaabeethîra
bakeegua barî beega na barî mwoyo,
Îndî twarîîkania nabo,
ûkeegua barî bakuû bonthe.
13 Rîru i rîo tûkaathûkia into biao bia goro
na tûûyûrie into bia gûtaa nyomba cietû.
14 Wona wathûngîra gîkundiini gîetû,
wana woû tûgakûgaîra into.”
15 Ûtikaathingatane na antû ta babu,
kana ûrûtha bûra barûthaga.
16 N'ûntû barî mpwî cia kûrûtha mantû mara mathûûku, wana kinya kûûragana.
17 Îndî n'ûtheri gûtega nyoni na mûtego îcuene.
18 Îndî bo i mîtego yao bongwa wîgagua bagîtega
îra îkaabaûraga.
19 Nwa wa ûgu ûtonga bûra bwonagwa na njîra îtarî îmbega,
bûthûûkagia ûtûûro bwa muntû.
Ûûme ibûgwîtana
20 Thikîîriani ûûme n'agwîtana barabaraani,
na thokooni.
21 Arîîtana thokooni,
na mîîrîgaani ya taûni,
akîîraga antû,
22 “I kagiita kagana ata
bûgaakara bûrî bariitu?
Bûtiitiga kwaigîra mîtego
na kûthekagîîra ûmenyo?
23 Bûkînthikîîria nkîbûkaania,
nkîbwîtûûrîra nkoro yakwa
na nkîbwîra bûra nkûthûgaania.
24 I bwareganire naani kûrû,
na bwarega kûnthikîîria.
25 I bwareganire na mataaro maakwa,
na bûtaamathikîîria,
rîra ndaabûkaniirie.
26 Kwoogu rîra bûkaagwatwa
i kînyamaara kîînene mûno,
27 kana rîra kînyamaara gîkaabûcîgîîria,
ta kîbuubani,
ngakûrigarîra na nkûthekeere.
28 I rîo bûkaambîta mbûteethia,
naani ntiîtîga.
Bûgaanceria
na bûtimbona.
29 N'ûntû i bwaregire ûmenyo,
na bwarega gûkuthûka Mwathani.
30 I bwaregire mataaro maakwa,
na bwarega kûmbîgua
rîra ndaabûkaanagia.
31 Îîndî bûkaarîa maciaro ma ngûgî îra bûrutîîte,
mwanka bûbae maciaro ma mîbango yenu bwingwa.
32 Wîyia na kûganîrwa gûtarî kwega,
i ku kûreetaga kwînyangîka
na gîkuû kîrî biaa.
33 Îndî wona bwanthikîîria bûgaatûûra bwega bûtarî na ûguaya kana bwona thîîna.”