15
1 Îcookio rîcookeetue na njîra ya kwînyiia irîtûmaga mûthûûro ûkagwa,îndî kûgondokerwa i kuumbuthûraga mûthûûro.
2 Rûrîme rwa muntû arî na ûûme rwaragia mantû ma ûmenyo,
îndî kanyua ka muntû ûmûriitu kaaragia waa.
3 Meetho ma Mwathani marî gûntû kunthe,
maraithîîrîîtie muntû ûmwega na ûmûthûûku.
4 Rwaria rûra rûreetaga kworua i mûtî wa mwoyo,
îndî rwaria rûûthûûku irûtûmaga muntû akua nkoro.
5 Kîaa ikîmenaga ûrutani bwa îthe,
îndî ûra etîgagîîria gûkaanûkua n'agîtaga ûûme.
6 Nyomba ya muntû ûmwega îrî into biingî mûno,
îndî bira bara bathûûku boonaga i kînyamaara akî.
7 Kanyua ka muntû ûmwagîru i gatambagia ûmenyo,
îndî nkoro ya kîaa tibu îrûthaga.
8 Mwathani n'athûûragua n'igongwana bia bara baathûûku,
îndî n'akenagua i maromba ma antû baagîru.
9 Mwathani n'athwîre njîra cia muntû ûmûthûûku,
îndî n'endaga ûra arûthaga bûra kûbatîîrue.
10 Muntû ûra abîtagia njîra akoona îkaanûkia rîînene,
na ûra aregaga kwoneerua bûra abîtîîtie agaakua.
11 Kinya îcamaarîro na kûra kwînyanganagîrua bitirigîîria Mwathani amenya kîra kîrî noogo,
n'ata muntû îîndî aûmba kûmûgiria amenya mathûgaania maake?
12 Muntû wa ûgîti atiendaga kûgondokerwa,
na atikinyaga akubî na antû bara barî ûûme.
13 Rîra nkoro îgwîrîîtue ûthiû i bûkembûkaga,
na rîra nkoro îrî na kîeba ûthiû i bûtugaga.
14 Muntû ûra mûûgî n'aceragia ûmenyo,
îndî antû bara bataku baganagîrwa i waa.
15 Ntugû cionthe cia muntû arî na kînyamaara inthûûku mûno,
îndî cia muntû ûkûganîrwa nwa ta thigûnkû îtakûthira.
16 I kaaba gûkuthûka Mwathani ûkeegua ûrî na into biikai,
nkûrûki ya kwîgua ûrî gîtonga kîînene naawe ûrî na thîîna.
17 I kaaba kûrîa nyani ara kûrî na wendo,
nkûrûki ya ng'ombe înoru ara kûrî na rûmena.a
18 Muntû wa mûthûûro n'ongagîîra thîîna,
îndî ûra atathûûrangaga na mpwî n'atûmaga îtheto rîthira.
19 Kwîgua ûrî mûthao i ta kûthiîra njîraani îrî mîîgua,
îndî njîra ya muntû ûmwagîru i barabara îînene.
20 Aana baûgî i batûmaga îthe akena,
Îndî biaa i birumaga gina.
21 Waa i gîkeno kîrî muntû atarî ûmûûgî,
îndî muntû ûra arî na gûciûkîrwa athuuraga njîra îra îbatîîrue.
22 Gûtarî na mataaro meega mantû monthe i mathûûkaga,
îndî kûrî na mûbango ûmwega mantû monthe i mabuuyaga.
23 Muntû n'akenaga rîra acookia îcookio rîongwa na rîega
kagiita kara rîkwendekana.
24 Antû bara baûgî bathingataga njîra îra îtarîîte bwa îgûrû mwoyooni,
kaingo aumauma bwa nthî gîkuûni.
25 Mwathani akeenyangia nyomba ya mwîkumia,
îndî agakaria mîanka ya ntigwa.
26 Mwathani n'athwîre mathûgaania maathûûku,
îndî n'akenagua i biugo biega.
27 Muntû ûmûtanûku n'aretagîra mûciî wake kînyamaara,
îndî ûra aregaga ngukumo natûûraga bwega.
28 Nkoro ya muntû ûmûûgî n'îthûgaanagia mbere ya kwaria,
îndî kanyua ga kîaa kaumaga ûthûûku bûtheri.
29 Mwathani arî kûraaya na antû bara bathûûku,
îndî arî akubî mûno na antû bara beega na bathikagîîria.
30 Ûthiû bûgûkenakena i bûkenagia nkoro,
ntûmwa îmbega n'îtûmaga mwîrî ûgîa inya.
31 Muntû ûra athikagîîria agîkaanûkua,
n'akaraga bwega gatîgatî ka antû bara baûme.
32 Muntû ûra aregaga gûkaanûkua n'ethûûraga wengwa,
îndî ûra athikagîîria agîkaanûkua n'agîtaga gûciûkîrwa.
33 Gûkuthûka Mwathani i gûtûmaga muntû agîa ûûme,
mbere ya gûtîîywa nwa mwanka wînyiiyie.