Ayubu n'akûnung'una n'ûntû bwa kînyamaara gîake
23
1 Rîru Ayubu acookia,2 “Kinya îmunthî ingûkaya n'ûrûrû,
n'ûntû kûringwa gwakwa i kûûrito nkûrûki ya kwayua.
3 Nkamenya i kû mbûûmba kwona Ngai,
ûkeegua ndaûmba kûthi kûra atûûraga!
4 Nkîmwirîra matheta maakwa,
na nkeetheteera na kanyua gaakwa.
5 Ndaûmba kûmenya bûra aancookia,
na nkeerewa bûra akauga.
6 Agîcindana naani na inya înene?
Arî, ûmma anthikîîria.
7 Ara muntû atarî na mabîtia, nwa eetheteere mbere yake,
na agîntuunyûkia cwe kuumania na mûngambithia tene na tene.
8 Îndî ndaathi mbarî ya uumîîro bwa riûa, atirî noogo,
ndaathi bwa ûthwîro bwa riûa, ntikûmwona.
9 Rîra arî ngûgîîni rûteere rwa îgûrû, ntimwonaga,
rîra aagarûka bwa iti, ntikûmûringia nkobe.
10 Îndî n'aiyî njîra îra Ngendagîîra,
rîra aangeria, nkauma nkari ta thaabu.
11 Magûrû maakwa makinyîîte makinya maake,
nthiingatîîte njîra ciake ntakûgarûka.
12 Ntitigîîte maathana maake,
imenyeereete biugo bia kanyua gaake nkûrûki ya irio biakwa bia wa kîra ntugû.
13 Îndî n'we arûngamaga wenka, na n'ûû ûûmba kûmûrigîîria?
Arûthaga wa bûra akeenda.
14 Aûyûragia bûra akûrûkîîtie îgûrû rîakwa,
na arî na mîbango îngî ta înu nkorooni yake.
15 I ntûma mmakîîte ndî mbere yake,
ndaathûgaania îgûrû rîa mama monthe, i nkûmûkuthûka.
16 Ngai n'atûmîîte nkoro yakwa îgirîka,
Mwene Inya n'amakîîtie.
17 Amwe n'ogu ntigûkirua i mwindu,
mwindu ûmûtumanu ûra ûguîkîîte ûthiû bwakwa.