Ayubu aanung'una n'ûntû bwa kinyamaara kîra kîrî Nthîgûrû
24
1 I kî n'ûntû Mwene Inya ataigaga magiita ma îgamba?I kî n'ûntû bara bamwiyî batoonaga ntugû ta inu?
2 Antû bathiiyangagia maiga ma mwanka,
bakarîîthia ng'ondu ira baiyîîte.
3 Bakeengîîria îng'ooi rîa nkîa
na kûthûkia ncamba ya ng'ombe ya mwekûrû ntigwa îrî gîntû gîa kûmûrûngamîîra.
4 Bakeengatia bara barî na ûbatu kuuma njîraani
na kûraacimithia nkîa cionthe cia nthîgûrû ithi kwîbitha.
5 Wa ta mang'ooi ma kîthaka marî rwanda,
nkîa ciangaga igîceria irio,
rwanda i ru rûbeeyaga biakûrîa bia aana baao.
6 Beethîranagia irio kuuma mîndaani,
na bakaringa rûûa mîndaani ya mîcabiibû ya antû baathûûku.
7 Baraaraga mpûûri ûtugû batarî nguo,
batirî na gîa kwîguîka mpîoni.
8 Bauragîrwa i mbura ya irîma
na bakaraara njaraani n'ûntû bwa kwaga ûraaro.
9 Kaana gakea gakarutwa nyontooni,
kaana ga nkea gakathûkua karî gîntû gîa kûrûngamîîra îrandû.
10 Bathiiyaga barî ûtheri batarî nguo,
bakamataga nyamba, îndî wa barî na yûûra.
11 Bakabagîra nceituuni mîtarooni,
na bakabiba ncabiibû îndî bo bagakara na bûûta.
12 Mîkayo ya bara bagûkua îrîîguîka kuuma taûni,
na nkoro cia bara bagurarie n'ikûrîrîra ûteethio.
Îndî gûtirî we Ngai ataragîra mabîtia.
13 Kûrî bo bakuthûkaga werû,
bara bataiyî njîra cia bu
kana bakara njîraani cia bu.
14 Rîra gwatuga, mûûragani aûkagîîra
akaûraga nkîa na bara barî na ûbatu,
ûtugû agatuîka mwamba akaiya.
15 Riitho rîa mûthûngîîri rîraithaga mwindu,
athûgaanagia, ‘Gûtirî riitho rîkaambona,’
na akaraga aithîîte ûthiû bwake.
16 Mwinduuni, antû babuunjagia nyomba,
îndî mûthenya bakeebingîra ndeeni,
batikwenda gîntû ta werû.
17 N'ûntû kîrî bo bonthe, mwindu ûra mûnene i rûkîîrî rwao,
batumaga ûcoore na imakania bia mwindu.
18 Îndî bo i mûbûûyû îgûrû rîa rûûyî,
rûgai rwao rwa nthîgûrû i rûûrume,
bûra gûtarî we ûthiiyaga mîndaani ya mîcabiibû.
19 Wa ta bûra mûrugutîra na mwathû bithiiyaga na mbaraabu îra îkanjûkîîte,
nwabu nthiko ithiiyaga na bara beeyîîtie.
20 Nda cia bagina ikaariganîrua i bo,
mûthwa ûkabarea,
antû baathûûku batiiririkanwa kaîrî
îndî bakaunwa ta mûtî.
21 Bathîînagia nthaata na eekûrû batarî twana,
na batiîgagua eekûrû ntigwa kîao.
22 Îndî Ngai arutaga bara barî na inya na inya yake,
wana bakagîta inya, batirî na ûmma bwa ûtûûro.
23 Nwa areke bakanogoka bakîîgagua barî mayîîga,
îndî meetho maake maraithîîte njîra ciao.
24 N'ûntû baûkagîîrua kwa îgiita rîîkai, na bagacooka bakaûra,
baringagwa nthî na bakeethîranua ta bara bangî bonthe,
bagakethwa ta irio.
25 Wegua tibu gûkari ûgu, n'ûû uuga n'ûrongo
na akoonania mîgambo yakwa n'ya ûtheri?”