Erifasi ariuga ûthûûku bwa Ayubu i bûûnene
22
1 Rîru Erifasi Mûtemani acookia aûria,2 “Muntû nwa eegue arî baita kîrî Ngai?
Kinya muntû ûmûûgî nwa amûteethie?
3 I gîkeno kîbi Mwene Inya akîona ûkîîgua ûrî mwagîru?
I mbi akîona njîra ciaku ikîîgua itirî na ûguute?
4 Îîndî i kûmûtîîya gwaku gûgûtûma akûgondokera
na akûgambithia?
5 T'ûthûûku bwaku bûrî bûnene?
Ti meeyia maaku matarî mûthia?
6 Wetiirie aruanyûkwe into bia gûkûrûngamîîra gûtarî na gîtûmi,
waaruta antû nguo ciao, wabatiga ûtheri.
7 Ûtaakundia bara baarî banogu rûûyî
na waperia bara baarî na yûûra irio,
8 îndî kîthaka kîanenkeerwe muntû aarî na inya,
na muntû atîîyîîtwe n'we atûûraga ku.
9 Na wengatia ntigwa ciathi njara i ntheri
na waunanga njara cia nkea.
10 I kîo gîtûmi mîtego îkûthiûrûûkîrîîte kunthe,
na kîmako gîa mpwî gîgûkûthîînia,
11 i kîo gîtûmi kûrî na mwindu mûno ûtakûûmba kwona,
na i kîo gîtûmi mûguû ûgûkunîkîîte.
12 Ngai atirî îgûrû mûno kûra îgûrû?
Na raitha bûra nthata cia îgûrû ciîgagua irî kûraaya mûno!
13 Îndî ûrîûria, ‘I mbi Ngai aiyî?
Natuuyaga îgamba mwinduuni ta ûyû?
14 Matu maarito imamuithîîte, kwoogu, atigûtwona
akîthiûrûkaga îgûrû.’
15 Ûkaathingata njîra ira nkûrû
ira antû bara bathûûku bathingatîîte?
16 Bara baaciatirwe mbere ya kagiita kaao,
mîcingi yao yaakondorua i mûguû.
17 Beerire Ngai, ‘Rekana naati!
N'ata Mwene Inya aûmba gûtûrûtha?’
18 Îndî n'we aûyûriirie nyomba ciao into biega,
kwoogu ndî kûraaya na mataaro ma antû baathûûku.
19 Bara baagîru boonaga gûkaanûkua kwao bagakena,
bara batarî na mabîtia babathekagîîra bakiugaga,
20 ‘Ûmma anthû beetû bakwînyangua,
na mwanki ûkûbîîthia ûtonga bwao.’
21 Îînenkanîre kîrî Ngai na wîgue ûrî na ûkiri,
na n'ûntû bwoogu wega bûkaaya kîrî woû.
22 Îtîgîîria mataaro ma kanyua gaake,
na waige biugo biake nkorooni yaku.
23 Wacookera Mwene Inya, ûgacookanîîrua,
waaruta ûthûûku kuuma îremaani rîaku
24 na ûte ûtonga bwaku tîîriini,
thaabu yaku ya Ofiri ûte njaraani cia tûmiuro,
25 rîru Mwene Inya agaatuîka thaabu yaku,
fetha yaku îra mbega mûno.
26 Ûmma rîru i rîo ûkoona gîkeno ndeeni ya Mwene Inya
na ûgaûkîîria ûthiû bwaku kîrî Ngai.
27 Ûkamûromba, na agakwîgua,
na ûkaûyûria mîthiîtio yaku.
28 Bûra ûkaabanga kûrûtha, bûkaarûthwa,
na werû bûkaatharara njîraani ciaku.
29 Rîra antû baagwîthua na uuge, ‘Baûkîîrie!’
rîru n'we akoonokia bara beenyiîtie.
30 Akoonokia kinya ûra arî na mabîtia,
ûra akoonokua gûkûrûkîîra ûtheru bwa njara ciaku.”