Ayubu ariuga ti rîonthe bara bathûûku bakaanûkagua
21
1 Rîru Ayubu acookia,2 “Thikîîria mîgambo yakwa bwega,
ga gûkû kwîgue i ku kûmbooreria kwenu.
3 Mbûmîîriani nkîaria,
na ndaarîîkia kwaria, nwa bûnthekeere.
4 Ga kûnung'una gwakwa kûrî îgûrû rîa muntû?
Nkaarega kûremwa i kûûmîîria i kî?
5 Ndaithaani na bûrigare,
kunîka kanyua gaaku na njara.
6 Ndaaririkana ûûgû, nkamaka,
mwîrî wakwa ûkainaina n'ûguaya.
7 I kî n'ûntû antû baathûûku batûûraga,
bagakûra na inya îkongeereka?
8 Bakoona aana baao bakari bwega,
nciarwa ciao irî mbere yao.
9 Mîciî yao îrî mayîîga na îtarî na ûguaya,
mûthanju wa Ngai ûtirî îgûrû rîao.
10 Ncamba ciao itiremagwa i gûciarithania,
ng'ombe ciao itiunaga.
11 Barekagîîria aana baao ta ng'ondu,
aana baao baaniini bakathûngûthanga.
12 Bainaga rwîmbo rwa tamburini na kînubi,
bagakeneera kayû ka mbeebe.
13 Batûmagîra mîanka yao ûtongaani
na bagakua na thîîrî.
14 Amwe na ûgu bakeera Ngai, ‘Rekana naati!
Tûtikûûria kûmenya njîra ciaku.
15 Ka Mwene Inya arî ûû, tûmûtûmîkîre?
I mbi tûkoona twamûromba?’
16 Îndî kûthi na mbere kwao gûtirî njaraani ciao bongwa,
kwoogu ndî kûraaya na mataaro ma antû baathûûku.
17 Amwe na ûgu taa ya muntû ûmûthûûku yooreetue maita magana ata?
Thîîna îbaayagîîra maita magana,
thîîna îra Ngai agaaga arî na mûthûûro?
18 I magiita magana bakaraga ta rûûa bagakamatwa i ruuo,
ta maûngû bagakamatwa i kîbuubani?
19 Kwîragwa, ‘Ngai n'aigaga îkaanûkia rîa muntû kîrî aana baake.’
Ka muntû akaanûkue wengwa kaingo amenya!
20 Ka meetho maake mongwa moone kwînyangua gwake,
ka anyue mûthûûro wa Mwene Inya.
21 I mbi n'ûntû akûmakîra mûciî ûra agaatiga
rîra mîeri yake îra agaîrîîtwe yaathira?
22 Kûrî muntû ûrutana Ngai ûmenyo,
n'ûntû agambithagia kinya bara banene?
23 Muntû ûmwe akuuyaga arî na inya înene,
atarî na thîîna na eekirîrîîtie,
24 mwîrî wake ûmenyeereetwe bwega,
mîîndî yake yûûyûri ûthuumo.
25 Muntû ûngî agakua arî na ûrûrû bwa nkoro,
atakeneereete ûntû nwa bûrîkû bwega.
26 Bonthe bamaamaga amwe mûthetuuni,
na bakaûyûra maginyo.
27 Raitha, inkûmenya bwega bûra bûkûthûgaania,
na mîbango îra bûkwenda kûmbîyîa neo.
28 Bûûragia, ‘Îîndî îrîkû nyomba ya muntû ûmûnene,
marema mara antû baathûûku baatûûraga?’
29 Bûtaûria bara bakûrûkaga na njîra?
Bûtaamenya mantû maao
30 atî muntû ûmûthûûku n'oonokagua ntugû ya thîîna,
na akarutwa ome ntugû ya mûthûûro?
31 N'ûû ûkaamwîra mabîtia maake bacûûbeene?
Kaîrî n'ûû ûkaamûrîa n'ûntû bwa bûra arûthîîte?
32 Akamatagwa akairwa îrinyaani,
na nthiko yake îkaraithîrwa.
33 Mûthetu ûra ûrî kîbondeeni ûrî na mûrîo kîrî we,
antû bonthe bakamûthingata,
na bangî batatarîka bakathi mbere yake.
34 Kwoogu îîndî, n'ata bûûmba kûmbooreria na biugo bia ûtheri?
Gûtirî kîo gîtigeere kîa macookio meenu îndî n'ûrongo!”