Ûthûûku bûkeewa îkanûkia rîra rîbateerie
20
1 Rîru Sofari Mûnaamathi acookia,2 “Gûtaangîka kwa mathûgaania maakwa i gûgûtûma ngûcookeria,
n'ûntû i nthînîîte mûno.
3 Inkwîgua kûgondokerwa gûtagûntîîya,
na kwerewa gwakwa i gûgûntindîka gûcookia.
4 Ûmma nwiyî bûra gûtûûraga kuuma tene,
kuuma muntû akûûmbwa nthîgûrû,
5 atî gîkeno kîa muntû ûmûthûûku i gîa îgiita,
gîkeno kîa muntû atakuthûkaga Ngai gîkaraga îgiita rîîkai.
6 Wana wegua wîkumia bwake bûgaakinya îgûrû
na kîongo gîake gîtonge matu,
7 akaathira tene na tene, ta mai maake,
bara bamwiyî bakaûria, ‘Arîkû we?’
8 Akaariganîria ta kîrooto, ationekana kaîrî,
abuutûke ta kîoneki gîa ûtugû.
9 Riitho rîra rîamwonire rîtimwona kaîrî,
bantû aake atimûringia nkobe kaîrî.
10 Aana baake ka bagaacwa ûteethio kîrî nkîa,
njara ciake nwa mwanka igaacookia ûtonga bwake.
11 Inya ya wîthî îra yûûyûri mîîndî yake,
îkaamaama n'we mûthetuuni.
12 Kinya wegua ûthûûku bûrî na mûrîo kanyuani gaake
na n'abwithaga ruungu rwa rûrîme rwake,
13 wana wegua atiûmîîria kûbûrekeeria bûthi
na abuaigaga kanyuani gaake,
14 amwe na ûgu irio biake bikaagarûka birûre birî nda yake,
bigaatuîka cûmû ya njoka birî ndeeni yake.
15 Agaataîka ûtonga bûra aameriirie,
Ngai agaatûma nda yake îbutaîka.
16 Agaaciia cûmû ya njoka,
mata ma njoka makamûûraga.
17 Atiikeneera miuro,
miuro ya ûkî na îria.
18 Bira aathithinîîre akabicookia bitarîîtwe,
atiikeneera baita kuuma biacaaraani yake.
19 N'ûntû n'ainyîîrîîtie nkîa na acitiganîria,
n'atuunyanîîte nyomba ataaka.
20 Ûmma atiithiria nkumba yake,
atiitigaria nwa kîmwe kîa bira akenagîîra.
21 Gûtirî kîo gîtigeere gîake gîa kûrîa,
ûtonga bwake bûtiitûûra.
22 Gatîgatîîni ga kûganîrwa gwake, thîîna îkamûgwata,
thîîna îkamûûyîîra na inya mûno.
23 Rîra akaûyûria nda yake,
Ngai akaareeta mûthûûro wake ûmûnene kîrî we
na amuurithîrie uu ûrî irio biake.
24 Wana aakuthûka rûûyiû rwa îthaga,
mûguî wa rûthuku ûkamûratha.
25 Agaukûûra kuuma mûgongo wake,
kîrûnda kiume îtemaani rîake.
Akaagwatwa i kîmako,
26 mwindu ûmûnene weteereete ûtonga bwake.
Mwanki ûtarî mûbwîrîîre ûkamûthiria,
na ûbîîthie bira bitigeere îremaani rîake.
27 Îgûrû rîkoonania ûthûûku bwake,
nthîgûrû îkamûûkîîra.
28 Mûguû ûgaakondoria nyomba yake,
into bia mûciî wake bigaakondorua i muuro ntugû ya mûthûûro wa Ngai.
29 Gîkî i kîo kîegwa kîra Ngai eeyaga muntû ûra mûthûûku,
rûgai rûra Ngai aamûbangîîre.”