Îcookio rîa Ayubu
19
1 Rîru Ayubu acookia,2 “Bûkambinyîîria mwanka rî,
na kûmbunanga na mîgambo?
3 Bûndumangîîte îîndî maita îkûmi,
bûrîmbarîria bûtarî na nthoni.
4 Wegua ûmma i mbîtîîtie,
îbîtia rîakwa i rîakwa.
5 Wegua na mma nwa bwîbûkîîrie nkûrûki yakwa,
na gûtûmîra îgi rîakwa kûmbaria,
6 rîru menyaani atî Ngai n'ambîtîrîîtie
na aangerera neeti yake yangwata.
7 Ga nkûrîra, ‘I mbîtîrîîtue!’ na ntigwîtîgwa,
wana ndeetana nteethua, gûtirî gûtuîrwa îgamba bûra kûbatîîrue.
8 N'aingîîte njîra yakwa kaingo ntakûrûka,
n'ekîrîte mûtaarû wakwa mwindu.
9 N'ambagîrîte gîtîîyo
na aanduta nkoobia kîongo.
10 Aantembûrangîîte mbarî cionthe mwanka ndaathira,
aakûûra wîrîgîîro bwakwa ta mûtî.
11 Mûthûûro wake wankanîîte îgûrû rîakwa,
aantaraga ndî ûmwe wa anthû baake.
12 Njûûrî ciake imbumîîrîîte irî amwe,
irûthîîte njîra ya kûûya gwakwa
na ciakîîte kambî ithiûrûkîrîîte îrema rîakwa.
13 Aigîîte aruayia kûraaya naani,
acoore baakwa i bantigîîte kûrû.
14 Antû baakwa ba mûciî i bathiîte,
acoore baakwa i bariganîrîtue i niû.
15 Ageni baakwa na aarî baakwa ba ngûgî boonaga ndî mûgeni,
baandaithaga ta muntû wa kuuma kûûngî.
16 Mbîtaga mûruti ngûgî wakwa, îndî atimbîtîgaga,
kinya ndamwereka na kanyua gaakwa.
17 Mîruke yakwa n'îmîthûûku kîrî mwekûrû wakwa,
ndî mariiri kîrî aruayia bongwa.
18 Kinya twana tûniini i tûnyûrûûntaga,
rîra ndaumîîra, bakaaria kîînyume naani.
19 Acoore baakwa ba ndeeni bonthe i bantigîîte,
bara mbendeete i baangarûkîîte.
20 Niû ntirî nwa mbi, ndî rûûo na maîndî,
ndaroonokeere ciarera.
21 Mbîgîîruani kîao acoore baakwa, mbîgîîruani kîao,
n'ûntû njara ya Ngai n'îndingîîte.
22 I kî n'ûntû bwîngeene naani ta bûra Ngai arûthaga?
Bûtiiganîrwa i nyama ciakwa?
23 Ûtakîîgua biugo biakwa i biandîkirwe,
kana ûkeegua i biekîirwe îbukuuni,
24 ûkeegua i biandîkirwe na karamu ga cuuma
kana biacaîgwa rwaraani tene na tene!
25 Îndî imbiyî mûkûûri wakwa arî mwoyo,
na mûthiani akaarûngama îgûrû rîa nthî.
26 Na nyuma ya rûûo rwakwa kwînyangua,
nkoona Ngai ndî mwîrîîni ûyû.
27 Niû ningwa nkamwona
na meetho maakwa, niû na t'ûngî.
Nkoro yakwa n'îkwîrirîîria!
28 Bûkaaya kûûria, ‘N'ata tûkaamûnyamaaria,
n'ûntû n'we kaumo ka thîîna?’
29 Biû bwingwa ibûbatîîrue gûkuthûka rûûyiû,
n'ûntû mûthûûro ûkaareeta îkaanûkia na njîra ya rûûyiû,
na rîru i rîo bûkaamenya kûrî na îgamba.”