Mbirindandi aaria mantû ma kûgambithua kwa bara bathûûku
18
1 Rîru Mbirindandi Mûsui acookia amûûria,2 “I rî ûkaarîîkia ndwaria ino?
Thûgaania bwega, rîru twarie.
3 I kî n'ûntû ûgûtwona ta ng'ombe
na ûgatwona tûrî baariitu?
4 Woû ûgwîtembûranga i mûthûûro,
ka nthîgûrû îgaatiganîrua n'ûntû bwaku,
kana iiga rîrutarutwa bantû aarîo?
5 Taa ya muntû ûmûthûûku îkoorua
rûrîrîmbî rwa mwanki wake rûgaatiga kûrîrîmbana.
6 Werû îremaani rîake bûgaatuîka mwindu,
taa îra îrî rûteere rwake yoore.
7 Mûrurumo wa makinya maake ûkaathirua inya,
mîbango yake yongwa n'yo îkaamûgwîthia.
8 Magûrû maake makamwira neetiini
n'we akaathiîra marumuuni maayo.
9 Mûtego ûkamûgwata gîteende,
mûtego ûkamûgwata aite.
10 Mûkanda wa kûmûgwata ûkaithwa mûthetuuni,
mûtego ûkegua ûrî njîraani yake.
11 Imako bikaamûûyûra nteere cionthe
na bithiingate makinya maake.
12 Kînyamaara gîkamûbûûtîra,
thîîna ikeegua imweteereete rîra akaagwa.
13 Îkaarîa icuncî bia rûûo rwake,
kîîmbere gîa gîkuû gîkaarîa njara na magûrû maake.
14 Agaakuruthûrwa kuuma ûkariani bwa îrema rîake
na airwe kîrî mûnene wa imakania.
15 Îrema rîake rîgatûûraga antû bangî,
ûtûûro bwake bûkaabîîthua i mwanki wa ûbiriti.
16 Mîri yake îkaûma kuuma bwa nthî,
na mpoong'i ciûme kuuma bwa îgûrû.
17 Mûririkana wake ûkaathira nthîgûrû,
atiîgua arî na riîtwa nthîgûrû.
18 Akaarutwa werûûni, airwe mwinduuni,
na eengatue aume nthîgûrû.
19 Atiîgua arî na aana kana nciarwa gatîgatî ga antû baao,
gûtirî we ûkeegua atigeere naara aatwîre.
20 Antû ba ûthwîro bwa riûa bakaamaka i mpanga îno,
antû ba uumîîro bwa riûa bakaagwatwa i kîmako.
21 Ûmma, bûbu i bu ûkaro bwa muntû ûra mûthûûku,
agu noogo gûkeegua kûrî bantû a muntû ûra ataiyî Ngai.”