Ayubu aaromba oona kagiita ga kûnogoka
17
1 Nkoro yakwa n'inyîîrîkîîte,ntugû ciakwa n'inkai,
nthiko yakwa n'îmbeteereete.
2 Ûmma bara banthekagîîra i banthiûrûkîrîîte;
meetho maakwa nwa mwanka maraithe ûthûûku bwao.
3 Îî Mwathani, ngambîîra wengwa.
N'ûû ûngî aûmba kûndûngamîîra?
4 Nwingîîte mathûgaania maao matikeerewe,
kwoogu ûtiireka bancinda.
5 Muntû akeendia acoore baake kaingo apeewa kîewa,
meetho ma mwana wake i makaûra.
6 Ngai antuîkithîîtie wa kwaragua i muntû wonthe,
muntû wa gûtuîrwa mata ûthiû n'antû.
7 Meetho maakwa marîona rwiriiri n'ûntû bwa kûrîra,
mwîrî wakwa unthe ûkari ta kîrundu.
8 Antû bara barûûngaru i bamakiite n'ûûgû,
bara batarî na mabîtia bakathûûrua i bara batakuthûkaga Ngai.
9 Amwe na ûgu, ûra mwagîru akarûmîîra njîra yake bwega,
na bara bataarûtha ûthûûku na njara ciao bakathi na mbere bakîgîîyaga inya.
10 Îndî biû ncûûni, bwinthe geriani kaîrî!
Ntiona muntû ûmûûgî gatîgatîîni keenu.
11 Ntugû ciakwa nikûrûkîîte, mîbango yakwa n'înyangîîtue,
na kinya meerirîria ma nkoro yakwa.
12 Antû bagarûraga ûtugû bûgaatuîka mûthenya,
mwindu bakauga, ‘Werû bûrî akubî.’
13 Ûkeegua nthiko n'yo mûciî ûra mbîrîgîîrîîte,
nkaara ûrîrî bwakwa mwinduuni,
14 nkaaya kwîra nthiko, ‘Ûrî baaba,’
na maginyo namo, ‘Taata’ kana ‘Mwarayia,’
15 îîndî i kû wîrîgîîro bwakwa bûrî?
N'ûû aûmba kûmbonera wîrîgîîro nwa bûrîkû?
16 Bûkeendama mîîrîgaani ya gîkuû?
Tûkeendamania tîîriini tûrî amwe?”