Kaîrî Ayubu auga atirî na mabîtia
16
1 Rîru Ayubu acookia:2 “Ndareegua mantû maingî ta mama;
biû bwinthe bûrî abooreeria ba thîîna!
3 Ndwaria cienu indaaya cia ûtheri itiithira?
I mbi îkûbwankana bûgûkara bûkîaragia?
4 Nkîaria ta biû,
ûkeegua bûrî kaanyaani gaakwa;
nkîthuuranîra rwaria kiuthatî naabi
na nkabwinainîria kîongo.
5 Îndî nkîbûûmîîria,
biugo bia kûbooreria kuuma kanyuani gaakwa bikîbwa kûnogoka.
6 Amwe na ûgu ndaaria, ûrûrû bwakwa bûtikûnyiia,
na kinya ndaakira, bûtikûthira.
7 Ûmma, woû Ngai, ûkûnthiria buru,
ûkûthiria mûciî wakwa unthe.
8 Ûgûtûma nyaara na bûbu bwatuîka ûkûûyî,
gûceng'a gwakwa ikûmbûkîîrîîte na gwakûûyîîra îgûrû rîakwa.
9 Ngai antagutîîte na antembûranga arî na mûthûûro
na ankabakabîra magego,
anthû baakwa bankûûrîrîîte meetho.
10 Antû baatîkagia tûnyua twao bakînthekeera;
na bakandinga rûthea
na bakagwatana bakambûkîîra.
11 Ngai n'anenkanîrîîte kîrî antû baathûûku
na aangera njaraani cia athûûkia.
12 Indaakari bwega, îndî ambunanga.
Aangwata nkingo na aanthithira.
Aantuîkithia bantû aake a kûthima;
13 ageri ba mîgwî baake i banthiûrûkîrîîte.
Aantembûrîîte mpigo atarî na kîao,
na aatûûra nyongo nthîgûrû.
14 Aambunangaga kaîrî na kaîrî,
eenganaga naani ta ncamba ya ndûa.
15 Ndîîtumîrîte nguo ya nkunia
na ndaathika inya yakwa tîîriini.
16 Ûthiû bwakwa i bûtuunîîte i kûrîra,
mwindu ûkunîkîîte meetho maakwa,
17 amwe na ûgu njara ciakwa itaabitinana
na maromba maakwa i maatheru.
18 Woû nthîgûrû, ûtigaakunîkîre nthakame yakwa,
kîrîro gîakwa kîroorega kwona bantû a kûnogoka!
19 Kinya îîndî mûnkûûyî wakwa arî îgûrû,
mûntheteeri arî îgûrû.
20 Acoore baakwa i bagûncambia,
nkîrîrîra Ngai,
21 erekanagîra muntû kîrî Ngai
ta bûra muntû erekanagîra mûcoore wake.
22 I mîanka îmîkai îtigeere
nthi rûgendo ntagîcooka.