Erifasi ariuga Ayubu atitîîyaga Ngai
15
1 Rîru Erifasi Mûtemani aacookia,2 “Muntû ûmûûgî nwa acookie atathûgaanîîtie,
kana aûyûria nda yake ruuo rwa kuuma bwa uumîîro bwa riûa?
3 Nwa etheteere na biugo bia ûtheri,
na ndwaria cia mana?
4 Îndî woû, ûtigûkuthûka Ngai,
na ûkarega kûromba Ngai.
5 I wîyia bwaku bûkûrutana kanyua gaaku,
naawe wetaarîra rwaria rwa muntû wa ûbereera.
6 Mîgambo yaku yongwa n'yo î gûkûgambithia, t'yakwa,
mîromo yaku yongwa n'îgûkûûyîîra îgûrû rîaku.
7 I woû muntû wa mbere gûciarwa?
Ka wareetirwe mbere ya tûrîma?
8 N'ûthikagîîria mataaro ma Ngai?
Ka wîthimagîra ûûme?
9 I mbi wiyî tûtaiyî?
I kwerewa kûbi ûrî nakû tûtarî naku?
10 Mbuî na ûkûrû tûrî nabio,
antû baakûrû kinya nkûrûki ya abaagu.
11 Gûkirakirua i Ngai gûtikûganîîte,
waarîrîîtue biugo mpoora?
12 I kî n'ûntû nkoro yaku îgûkwira kûraaya
na i kî n'ûntû ûgûtuunîithia meetho,
13 kaingo ûthûûrîra Ngai waku
na ûruta mîgambo ta înu kuuma kanyua gaaku?
14 Muntû i mbi, atî nwa eegue arî mûtheru,
kana ûra ûcierwe i mûka, nwa eegue arî mwagîru?
15 Ûkeegua Ngai atiîtîgagia bara baake batheru,
ûkeegua kinya îgûrû ti rîtheru meethooni maake,
16 nwa muntû, ûmûthûûku na ûmûmaramaru,
ûra ûnyunyaga ûthûûku ta rûûyî!
17 Nthikîîria na ngakwereeca,
ga nkwîre bûra mboneete,
18 bûra antû baûgî baugîîte,
beegîîtue kuuma kîrî beethe batakwitha nwa mbi
19 (bara bonka baanenkeerwe nthîgûrû
rîra gûtarî mûgeni waakûrûkîîra gatîgatî kaao).
20 Muntû ûmûthûûku atûûraga na thîîna ntugû ciake cionthe,
na mwinyanîîria akaraga na ûrûrû mîanka yake yonthe îra aigîrîtwe.
21 Matû maake maûyûri tûyû twa kûmakania,
rîra mantû monthe magûkara ta marî meega, atuunyani bakamwithûkîra.
22 Atirî na wîtîgio bwa kuuma mwinduuni,
eeteeretwe i rûûyiû.
23 Ariûngaga agîceragia irio, akîûragia birî kû?
n'aiyî ntugû ya mwindu îrî akubî.
24 Thîîna na kîeba i bimûmakagia,
bimûturaga ta njûûrî ya mûnene eethuuranîrîîte kûrûa.
25 N'ûntû n'akûnjîrîte Ngai nkundi,
na eekumîria Mwene Inya,
26 Augîîtie na rwîkumia kûmwithûkîra,
arî na rong'o înkamu na îrî na inya.
27 Kinya wegua ûthiû bwake bûguîkîîtwe i maguta,
na kauna gaake kaûyûrîîte nyama,
28 agaatûûra taûni cia maganjo
na nyomba itatwîre muntû,
nyomba ithiîte gûtuîka kîthûmba kîa maiga.
29 Atitonga kaîrî na ûtonga bwake bûtitûûra,
kana into biake bitaamba nthîgûrû.
30 Atieba mwindu,
rûrîrîîmbî rûkaûmia mîri yake,
na mûruke wa kanyua ka Ngai ûkamûbua ûmûte.
31 Menya eebenia etîgia kîra kîrî kîa ûtheri,
n'ûntû gûtirî kîo akaarîwa nakîo.
32 Akaarîwa îrîi rîûyûri mbere ya akua,
na rûciaro rwake rûtiithagaya.
33 Agaakara ta mûcabiibû ûûrûûrîîtwe ncabiibû ciayo itarî mbîru,
ta mûceituuni ûra ûgwîtûûra marao maau.
34 N'ûntû gîkundi kîa bara batatîîyaga Ngai i nthaata,
na mwanki ûkaabîîthia marema ma bara beendeete ngukumo.
35 Bakamataga thîîna na bagaciara ûthûûku,
nkoro ciao ibangaga ûrongo.”