14
1 Muntû ûra aciarîîtwe i mûkaatûûraga ntugû inkai cia thîîna ntheri.
2 Atumûkaga ta yûûa na akaûma;
augagia ta kîrundu, atikarakaraga.
3 N'ûrûmagîîria muntû ta ûyu meetho?
Ûkamûreeta mbere yaku kaingo ûmûgambithia?
4 N'ûû aruta gîntû kîîtheru kuuma kîrî gîtarî kîtheru?
Gûtirî kinya ûmwe!
5 Ntugû cia muntû niintare,
nwiyî îthaabu rîa mîeri yake
na n'waigîîte mîanka îra atatagaara.
6 Kwoogu, tiga kûmûraitha na ûrekane n'we,
mwanka aûyûrie kagiita gaake ta mwandîkwa.
7 Kûrî na wîrîgîîro bwa mûtî,
ûkarîîkwa, ûkaaririma kaîrî,
na nthîîrî ciaimbia îtiûra.
8 Mîri nwa îkare na îgakûrîra nthîgûrû
na gîtinkû kîau gîkaûmîra mûthetuuni,
9 amwe na ûgu wegua mûruke wa rûûyî ûkaaririma
na uume mpoong'i ta mûtî kaîrî.
10 Îndî muntû akuuyaga, na akauma nthîgûrû;
muntû aakua rî, i kû arî kaîrî?
11 Wa ta bûra rûûyî rûthiraga îriani,
na muuro ûkabwa,
12 Kwoogu, antû bamaamaga bataûke,
mwanka rîra îgûrû ûkeegua rîtarî oogo,
batiindûkîrua kuuma torooni ciao.
13 Kaaba ûkîmbithire nthikooni,
ûkaambitha mwanka mûthûûro waku ûkathira,
rîru ûmbigîre kagiita ga kûndirikana.
14 Muntû agakua rî, aatûûra kaîrî?
Ntugû ciakwa cionthe cia ngûgî îmbûmo
ngeeteera kwerûua gwakwa gûkinye.
15 Ûkaambîta, naani ngeetîga,
ûkambeenda niû kîûmbe kîra ûrûthîîte na njara ciaku.
16 Ûmma rîru ûgîtara makinya maakwa,
îndî ûtakûraitha meeyia maakwa.
17 Mabîtia maakwa magaakunîkîrwa mboorooni;
ûgaakunîkîra meeyia maakwa.
18 Îndî wa bûra kîrîma kîgwîyaga gîkoomokanga
na ta bûra rwara rûthiiyangagua kuuma bantû aaru,
19 wa ta bûra rûûyî rûthiragia maiga
na mbura îkathiria mûthetu,
nwabu wînyangagia mwîrîgîîro wa muntû.
20 Ûmûkîragia inya warîmwe na rîa mûthia,
ûgarûraga ûthiû bwake na ûkamûta kûraaya.
21 Rîra aana baake bakwewa gîtîîyo, atimenyaga;
baanyiiua, ationaga.
22 Îndî eegagua ûrûrû bwa mwîrî wake
na akeerîrîra wenka.”