Ayubu aaria na Ngai
13
1 Meetho maakwa imooneete mama monthe,matû maakwa imeegîîtue na ma meerewa.
2 Mara bwiyî, wana n'yû imbiyî,
wana niû ntirî mûkai kîrî biû.
3 Îndî i ndîîriragîria kwaria na Mwene Inya
na ngamba na Ngai.
4 Îndî biû, bûnkaandaga na ûrongo,
biû bwinthe bûrî ndagitaarî ba ûtheri!
5 Ûtakîîgua bûgîkira amwe na ûgu!
Kîrî biû, bûbu wîgua bûrî ûûme.
6 Îîndî îgua matheta maakwa,
thikîîria gûkaya gwa kanyua gaakwa.
7 Bûkaaria ûrongo kaanyaani ka Ngai?
Î bûkamûrongoera?
8 Ka bûkoonania kîmenyano bantû aake?
Bûkaatheteera Ngai?
9 Ûkîîgua bûrî bwega kîrî biû akîîya kûbwînja mantû?
Bûkîmwenia bûra bûûmba kwenia antû?
10 Ûmma akabûgondokera
bûkîonania kwendeerwa gîîciri.
11 Mwago wake tika ûkîbûguayia?
Kûmûkuthûka gûkabûgwîra?
12 Mîgambo yenu ya ûûme i ta njuno cia muu,
rong'o cienu i cia ntaga.
13 Kiraani na bûreke mbarie,
na ka mbûyîîrwe i wa kîra gîkambûyîîra.
14 N'ata mbûûmba wîkîra mwîrî wakwa thînaani,
na ngeekîra mwoyo wakwa njaraani ciakwa?
15 Kinya akambûraga, nwa nkaamwîrîgîîra,
amwe na ûgu nkaatheteera njîra ciakwa mbere yake.
16 Ûmma bûbû ûkeegua bûrî wonokio bwakwa,
n'ûntû muntû ûtatîîyaga Ngai atiûmîîria kûûya mbere yake!
17 Thikîîriani mîgambo yakwa bwega,
ka matû meenu meegue bûra nkuuga.
18 Îîndî n'ûntû i nthuuranîrîte îgamba rîakwa,
imbiyî ngaatarwa ndî ûmwagîru.
19 Kûrî we ûûmbana naani?
Wegua kûrî we, ngaakira ki na nkue.
20 Bunka, mpa into bibi biîrî, itû Ngai,
na rîru ntiîbitha kuuma kîrî woû,
21 îrutaruta njara yaku kîrî niû,
na ûtige kûnguayia na imakania biaku.
22 Rîru ûûmbîte na ngeetîga,
kana ûreke mbarie, naawe ûcookie.
23 I mabîtia na meeyia magana ndûthîîte?
Mbonia mabîtia na wîyia bwakwa.
24 I kî n'ûntû withîîte ûthiû bwaku,
na wantara ndî mûnthû?
25 Ûkaathîînia îthangû rîîburute i ruuo?
Ûkeengana na maûngû maûmo?
26 N'ûntû wandîkîîte mantû maathûûku îgûrû rîakwa
na watûma ndîîgwatîra meeyia ma wîthî bwakwa rûrî rûgai.
27 Ûthaîkîîrîîte magûrû maakwa ikabiini,
ûkaraga ûraithîrîte njîra ciakwa cionthe
na njîra ya kwana mîthia ya mbayo ciakwa.
28 Kwoogu, muntû aûraga ta gîntû kîoru,
ta nguo îndîe i mûthwa.