Ayubu aanung'una akiugaga n'akûnyûrûntwa
12
1 Rîru Ayubu acookia auga,2 “Gûtirî nkanja i biû antû bongwa,
na bûgakuuyanîria na ûûme!
3 Îndî wana niû ndî na ûûme ta biû,
tika bûrî beega gûûnkûrûka,
n'ûû ataiyî mantû mama monthe?
4 Ntuîkîîte muntû wa kûthekeerwa n'acoore baakwa,
kinya wegua ndeetaga Ngai na akaambîgua,
n'yû ntuîkîîte gîntû gîa kûthekeerwa woogu,
kinya wegua ndî ûmwagîru na ntirî na mabîtia!
5 Îthûganiani rîa muntû ûra atarî na thîîna i ka anyûrûntaga bara barî thîînaani,
athûgaanagia thîîna i cia bara barî na magûrû makûbaratia.
6 Marema ma atuunyani marî na ûkiri,
na bara bathûûragia Ngai bakari mayîîga
bara bakamataga ngai wao na njara.
7 Îndî ûria nyamû, na igakûrutana,
kana nyoni cia îgûrû, na igakwîra,
8 kana warîrie nthîgûrû, na îgakûrutana,
kana makûyû ma îria makwîre.
9 N'îrîkû kîrî ino cionthe îtaiyî
atî i njara ya Mwathani îrûthîîte ûûgû?
10 Ûtûûro bwa kîûmbe kîonthe bûrî njaraani ciake
kinya mîruke ya antû bonthe.
11 Gûtû gûtithimaga mîgambo
ta bûra rûrîme rûcamaga irio?
12 Anga ûûme bûtionekaga kîrî bara bakûrû?
Anga ûtûûro bûûraaya bûtireetaga kwerewa?
13 Ûûme na inya i bia Ngai,
kîrîra na kwerewa i biake.
14 Kîra oomboranagia gîtiakîka kaîrî,
muntû ûra aingagîra atiûmba kûrekeerua.
15 Akarigîîria ndûûyî, ga kûûmagaraga,
na akairekeeria i ka ikondoria nthîgûrû.
16 Inya na kûûmbana i biake,
mwenua na mwenania bonthe i baake.
17 Eengatagia eeyani ûkûrû barî mîgwate
na agatuîkithia agiiti magamba biaa.
18 Arutaga nguo ira ciîkîrîîtwe n'anene
akabooga ntaame tuuna twao.
19 Eengatagia athînjîri ba Ngai barî atae
na akagarûrania bara barî inya.
20 Akiragia tûnyua twa eeyani ûkûrû bara beetîgîîtue,
na akathiria ûmenyo bwa akûrû.
21 N'agagîra gîtîîyo antû bara barî gîtîîyo,
na agatuunya antû ba inya mathaga ma ndûa.
22 Aguûraga mantû ma ndeeni ma mwindu,
na akareeta irundu bira bitumanu werûûni.
23 Aneneagia mîgongo, na akamîînyangia,
aaramagia mîgongo, na akamîtiganîria.
24 Athûkagia gûciûkîrwa gwa atongoria ba nthîgûrû,
agatûma bathi kwanga rwanda gûntû gûtarî na njîra.
25 Baataataga mwinduuni gûtarî na werû,
agatûma bataratara ta areebi.