Sofari ariuga Ayubu abatîîrue akaanûkua
11
1 Rîru Sofari Mûnaamathi amûcookeria amûûria,2 “Biugo biingî ta bibi nwaka birega gûcookua?
Mwaria na inya ta ûyû nwa atarwe atirî na mabîtia?
3 Rwaria rwaku rwa ûtheri nwa rûtûme antû bakira?
na rîra wanyûrûntana, ka gûtarî we abatîîrue akûgondokera
4 Wîraga Ngai, ‘Ûrutani bwakwa i bûûtheru,
na ndî ûmûtheru mbere yaku.’
5 Îndî woû, Ngai akaaria,
agaatumûra kanyua gaake îgûrû rîaku
6 na agakuumbûrîra ciri cia ûûme,
n'ûntû ûûme bwa mma i bwa mbarî ciîrî,
menya ûûgû, Ngai n'ariganîrîtue kinya i meeyia mamwe maaku.
7 Waûmba kûmenya iriga bia Ngai?
Nwa wonanie mîanka ya Mwene Inya?
8 N'îmîraaya nkûrûki ya îgûrû, n'ata ûûmba kûrûtha?
N'îmîorokeru nkûrûki ya mborokero cia nthiko, n'aata ûmenya?
9 Ithimi biayo ibiiraaya nkûrûki ya nthîgûrû
na n'îmîaramu nkûrûki ya îria.
10 Ngai akaayîîra agu akaingîra muntû nceera,
kana ageetana îgambaani rî, n'ûû ûmûgiria?
11 Ûmma n'amenyaga antû ba ûtheri,
na rîra oonaga ûthûûku rî, atibûthûgaanagîria?
12 wa ta bûra muntû ûmûtaku ataûmba kûûgîa,
kaunga ka îng'ooi rîa kîthaka gatiûmba gûciarwa karî muntû.
13 Amwe na ûgu, ûkeerutanîria nkoro yaku kîrî we,
na ûgataambûrûkia njara ciaku kîrî we,
14 ûgata wîyia bûra bûrî njaraani yaku,
na ûkarega gwîtîgîîria wîyia nwa bûrîkû bûkara îremaani rîaku,
15 rîru ûgaûkîîria ûthiû bwaku ûtarî na îgi,
ûkaarûngama wîrikîrîtie na ûtagûkuthûka.
16 Ûmma ûkaariganîrua i thîîna yaku,
ûmîririkanage ta rûûyî rwakûrûkire.
17 Mûtûûrîre ûkaatharara nkûrûki ya mûthenya gatî,
na mwindu ûgaakara ta rûkîîrî.
18 Ûkeegua ûrî mayîîga, n'ûntû kûrî na wîrîgîîro,
ûkaaraitha rûteere na ûnogoke mayîîga.
19 Ûkaamaama, gûtarî na wa gûkûmakia,
na baingî bagaacwa kwendeerwa kuuma kîrî woû.
20 Îndî meetho ma bara bathûûku makaûra,
na bationa gwa gûkuthûkîra,
wîrîgîîro bwao bûgaatuîka gîkuû.”