Ayubu aathi mbere kûnung'unîra Ngai
10
1 Inogeete i mûtûûrîre wakwa,kwoogu, nkauga ntagûtigaria gûkaya gwakwa,
na mbarie ndî na ûrûrû nkorooni yakwa.
2 Nkeera Ngai, Ûtikangambithie,
îndî mbîîra mathitaango maakwa.
3 Nûgûkena ûkîmbinyîîria,
kûbûthîîria wîra ya njara ciaku,
ûkîthekathekaga i mîbango ya bara bathûûku?
4 Ûrî na meetho ma kîîmwîrî?
N'wonaga mantû ta bûra muntû oonaga?
5 Ntugû ciaku i ta ntugû cia muntû
kana mîanka yaku n'îkari ta ya muntû,
6 atî nwa mwanka ûncererie mabîtia
na gûceria meeyia maakwa,
7 wana wegua n'ûkûmenya ntirî na mabîtia,
na gûtirî we aûmba gûntuunyûkia kuuma njaraani ciaku?
8 Nwa mbûûmbire na wandinganîra amwe na njara ciaku.
Îîndî n'ûkaagarûka ûmbînyangie?
9 Ririkana wambûûmbire ta mûthetu wa yûûmba.
Ga ûgancookia tîîriini kaîrî?
10 Ûtambîtûûrire ta îria
na waamatia ta maguta,
11 wambîkîra nyama na rûûo
na wantumania amwe na mîîndî na mîkiia?
12 Wampeere mwoyo na wambîgîîrua kîao,
na ûrîîthiini bwaku wacûûbîra nkoro yakwa.
13 Îndî ûûgû i bu waithire nkorooni yaku,
na imbiyî atî ûgu i bu bûrî mathûgaaniani maaku.
14 Ûkeegua ka ndeeyiirie, wîgua ûncûûbîîte
na ûtikîîndekera nwaka ûgînkaanûkia.
15 Ûi kîrî niû wegua ndî na mabîtia!
Wana wegua ntarî na mabîtia, ntiûkîîria kîongo,
n'ûntû mbûyûrîîtwe n'îgi
n'ûntû bwa thîîna ciakwa.
16 Nkaaya gûûkîîria kîongo, ûnguîmaga ta cimba
na ûkoonania inya yaku kiuthatî naani.
17 Ûkandeetera akûûyî baayerû
na ûkoongeera mûthûûro waku kîrî niû,
njûûrî ciaku ikambûkîîra.
18 I mbi îndî wandutagîra nda ya taata?
Kaaba ngîkuire mbere riitho nwa rîrîkû rîmbona.
19 Ndaayaga kwîgua nkari taka ntaûmbwa,
ngakamatwa kuuma nda ya taata nkairwa nthikooni!
20 Ntugû ciakwa i ntare itirî akubî kûthira?
Umaanga kîrî niû kaingo mbîgua ndî na kaanya gaakai ga gûkena,
21 mbere nthi bantû ara ntagîcooka,
nthîgûrû ya mwindu na mwindu ûmûnene,
22 nthîgûrû ya ûtugû bûra bûnene,
ya kîrundu kîra kîorokeru,
naara kinya werû bûkari ta mwindu.”